検索条件をリセット
in a land down under
  • Kelly Joss

in a land down under

Ig darf brueflech nach Auckland & Australie reise und weni scho um die haubi Wäut jette de verbringi natürlech ou no chli Ferie in Ozeanie. もっと詳しく
フォローする概要カレンダー共有共有死ぬまでにやっておきたいことリスト
最新のものから
  • 旅行の開始
    2024年5月23日
    Kelly Jossin a land down under旅行者

    Business Class to Auckland

    2024年5月23日, スイス ⋅ ☁️ 13 °C

    Hüt isches sowit und es geit los nach Auckland und aschliessend Australie. Mis Mami würd säge ig sig ä Plöischlerin, aber es wartet ä strängi Wuche mit viune Präsentatione u Meetings i 4 verschiedene Städt (u 3 Flüg i 5 Täg) uf mi.

    Da ds i erster Linie ä Gschäftsreis isch darfi ir Business Class reise. Säuber würdi nie so viu Gäud fürne Flug usgäh aber ig muess säge es isch scho cool ds mau z‘erläbe. Mi het scho bim Check-in dünkt dass auess viu fründlecher und entspannter louft, vilech aber ou nume wöus nid so viu Lüt het gha. Wo die nätti jungi Frou mi het icheckt gha fragt sie mi ob sie süsch no öpis für mi cha due u ig ha gar nid gwüsst wasme de iz da no chönnt antworte. Uf jedefau höckli ize ir Business Lounge, warte ufs Boarding und gönne mir „free“ food & drinks. Gseh mir äch die angere Lüt ah, dasi no nie hie inne bi gsi?

    Mis erste Etappeziel ufem (sehr länge) Wäg nach Auckland isch Hongkong, take off am 22:40h.

    See you in ca. 12h. 👋🏼🇭🇰    もっと詳しく

    翻訳をご覧ください
  • Kelly Jossin a land down under旅行者

    Welcome to Hong Kong

    2024年5月24日, 香港 ⋅ 🌧 26 °C

    Wie erwartet isch ds dr agnähmst Flug gsi woni bishär je ha gha. Ig ha zersch mau müesse usefinge wie die verschidene Funktione vo däm Sitz göh und ha ghofft dass mir niemer derbi zueluegt. Glücklicherwis isch dr Sitz näb mir freiblibe de hani no meh Bewegigsfreiheit gha. Chum bini abghockt gsi isch de oh scho dr Champagner serviert worde, ig ha die alkoholfreii Variante gno, Champgner fingi überbewärtet. 😉

    Ig hät rückblickend nid scho ir Lounge öpis söue ässe wöu natürlech hets när im Flüger när nomau äs 3-Gang-Menü gäh und ig ha oh no dörfe uswähle wasi am Morge wot zmörgele. Da ig ä Nachtflug ha gha und quasi es Bett hani när chli chönne pfuse. Ig ha zwar chli unruhig gschlafe aber woni wieder bi erwacht isch scho z Zmorge serviert worde. Dr Landeaflug in Hong Kong isch zimlech spektakulär gsi, siehe Fotos! 🤩

    Iz hani hie ca. 4h Ufenthaut und när gits nomau ä 11h Nachtflug uf Auckland, vilech chani nomau chli nappe de bini wenigstens nid komplett verwirrt weni ahchume.

    Bye for now 👋🏼    もっと詳しく

    翻訳をご覧ください
  • Kelly Jossin a land down under旅行者
    Neuseeland vo obe
    dr Hotelpool

    Kia Ora New Zealand

    2024年5月25日, ニュージーランド ⋅ ⛅ 16 °C

    Am Gate in Hong Kong bini scho z‘erste mau nervös worde wo mi eine vor New Zealand Immigration het ahgsproche und mi usgfragt het woni häre gah, wasi dert mache und wie lang dasi blibe. Ke Ahnig wieso daser mi het gfragt, vilech hani verdächtig gwürkt… 😂
    Nachdäm ig ihm auess verzeut ha heter gseit er müess churz es Telefon mache er wüssi nid gnau ob mis Visitor Visa da richtig sig aber „I should not worry too much“, ig ha natürlech „worry very much“ und gwartet bis er zrüg chunt. Nach ca. 10 Minute ischer wieder cho und het mir erklärt dass auess guet sigi ig müess keni Sorge ha, Glück gha!

    Im Flüger hani wieder vorauem gässe, mini Präsentation nochli vorbereitet und nomau chli gschlafe, ha schlussändlech nid mau eine vo mine Podcasts glost. 😄

    In Auckland ahcho bini zum Glück ribigslos dürt Immigration cho und es Uber het mi zu mire Ungerkunft bracht - es mega luxuriöses 5* Hotel mitts ir Stadt. Hie oh wieder; würdi säuber nie bueche aber es fägt glich. 😂

    Ize machi mi früsch, probiere wach z‘blibe bis am Aabe und due nochli Auckland erkunde - es herbstelet schön bi ca. 15 Grad. 🍂    もっと詳しく

    翻訳をご覧ください
  • Kelly Jossin a land down under旅行者

    Auckland & Waiheke Island

    2024年5月26日, ニュージーランド ⋅ 🌬 16 °C

    Nachere länge Duschi bini gester nochli dür Auckland gloffe. Es het 2-3 schöni Fläckli, zum Bispiu z Hafeviertel wo ou üses Hotel derzue ghört. Auess i auem hets mi aber nid mega gflashed drum hani churzfristig entschide die buechti „free walking tour“ am Suntigmorge abzsäge und derfür uf Waiheke Island z‘gah zum nochli Natur z‘gseh.

