Hamburg

Ons was hoog betyds by die stasie, want ons wag eerder vir die trein as om te moet hardloop om dit in te haal! Met heerlike warm koffie in die hand, is die wag darem ook nie so sleg nie.

Dit is net 'n uur se ry van Bremen tot by Hamburg Hauptbahnhof oftewel hoofstasie. Daarvandaan neem ons 'n voorstedelike trein, die S2, vir 2 stoppe en dan nog so ¾ km se stap tot by ons hotel. Hoe verder ons stap hoe meer wonder ek hoe op aarde het ons hier in die stasiedistrik 'n hotel bespreek?! Gelukkig was my vrese ongegrond. Dit is 'n mooi hotel met baie lekker kamers en alhoewel ons nie die ontbytopsie geneem het nie, kon ons ruik dit is goed.

Ons is natuurlik hopeloos te vroeg om in te boek, maar kan darem ons rugsakke daar los sodat ons gemaklik die stad kan verken. Dit gedoen gaan ons weer al die pad terug na die hoofstasie toe.
Ons besluit om 'n hop on hop off bustoer te neem, te sien wat die stad ons bied en dan te voet die dele te verken wat ons die meeste interesseer en met dapper en stapper bereikbaar is. So gesê, so gedoen.

Die busroete is bietjie verkort omdat die hawegebied gesluit is vir feesvieringe, maar verder kry ons 'n goeie idee van die stad. Ons ry ook rondom die Inner en Outer Alster mere in die stad. Hierdie mere is gevorm toe die Alsterrivier opgedam is in die middeleeue. Daar is die mooiste huise, eintlik moet mens dit villas noem, reg rondom die meer. Meeste lyk soos klein hotelle! Die pad rondom die meer is so 7 km lank en ons kry selfs op 'n gewone werksdag heelwat mense wat daar draf, fietsy en stap met of sonder honde. Daar is ook klein seilbote op die meer en natuurlik mense wat roei met kano's en selfs stand-up paddling doen. Die water is blykbaar net so tussen 2 en 3 meter diep, so die seilbootjies is nie groot nie. Dit het al gebeur dat die meer toevries en dan skaats die mense daarop, maar dit is dink dit het omtrent 80 jaar gelede laas gebeur.

Ons klim weer by die hoofstasie af en soek 'n eetplekkie. Ons kry in die stasie 'n "food court" en alles ruik so lekker dat my mond sommer begin water. Daar is eetplekke van elke cuisine van die wêreld voel dit my. Truda het iewers gelees dat mens die lekkerste vis kan eet in Hamburg en ons hou van vis, so ons soek 'n viswinkel. Ons kry een wat rou vis in baie verskillende gedaantes verkoop, maar dis nie sushi nie. Marjan sou kon kus en keur! Ons bly maar by die ou staatmaker - fish and chips. Selfs in Hamburg word dit só (in Engels) aangedui. Dit was nie 'n fout om die geykte gereg te koop nie - dit was absoluut heerlik!

Na ete stap ons na die Rathaus oftewel die stadsaal. Dit was een van die mooiste en indrukwekkendste geboue wat ons vanuit die bus gesien het. Ons gaan in ook en besef daar is 'n konferensie aan die gang en dit is hoekom daar nie toere aangebied word vandag nie. Ek raai die konferensie gaan oor klimaatsverandering, want daar is 'n uitstalling daaroor in die hoofsaal vd gebou. Ons lees so paar van hulle, maar verkyk ons meer aan die moeite wat vorige geslagte gedoen het met die versiering van geboue.

Daarna stap ons in die rigting van 'n hoë kerktoring wat ons oor die dakke sien uitsteek. Toe ons daar kom, sien ons dit is net 'n toring, die kerk is "missing"! Dit is/was die St Nikolai kerk wat in 1943 as deel van Operasie Gomorra gebombardeer is deur die geallieërde magte. Die kerktoring het bly staan omdat die vlieëniers dit as baken gebruik het.

Daar is 'n hysbak wat mens 75 m in die toring opneem vir 'n mooi uitsig oor die stad. Die museum is ondergronds, in wat die kelderarea vd kerk was. Dit beeld kortliks, maar baie goed die geskiedenis van die kerk uit sedert 1195 totdat dit verwoes is in 1943. Dan word daar ook heelwat vertel van hoe Hamburg en sy mense geraak is deur Operasie Gomorra toe die hele stad omtrent afgebrand het agv die bombardering. Dit is baie aangrypend. Mens dink altyd aan Duitsland as die skurk in die WWII verhaal, maar tienduisende gewone Duitsers is ook gedood in aanvalle deur die geallieërde magte. Daar is maar nét verloorders in 'n oorlog!

Daarna stap ons weer terug na die hoofstasie en neem die nou bekende S2 trein na Rothenburgsort en stap die laaste stukkie na die hotel. Uiteindelik kan ons inboek en voete laat rus!

Dit is 'n lekker kamer met een hele muur wat uit vensters bestaan - van halflyf hoogte tot teen die plafon. Ook die badkamer het 2 groot vensters en dus natuurlike lig. Dit is 'n lekker groot badkamer met 'n heerlike stort. Ons is omtrent bederf die afgelope paar dae met skitterende verblyf teen bekostigbare pryse.

Môre skud ons die Duitse stof van ons voete af en vertrek ons Denemarke toe.Read more