Embungrindik

Dänn hemmer eus uf es 2-tägigs Abentüür begäh. E Wanderig z mache wommer ufem Wäg es Zält ufschlönd und dete schlaafed.
De Plan isch folgendermasse gsi: mer sind aneme Morge vom Homestay in Tetabatu abghollt worde und zum Bärg anegfahre worde.
Zum Homestay isch no z säge, dass mer vode Vandini und ihrem Papi meeega verwöhnt worde sind. Passionsfrücht im Übermass bechoo, s Ässe wos gmacht händ (Nudelsuppe, Gmüescurry, Poulet usw.) isch de absoluti hammer gsi, aber vor allem au d Gspräch wommer mit ihne hend chönne füere. Sie hend eus ei Mal meh zeiged wie simpel s Glück chan sii, aber au wie unerreichbar gwüssi Sache für sie sind. Über ihri Schuelziit, ihri potentielle Ehemänner und über ihres Homestay-Business het eus d Vandini ganz glücklich verzellt. Gflirtet het sie au ganz toll 😂
4 mönet später hani denn aber leider uf Insta bide Vandini gseh, dass ihri Familie en Unfall gha het und ihre Papi (nur öppe 50i) verstorbe isch.

Zrug zude Wanderig: mir sind z 3te gstartet: de Trent, d Hele et moi. D Marina het kei Bock gha und isch in Kuta, Lombok bliebe. Ziemli schnäll hemmer aber chäggt, dass es no e anderi Gruppe mit Holländer het, wo genau die gliich Route gmacht hend wie mir. Also hemmer eus eigentli zämmegschlosse.
Praktisch aber gliichziitig truurig isch gsi, dass mer nöd nur en Guidw gha hwnd, sondern pro Gruppe au 2 Porters wo all Chuchiutensilie, eusi Zälter und s Ässe ufegno händ. Die Porters hend kei richtigi Schueh gha, eine isch sogar mit FlipFlops gloffe. Anschiinend wills so eifacher isch. Gässe hemmer würklich würklich rächt guet, sie hend 3 Mal pro Tag warm für eus kochet und s het zahlriichi geili Snacks und Schoggistängel geh. D Luftfüechtigkeit het eus aber schnäll zum schwitze bracht, dänn ischs wieder chalt worde im Schatte und denn wieder sehr sehr heiss. So de ganz Tag bis mer churz vor Sunneuntergang ahghalte händ zum eusi Zälter fürd Nacht ufstelle. Wo denn d Sunne undergange isch, hets schnäll abküelt. Zum Glück hämmer Jagge debii gha und es isch es füür gmacht worde. De Nachteil isch aber gsi dass mir denn nöd nur nach Schweiss sondern au no nach Rauch gschmöckt hend. Euses Zält isch grad am Füür gsi, also hets eus die ganz Nacht Rauch ineblase 😂
Am 4i am Morge simmer denn gweckt worde zum de letschti Teil uf de Gipfel z laufe und dete obe denn de Sunneufgang z bestuune. Näbed euse 2 gfüerte Gruppe hetts denn au no ganz viel anderi Gruppe und Jugendlichi gha wo uf eigeni Fust duruuf gloffe sind.
Mega schön ischs gsi sone 360° Sicht und halt ebe de Sunneufgang.
Wommer denn wieder abe zu de Zälter sind hend dete scho d Bananepancakes und de Kafi zum Zmorge uf eus gwartet.

S abem Bärg stiige isch denn düütlich schnäller gange wie de Wääg duruuf am Vortag und d Gepäck vo de Porters isch au echli liechter gsi. Eusi Bei sind defür ziemli müed gsi und mir sind würkli happy gsi wommer denn voneme Pick-Up uf de Strass abghollt worde sind und zrug is Homestay bracht worde sind 🙂Läs mer