    Am Aabe bini de no mit dr Claudia vo de Zermatt Bergbahne ga Znacht ässe und ha eigentlech früeh is Bett wöue. Mi Körper isch aber äuä no nid ir richtige Zytzone ahcho und drum ischs glich Mitternacht worde.

    Hüt Morge hani när t‘Fähre uf Waiheke Island gno, die Insle isch rächt gross und mä chönt locker ä Tag oder mehreri Täg hie verbringe. Ig bi eifach chli planlos umegloffe und ha die schöni Landschaft gnosse. Bi grad chli trurig gsi dasi nid lenger in Neuseeland cha blibe unds morn scho witer geit, hoffentlech es angers mau - Neuseeland isch iz uf jedefau fix uf mire Bucket List.
    Ig bi schlussendlech im Dörfli Oneroa glandet, ha dert ä Burger gässe u bi wieder zrüg spaziert. Z Wätter isch sehr herbstelig gsi u es het gfüut au 5 Minute gwächslet zwüsche Wind, Sunne und Räge.

    Am Namitag bini de wieder zrüg uf Auckland und no ufe Sky Tower ufegange. Meistens reut mi z Gäud für so Touri-Türm aber t Ussicht het sech glich glohnt. 😄

    Hüt Aabe isch dr erst offiziell Event (mä isch ja zum schaffe da) äs Znacht und z Briefing für die kommendi Wuche mit aune Schwizer Partner. Morn geits los mitemne Media Event am Morge und emne Trade Event am Mittag und am Aabe flüge mir scho uf Melbourne.

    Wish me luck 🍀    もっと詳しく

    翻訳をご覧ください
  • Kelly Jossin a land down under旅行者
    Media Breakfast Auckland
    Team SwitzerlandFlinders Street Railway StationMelbourneMelbourneMelbourneme at workSwiss Yodel Choir vo Melbourne 🤗Lindt Maître Chocolatier

    G‘Day Melbourne

    2024年5月28日, オーストラリア ⋅ 🌙 12 °C

    Am Mäntigaabe simer nach üsne zwöi Events no uf Melbourne gfloge und hie ischs hüt grad witer gange mitere Podcastufnahm, ä Media Lunch, Trade Meetings und Trade Dinner.

    Zum Glück hei mir am Morge no öpe es Stündli Zyt gha zum chli dürt Stadt z‘loufe, de heimer glich no chlii öpis vo Melbourne gseh. Morn Morge geits nämlech scho wieder witer uf Sydney. ✈️もっと詳しく

    翻訳をご覧ください
  • Kelly Jossin a land down under旅行者
    Sydney Tower
    Sydney SkylineOpera HouseHarbour Bridgeme at work 🤗Chääs-Cervelat-Spiessli 😍Team 🫶🏼Präsentation #6chocolate cake love

    1.5 days in Sydney

    2024年5月30日, オーストラリア ⋅ ☀️ 23 °C

    Am Mittwuch Morge si mir früeh abghout worde und vo Melbourne uf Sydney gfloge. Mir hei vor üsem nächste Event nochli Zyt gha und hei drum zum Glück no öpis gseh vo dere tolle Stadt.

    Am Namitag hei mir när wieder Meetings und ä Dinner Event gha und dr Aabe i verschiedene Bars lah usklinge.

    Hüt Mittag simer ir Residenz vom Schwizerische Konsul gsi und hei ä Media Lunch gha - typical Swiss mit Fondue und Schoggi.

    Iz simer scho wieder ufem Wäg ah Flughafe und flüge witer uf Brisbane füre letst Tag vo üsere Arbeitswuche in Australie und am Samstig faht dr guet Part ah: holidays! 🏖️    もっと詳しく

    翻訳をご覧ください
  • Kelly Jossin a land down under旅行者

    Brisbane - it‘s a wrap!

    2024年5月31日, オーストラリア ⋅ ☁️ 19 °C

    Gester Aabe hei mir ar Hotelbar la usklinge und hüt dr letst Tag vo üsere Roadshow i Agriff gno. Mir hei Trade Meetings und ä Trade Event gha und am 14:30 isch die Wuche mit 7 Präsentatione während 5 Täg i 4 Städt mit 3 Flüg derzwüsche z‘Änd gange.

    Die Wuche hei mir la usklinge mitere Flussfahrt nach „Teneriffe“ womer ire super Brauerei si gsi und derna fein hei Znacht gässe.

    Nach 1 Wuche faht meh sech richtig ah die Lüt afah gwöhne und ig gloube ig wirde se morn scho vermisse. Ig gloube us Touristiker*in läbt me chli ire Bubble und us Sales Mönsch nomau meh aber es si auess super liebi und spannendi Persone wome uf dene Reise trifft und ig ha die Wuche richtig gnosse. Was fürnes Privilieg dasi ir Wäut darf umereise und üses wunderschöne Heimatland darf präsentiere. 🫶🏼 Mä wird mit dr Zyt würklech fasch chli wiene Familie und es isch immer wieder schön weme die Lüt am nächste Event wieder trifft. Ah dere Steu ä Reminder; reise erwitert dr Horizont SO fest und angeri Länder gseh isch mega berichernd, please do it. Und übrigens isch ir Schwiz läbe es MEGA Privileg wo mir aui viu meh sötte schetze.

    Natürlech fröie mi aber oh dass die strängi Arbeitswuche düre isch und fröie mi uf morn: Fiji is calling! 🥳    もっと詳しく

    翻訳をご覧ください
  • Kelly Jossin a land down under旅行者
    Hostel life
    Castaway IslandCastaway IslandCastaway IslandCastaway IslandMalamala Beach Club

    Bula Fiji! - Nadi & Castaway Island

    2024年6月2日, フィジー ⋅ ⛅ 28 °C

    Gester bini am Aabe öpe am 17:00 in Nadi, Fiji ahcho. Ig mache hie es Island Hopping und die erste zwöi Nächt verbringi in Nadi säuber im „Smugglers Cove“. Ig ha (leider) es 4-Bett-Zimmer buecht us rächt schnäu beröit, es isch nämlech nid schön. Immerhin isches aber suber und sicher besser aus z 16er Zimmer wos no hät gäh. Ig bi aber oh froh, dass sech mis Vergangenheits-Ich für die kommende Ungerkünft es Einzelzimmer het gönnt.

    Uf jedefau het ds Zimmer mini Luune grad chli dämpft und wöus scho fiister isch gsi hani o nid würklech viu vo Nadi gseh gha, es sig aber oh nid so spektakulär hani mir lah säge. Ig ha när drum für hüt grad ä Tagesusflug buecht wöui dänkt ha hie wotti nid z lang si (obwou d’Ungerkunft usserhaub vom Zimmer ganz okay isch).

    Ig ha de speter ono mi eint Zimmergnoss dr Gavin vo Neuseeland kenneglehrt und dä isch sehr flott gsi drum schlussändlech auess haub so schlimm. Mit ihm hani de hüt ono Zmorge gässe und Champions League gluegt. Ig ha när gester im Resti no Znacht gässe was sehr fein isch gsi und vomene unbekannte Verehrer ä Piña Colada spendiert becho, däm resp. ar Kellnerin wone mir bracht het hani aber de gseit ig sig scho „married“. 😂

    Hüt hani när dr Tag uf Castaway Island verbracht. Ig ha dänkt ds sig die Insle wo dr glichnamig Fium isch dräit worde, es het sech aber usegsteut dass ds ä angeri Insle ganz ir Nechi isch. Aui Fijianer*inne si mega lieb und überau säge immer aui „Bula“ was Hallo heisst. Ds Usflügli und die Insle isch sehr schön gsi und ize bini ufem Rückwäg uf Nadi woni nomau ä Nacht verbringe bevors morn richtig los geit mit Insel Hopping i de zwöi Inselgruppe Mamanuca & Yasawa Islands.

    Vinaka (danke) und tschüss 👋🏼    もっと詳しく

    翻訳をご覧ください
  • Kelly Jossin a land down under旅行者
    🥥mis Hüsli 🥰🐠ds Semi-Submarine vo inneSunset

    South Sea Island

    2024年6月3日, フィジー ⋅ ⛅ 28 °C

    Hüt bini am Morge am 7:00 abghout und zum Hafe bracht worde und vo hie us hani z Schiff gno nach South Sea Island. Ig ha übrigens auess bi South Sea Cruises via Awesome Adventures Fiji buecht und cha ds sehr empfähle, vom Check-In bim Schiff übere Gepäcktransport bis zum Empfang uf dr Insle funktioniert hie auess 1A!

    South Sea Island isch so chli dasme innerhaub vo 15 Minute drumum cha loufe. 😄 Hie blibi 1 Nacht und ha ines chlises „Beach Bure“ (wienes Bungalow) icheckt und es isch super schön. Ig ha sone 7 Täg Pass fürd Fähre und Ungerkünft buecht und mä het entweder auess private oder auess shared chönne wähle und wöu ir einte Ungerkunft shared ä 32er (!!) Dorm würd bedüte hani mir überau es Einzelzimmer gönnt. Die Dame wo mir ds Bure zeigt het, het mi scho gfragt obi nid Angst heig hie alleini z schlafe. 😂

    Am Vormittag bini när uf somne Semi-Submarine gsi was rächt cool isch gsi wöui mega viu Fische inkl. ä blaue Seestern ha gseh und am Namitag bini no ga schnorchle - Nemo hani aber nid gfunge.

    Am Mittag und Aabe gits hie es Buffet wöus uf dere Insle oh nüt git ussert ds chline Resort - es isch zum Glück aber mega fein!

    Iz gniessi dr Sunneungergang und fröie mi druf när mau wieder mini Haar aständig z wäsche (i däm Hostel vorhär isch z Wasser nach gfüut 20 Sekunde überloffe) und morn geits scho wieder witer uf die nächsti Insle.

    Vinaka & Bula 🌺    もっと詳しく

    翻訳をご覧ください
  • Kelly Jossin a land down under旅行者
    dr "Chrieger" wo üs het begrüesst
    Outdoor Showermis Hüsli 🥰dr Wäg zum Ussichtspunkthet sech glohnt!Wanderoutfit 10/10

    Kuata Island

    2024年6月4日, フィジー ⋅ ☁️ 27 °C

    Gester Aabe hets no es feins Znacht gäh und mir hei dr Aabe bimne Nationalhymne errate la usklinge - Spoiler: ke einzigi hani gwüsst. 😂

    Hüt Morge isches mitem Katamaran wieder witer nordwärts gange. Ig bi immerno beidruckt wie ribigslos das funktioniert, es chlises Böötli hout eim pünktlech ab, bringt eim zum grosse Schiff u am nächste Ort wirdme wieder abghout und z Gepäck bechunt ä Tag mitem Ort und zuesätzlech muessmes aber nomau identifiziere bevorme geit, würklech 10/10.
    Trotzdäm isches nid ZU touristisch wöume die Insle nid „eifach so“ erreicht unds näbstem Resort meistens praktisch nüt git - auso mega mega schön!

    Im Barefoot Kuata hani wieder ines wunderschöns Beachfront Bure dörfe ichecke und ha Zmittag gässe und dr Pool gnosse. Dr Strand isch leider nid so zum bade wöus mega viu (toti) Koralle het. Am spetere Nami hani de gfunge iz muess no öpis gah und bi zum Ussichtspunkt ufegloffe. Ig würd lüge weni würd säge ig heig nie Angst gha i dene 45 Minüte allei z Loch uf düre Waud. 😂 T’Ussicht het sech aber mega glohnt und es isch auess guet gange und mängisch muess me chli naiv si im Läbe. Ig ha mi aber vorhär brav bir Reception abmäudet, im schlimmste Fau wäre sie mi auso de cho sueche.

    Z‘Aabeprogramm isch glich wie gester; düschele, Znacht ässe und früeh ga lige, es geit morn nämlech am 08:00h los mitemne Schnorcheltrip. Dä isch chli spezieller und mä söt chli meh gseh weder „nur“ Fische - stay tuned. 😜 När geits scho wieder witer, iz bini de gli 2 Wuche ungerwägs u no nie lenger aus 2 Nächt am Stück irgendwo gsi, aber het ja niemer vo Erholigsferie gredt. 😂

    à bientôt!    もっと詳しく

    翻訳をご覧ください
  • Kelly Jossin a land down under旅行者
    Sunneufgang hüt Morge
    Kuata IslandRiffhaino meh Riffhaie 🤩so wärde mir aube vom Resort zum Schiff brachtungerwägs gsehtme viu schöni Inslemis Hüslimis Hüsli vo usse

    little reef sharks & giant manta rays

    2024年6月5日, フィジー ⋅ ☀️ 26 °C

    Hüt hani soo viu cooli Meeresbewohner gseh! 😍 Am Morge früeh ischs los gange mitemne Schorcheltrip woni öpe 8 Riffhaie ha gseh, es git white tip reef sharks und black tip reef sharks u die si ganz härzig u friedlech. Zwöi dütschi Girls hei Videos mitem Handy gmacht u mir die nätterwis derna gschickt.

    När hani uscheckt und bi witer gfahre zum Mantaray Resort. Ds Resort hani unbedingt wöue bueche und zwar nid wägem Resort säuber sondern wägem Schnorchle mit Mantaroche. Z Resort säuber isch härzig und git chli Campingvibes, ig hanes eigets Hüsli aber Duschi u WC wärde teilt u es het gloub 4 Duschine fürs ganze Resort. 😂 Ig bi aber glich ganz zfride mitem eigete Zimmer wöu hie gäbs iz äbe dä 32er Schlag…

    Zrüg zu dä Mantaroche; immer we high tide (Flut) isch und t‘Roche chöme de düesi im Resort es Zeiche gäh und mä cha sech ga ischribe füre Trip. Ds hani natürlech sofort gmacht und es isch SO cool gsi! Mir si öpe am 4i mitem Boot usegfahre und dr Guide het aube gseit wo luege und insgesamt hani sicher 5-6x ä Roche gseh und die si riesig! Mantaroche si mega friedlichi Tier und absolut ungfährlech, nid z‘verwächsle mit Stachelroche. Sie gseh richtig entspannt us wie sie so dürs Wasser gleite und zum Teil si sie richtig nach cho, würklech es riese Erläbnis! Da ig leider ke GoPro oder ähnlechs ha müesster google we dir se weit gseh… 😉

    Iz gahni mau gah astah fürs düschele…    もっと詳しく

    翻訳をご覧ください
  • Kelly Jossin a land down under旅行者

    Mantaray Island

    2024年6月6日, フィジー ⋅ 🌬 26 °C

    Uf dere Insle woni ize bi hani rächt viu Alleireisendi troffe was rächt cool isch gsi de hani mi chli chönne ustusche und ha vorauem nid alleini müesse Znacht ässe. 😊

    Für hüt Morge hani ä Village Tour buecht gha, mir si ca. 20 Minute mitem Boot is Soso Village uf Naviti Island gfahre. Dä Dorfbsuech isch mega cool gsi und es isch spannend gsi nochli öpis vo dä Iheimische z gseh. Mir si dürs Dorf spaziert, hei ä Schueu bsuecht und si am Schluss no ufene chliine Märit gange. D Lüt hei aui mega Fröid gha am Bsuech, vorauem d‘Ching ir Schueu. Usserdäm bechöme si chli Gäud we Bsuecher chöme und drum ischs ou ä wichtigi finanzielli Ungerstützig fürs Dorf.

    Nachem Zmittagässe hani de chli ah mire Brüni gschaffet und bi no am Huusriff ga schnorchle. Ig ha ungerangerem Nemo, ä blaue Seestärn und ä lustige „Stabfisch“ gseh. Derna simer ga dr Sunneungergang luege und hei wieder ire gmüetleche Rundi Znacht gässe.

    Nachem Znacht hets de no ä Game Night gäh und das mau bini besser gsi aus im „anthem guessing game“, ig bi einisch 2. u einisch 3. worde. 🥳

    Morn geits scho witers uf die letsti Insle und ig ha ghöre säge ds sig die schönsti. 🤩    もっと詳しく

    翻訳をご覧ください
  • Kelly Jossin a land down under旅行者
    sie singe immer es Lied we lüt uschecke 😊Nacula Islandmis nächste Hüsli für 2 Nächt

    Oarsman‘s Bay Lodge - Nacula Island

    2024年6月7日, フィジー ⋅ 🌬 26 °C

    Hüt bini fasch chli wehmüetig gsi dasi witers ha müesse wöui im Mantaray Island Resort so cooli Lüt ha kenneglehrt, aber das ghört haut chli derzue. 😊

    Es het usserdäm MEGA gluftet und drum isch d‘Bootsfahrt so semi cool gsi, usserdäm hani mini Birkestöck verlore wöuise ha abzoge bevor mir si losgfahre und sie när grad si dervo gfloge. Iz verbringi haut die nächste 3 Täg barfuess wöu Sneakers ufere Insle weni nid grad irgendwo häre wandere wotti eigentlech vermiide und es het wit u breit ke Lade.

    Ize bini ir Oarsman‘s Bay Lodge uf Nacula Island ahcho und mega viu Lüt woni bishär ha troffe hei vo dere Insle gschwärmt wöu dr Strand so wiss und z Wasser so klar isch und es isch würklech mega schön. Dr Namitag hani hie am Strand verbracht und morn am Morge hani mis letste Usflügli in Fiji ufem Programm bevors am Suntig när leider scho wieder zrüg uft Houptinsle geit.

    Bi üsem Resort gits hüt Aabe no äs Bonfire und ig ha ghört dasme im Resort näbe dran es Crab Race cha ga luege.. 😂 Update folgt…    もっと詳しく

    翻訳をご覧ください
  • Kelly Jossin a land down under旅行者
    Bousteu-Schiff
    d Höhline vo usseSawa-i-Lau CavesYaromo IslandKavaFisch usem Lovo

    Caves, Kava & Honeymoon Island

    2024年6月8日, フィジー ⋅ 🌬 27 °C

    Es het de gester Aabe weder es Bonfire (wägem Wind) no es Crab Race gäh - schade! 😄

    Hüt Morge simer mitem Boot zu dä Sawa-I-Lau Caves gange. Ds si so Höhline wome drin cha schwümme und sie si mega idrücklech gsi. I die ersti Höhli hetme eifach chönne inespaziere, die zwöiti isch chli schwieriger gsi wöume dürnes dunkles Loch het müesse touche, ha mi auso scho chli müesse überwinde. Es isch aber mega cool gsi und wöumer fasch die erste si gsi hets fasch keni Lüt gha, womer si gange ischs nämlech chli überbevölkert gsi.

    Wöusi hüt im Resort ä riesigi Bousteu hei heisi üs abote uf ihri „Honeymoon Island“ z gah. Ds ische Privatinsle wo zum Resort ghört u normalerwiis chame dert häre privati Trips bueche und es isch dementsprächend beliebt für Hüratsaträg. Mir hei de dr Tag uf dere Insle chönne gniesse und es het no äs Picnic gäh zum Zmittag.

    Am Aabe isch när Fiji Night gsi und ig ha ah mim letste Aabe uf de Yasawa Insle ändlech nochli Kultur erläbt. Zersch hets ä Kava Zeremonie gäh, Kava isch es traditonells Getränk wo usemne Pulver vor Kava Pflanze und Wasser gmacht wird. Es gseht us wie Schlammwasser und es schmöckt oh chli so. Dr Spruch derzue geit wie folgt:

    „Drink Kava like a king, walk home like a crab, sleep like a baby, snoar like a boar, wake up at fiji time - no hurry no worry.“

    Es söu schiins beruhigend würke und d‘Lippe füehle sech chli toub ah wemes drinkt. Zur Zeremonie ghört dasme vorhär einisch chlatscht, Bula seit, trinkt und nomau 3x chlatscht.

    Üses Znacht isch im „Lovo“ zuebereitet worde, ds isch eigentlech ä Art Ärdofe, sprich sie mache äs grosses Loch i Sand, erhitze Steine mitemne Füür und choche när so z‘ässe. Derzue hets ou no ä Meke Show gäh, ds ische fijianische Tanz.

    Morn geits leider scho wieder zrüg uft Houptinsle…    もっと詳しく

    翻訳をご覧ください
  • Kelly Jossin a land down under旅行者

    Vinaka Fiji ❤️

    2024年6月10日, フィジー ⋅ ⛅ 19 °C

    Gester isch nümme viu passiert, wöus ä länge Reisetag isch gsi. Ig ha bis am 13:00 no dr Strand vor Oarsman‘s Bay Lodge gnosse und bi denn wieder ufs Boot bracht worde. Dr „Yasawa Flyer“ fahrt jede Tag im Port Denarau ab und fahrt am Morge nordwärts, chunt am 13:00 bir Oarsman‘s Bay Lodge ah und fahrt dr glich Wäg wieder zrüg. Da mini Ungerkunft d‘Ändstation isch gsi isches dämentsprächend lang gange und ig ha 4.5h ufem Schiff verbracht, isch aber mit Snacks, Podcasts und chli useluege ganz guet gange.

    Zrüg am Hafe hani uf mis Gepäck gwartet u bi mitem Bus wieder zum gliche Hostel gfahre wieni scho am Afang bi gsi, das mau hani mir aber es Einzelzimmer gönnt und mi richtig druf gfröit. Leider het aber öpis mit dr Buechig nid funktioniert und sie hei mi trotz stürme und „aber-da-steits-ig-has-äxtra-usdruckt-und-derfür-zaut“ wieder i ds 4er Zimmer gsteckt… hani mässig guet gfunge aber ha eh am Morge früeh wieder müesse gah u de hani gfunge bringt nüt ä (no grössere) Ufstand z‘mache.. 😂

    Im Bus hani de wieder dr Gavin troffe und ha mit ihm undem Sam woner ungerwägs irgendwo ufgablet het no ga Znacht ässe. Natürlech hets oh wieder die glichi Füürshow gäh wie scho letst Suntig.. 😊

    Hüt am Morge bini de scho am 05:45 abghout worde, bi iz grad am Flughafe am zmörgele u flüge am 09:00 uf Sydney. ✈️

    Fiji isch mega mega schön und mä chönt ewigs dert verbringe wöus soo viu verschideni Insle het und jedi Insle mega viu bietet (solang mä gärn Meer und Sand het 😉). Usserdäm si die Iheimische mega fründlech u härzlech und mega stouz uf ihres Land. Schad isches so wit wäg, umso meh bini froh drüber dasi die Chance gnützt ha dahäre z‘cho.

    Vinaka Fiji it was a pleasure! 🫶🏼    もっと詳しく

    翻訳をご覧ください
  • Kelly Jossin a land down under旅行者
    Ussicht vor Dachterrasse
    Luna ParkBlick vor Dachterrasse hüt Morge 🚢

    North Sydney & Vivid

    2024年6月11日, オーストラリア ⋅ ☁️ 11 °C

    D’Reis vo Nadi uf Sydney isch ribigslos gange, lustigerwiis heisi vorem istige nomau so festivalmässig z’Handgepäck kontrolliert, ds hani auso ono nie erläbt.
    In Sydney hani wieder imne Hostel icheckt und has nid beröit. Z‘YHA Sydney Harbour het ä Dachterrasse mitere MEGA Ussicht übere ganz Hafe inklusive Operehuus und Harbour Bridge. Mis 6er Zimmer isch usserdäm sehr gross und suber und augemein isch auess modern, ig bi auso happy.

    Nachere Duschi bini eifach mau losgloffe und ha dänkt mä chönt ja mau über d‘Harbour Bridge loufe we sie scho grad da isch. So bini im Norde vo Sydney glandet und ha nomau ä angere tolle Usblick ufd Stadt gha und usserdäm no ä schöne Garte (Wendy Whiteley‘s Secret Garden) und dr Luna Park vo Sydney entdeckt.

    Ig bi när äxtra bis am 18:00 dert blibe und mit dr Fähre zrüggfahre wöu denn z Vivid het agfange. Z‘Vivid isch es Liechtfestival wo die ganzi Wuche no louft und so hani vor Fähre us ä wunderbare Blick uf die schön belüchteti Stadt gha. Wieder zrüg am Circular Quay hani de no dr „Vivid Light Walk“ gmacht wo am Wasser nah via Barangaroo zum Darling Harbour gfüehrt het u bi dür d‘Stadt wieder richtig Hafe gloffe.

    Dert hanis mir nid chönne lah näh im Betty‘s Burger Znacht z‘ässe. Betty‘s Burger ische Burgerlade us Noosa (woni mi Sprachufenthaut 2015 ha gmacht) und es hange viu schöni Erinnerige ah däm Lade, usserdäm si d‘Burger dert würklech top! 😄

    Derna bini müed und zfride is Bett und hüt Vormittag geits richtig Bondi Beach.

    See you 🏄‍♀️    もっと詳しく

    翻訳をご覧ください
  • Kelly Jossin a land down under旅行者
    1

    Coogee to Bondi Coastal Walk

    2024年6月11日, オーストラリア ⋅ ☁️ 16 °C

    Im Hostel wird jede Zistig abote, dasme mitere Gruppe dr Coogee to Bondi Coastal Walk cha mache. Da ig dä sowieso uf mire to do Liste ha gha hani dänkt why not; de chani mau wieder chli small talke. 😂 Es isch zwar spannend immer neui Lüt z‘träffe, aber weme niene lang isch de chuntme hüfig nid über die „Where are you from? Where are you going next?“ Gspräch use.

    Uf jedefau simer ca. am 10:30h los und im YHA Central no meh Lüt gah abhole und hei vo dert us dr Bus richtig Coogee gno. Vo dert simer ar Küste nah entlang bis nach Bondi Beach gloffe und ungerwägs ah 4 verschidene Stränd verbi cho. Mir hei ungerwägs sogar mehrmaus Wale vo wittem gseh. 😍 Aktuell isch in Sydney Whale Watching Zyt; mä gseht viu Wale wo nordwärts ungerwägs si i wermeri Gwässer.

    Am Bronte Beach hei mir ä chlini Pouse gmacht und öpis gässe und nach ca. 2.5h am berüehmte Bondi Beach ahcho.

    Dert hei mir üs verabschiedet und ig ha dr Bus gno nach Bondi Junction, bi dert nochli dürs Viertu gspaziert u när mitem Zug wieder richtig City gfahre. Zrüg im Zentrum bini via Darling Harbour zu mim Hostel gloffe und ha mi nochli erhout. Am Aabe bini nomau use uf Ässenssuechi. Am Hafe hets äs grosses Food Festival wos feini italienischi Pasta und „Waffle Sticks“ het gäh - tiptop gsi. 🍝    もっと詳しく

    翻訳をご覧ください
  • Kelly Jossin a land down under旅行者

    Manly Beach

    2024年6月12日, オーストラリア ⋅ 🌙 11 °C

    Hüt Vormittag bini nach Manly gfahre, ds isch ä angere berüehmte Stadtteil vo Sydney wome vom Circular Quay us innert 30 Minute miter Fähre erreicht.
    Es isch es mega härzigs Örtli mit chline Lädeli, Restaurants und Cafés und natürlech dr schön Manly Strand. Es isch zwar mega schön sunnig gsi aber leider 1. nid so warm und 2. meeega windig drum hets leider ke Strandtag gäh.

    Ig bi de eifach chli am Strand nah gspaziert, ha chli glädelet und bi irgendwenn wieder mit dr Fähre zrüggfahre. Zrüg ir City bini no witeri Souveniers ga ichoufe wöui vor mire Abreis eigentlech nümme mega viu Zyt ha richtig it Stadt z‘gah. När bini auess dürt Stadt bis zur Central Station gloffe wöui ha realisiert dasi irgendwie no gar nie so richtig im Zetrum bi gsi sitti hie bi, ig finge aber z‘Gebiet ume Hafe ume isch viu viu sehenswerter aus z‘eigenteche Zentrum.

    Ig bi aber vom viele loufe rächt kaputt gsi und has de speter nochli im Hostel chillt bevori wieder öpis bi ga ässe. Iz bini scho im Bett und parat fürne Usflug morn woni mi scho lang druf fröie! 🤩    もっと詳しく

    翻訳をご覧ください
  • Kelly Jossin a land down under旅行者
    Jasper
    Jonahthree sisters

    Blue Mountains National Park

    2024年6月13日, オーストラリア ⋅ ☁️ 12 °C

    Dr Usflug zu dä Blue Mountains hani eigentlech scho sit 2015 ufem Programm, denn bini z‘letst mau in Sydney gsi und ha die Tour leider müesse absäge, wöu mini Reisebegleitig is Spitau het müesse.

    Drum ischs ize ändlech sowit gsi und ig ha chli recherchiert und bi uft Tour vo „Picture me Sydney“ gstosse. Sie biete ä Tour ire Chligruppe ah mit max. 10 Lüt und vermiide die typische Touritraps. Ig bi hüt näbstem Guide no mitere Familie us Las Vegas ungerwägs gsi.

    Hüt Morge am 10i bini vom Craig abghout worde und dr erst Haut isch ä chlini Farm chli usserhaub vo Sydney gsi und fasch chli mis Highlight, dert heimer nämlech dörfe dr Koala Jasper und si Brüetsch Jonah bsueche, fötele und strichele. Und für die wos nid wüsse; ig liiiiebe Koalas. 😍

    Vo dert us ischs witergange ines typisch australischs „Pie Restaurant“, ig bi eigentlich nid soo Fan vo dene Meatpies wos oh in England überau git aber dä Feta & Spinat Pie isch ächt super gsi.

    Nachem Mittagässe simer de när zu de Blue Mountains gange und hei ä chlini Wanderig oder wieme in Australie würd säge ä Bush Walk gmacht zumne Wasserfall und hei t‘Ussicht gnosse. D‘Blue Mountains heisse übrigens Blue Mountains wöu die viele Eukalyptus Böim ätherischi Öl düe usdünste und dür das ä bläuliche Näbu entsteit. Es isch zwar rächt früsch (10 Grad) gsi, aber derfür hets fasch keni Lüt gha, im Summer ischs nämlech hie rächt überloffe.

    Nach üsem Bush Walk simer zum berüehmtiste Lookout ide Blue Mountaind wome die „three sisters“ gseht. Eigentlech hättme dert söue perfekts Sunneungergsangsliecht ha, leider het z Wätter aber nid mitgspiut. Derfür hei mir no äs paar Kakadus gseh wasi super cool ha gfunge, so öpis gsehtme bi üs schliesslech nid eifach so. 😄

    Dr Craig het üs ungerwägs mega viu Spannends übert Blue Mountains, Sydney und Australie augemein verzeut und ds isch mega interessant gsi und ig ha viu Neus glehrt. Mir hei när de no imne Pub Znacht gässe und si wieder zrüg it Stadt gfahre.

    Morn flügi wieder zrüg id Schwiz, aber weni Glück ha passiert vorhär no öpis cools…    もっと詳しく

    翻訳をご覧ください
  • Kelly Jossin a land down under旅行者

    Whale Watching EXTREME

    2024年6月14日, オーストラリア ⋅ ☁️ 11 °C

    Ursprünglich hani mini Whale Watching Tour scho vor laaangem für am Donstig buecht, die isch när aber wäge Personalmangel abgseit worde und ig ha ufe Mittwuch verschobe. Am Zistigaabe hani när es Mail becho, dases abgseit wird wägem Wätter. Ig ha när scho Angst gha dasis nümme cha mache wöui für am Donstig scho ä angeri Tour buecht ha gha. Ig ha när chli recherchiert und usegfunge dass ä angere Abieter ä Tour am Fritigmorge am 08:00 abietet u ds het no grad inepasst vor mim Rückflug.

    Dr Abieter heisst Ocean Extreme und es isch würklech ä sehr extremi Erfahrig gsi. 😂 Gester hani äs SMS becho dass sie vilech müesse absäge wägem Wätter und ig ha scho dänkt es söus äuä nid si mitem Whale Watching. Weni aber nüt ghöre de fingts statt und so bini uf die 7:30 zum Hafe gange. Es het gheisse mä söu sech warm alege u drum hani es Shirt, ä Pulli, es Jäggli und ä Daunejagge anne gha und ha vo ihne zuesätzlech nomau ä Jagge übercho, ig ha auso VIU anne gha. Zur Erinnerig, in Sydney wirds im Winter oh chaut, aktuell vilech so 12 Grad.

    Uf jedefau simer de mit däm fancy Schluchboot usegfahre und es isch VERY bumpy gsi, ds machtmer zwar schlächt-wärde-mässig nid so viu us aber teilswis ischs auso rächt beängstigend gsi. 😂 Z‘Highlight vore Whale Watching Tour isch we sie „breache“, was so viu heisst wie dürbräche, auso we sie usem Wasser gumpe. Es isch nid ganz klar wieso dass Buckelwale ds mache, es wird agno us Fröid, zum sech putze und zur Kommunikation. Ig has rächt sympathisch gfunge, dass sie ds us purer Fröid mache. 😊 Usserdäm si Buckelwale sehr neugierig und gärn um Boot ume. Mir hei ganz knapp ä double breach (2 Wale glichzytig!) gseh aber leider nur grad bim härefahre und vo rächt wit wäg. Mir hei zwar probiert z‘breaching z‘manifestiere aber es het leider nid klappt. 😂 Z‘uf und abtouche isch aber ou sehr beidruckend gsi und teilwis heimer 4 Wale glichzytig gseh. Mä gseht t‘Wale aktuell in Sydney wöu sie ufem wäg i Norde si wos wermer isch und im australische Summer göh sie de wieder richtig Süde id Antarktis, denn sie si aber witer wäg vom Festland u drum gseht me se ize im Winter besser.

    Ä Gruppe vo Wale nennt me (uf englisch) übrigens ä „Pod“, mir si auso immer uf dr Suechi gsi nachemne pod of whales. 😄

    Irgendwenn ischs aber rächt ungmüetlech worde und äs het sogar no afah rägne, dä näb mir het de irgendwenn chli ä angeri Gsichtsfarb gha…

    Nach knapp 2h simer de wieder zrüg am sichere Land gsi und dr eint oder anger isch sicher froh drum gsi. Ig bi zwar pflotschnass u düregfrore gsi aber glich mega froh hets stattgfunge u hani die schöne Tier so nach dörfe erläbe und es isch ä super Abschluss vo mire Reis gsi. 😍    もっと詳しく

    翻訳をご覧ください
  • Kelly Jossin a land down under旅行者

    Home Sweet Home

    2024年6月15日, スイス ⋅ ⛅ 16 °C

    Direkt nachem Whale Watching hani mi umzoge und es Uber ah Flughafe bsteut, dert bini viu z‘früeh gsi wöui mega schnäu bi düre cho, aber ha när immerhin no d‘Annähmlechkeite vor Business Lounge chönne gniesse.

    Ufem erste Flughafe hani probiert nid z‘pfuse was mit ässe, läse und Fium luege rächt guet isch gange, es si immerhin oh nur 8h gsi was no okay isch gsi.

    Z‘Hongkong hani de gäbig Zyt gha zum umstige und ha mi scho druf gfröit dasi ufem nächste Flug ändlech cha schlafe. Z‘chice 3-Gang-Menü hani de das mau ussegla wöui scho ufem letste Flug einisch Zmittag u einisch Znacht ha gässe und z „light dinner“ isch ä Cheese Burger gsi. 😂 Dä Flug isch 12.5h gange aber da ig wieder Business ha dörfe flüge hani sehr guet paar Stung chönne schlafe und bi när am Morge am 05:00 zum Zmorge gweckt worde (sie wecke di genau denn we sie z‘Morge scho am serviere si, ä huere Stress weme no grad im Töifschlaf isch gsi 😂).

    Ufem Rückflug hani leider no via Frankfurt müesse ga chere, ha dänkt sig ja kes Problem aber äs isch scho chli müehsam gsi… Ig bi ca. am 07:00 glandet und am 07:20 het z Boarding uf Züri agfange. Ig ha dänkt we mir die Verbindig so verchouft wirds söts öpe kes Problem si mit umstige aber ig ha müesse z‘Terminal wächsle (inkl. Skytrain), nomau dür Gepäck- und Passkontrolle und düre haub Flughafe sekle. Natürlech heisi de mis Handgepäck ono usegno und d’Schlange ar Passkontrolle isch RIESIG gsi. Dank chli füredrängle und uf Mitleid mache zwüsche drin hets aber glängt und ig ha ufem Flug vo Frankfurt nach Züri mis 2. Zmorge gnosse.

    Woni bi glandet isch mir eigentlech scho klar gsi, dases mis Gepäck i dere churze Zyt niemaus i nächst Flüger het gschafft, ig bi aber glich as Gepäckband ga warte. Es isch de würklech nüt worde u so hani mis Gepäck us vermisst gmäudet. Das isch üs nach Kambodscha scho passiert wägeme knappe Aschluss und es isch mega schnäu nachegliefert worde, drum bini nachem erste gnärvt si zueversichtlech und ha immerhin scho dr Bscheid becho, dass sies hei gfunge.

    Iz bini im Zug hei und fröie mi nach chli meh aus 3 Wuche i 10 verschiedene Ungerkünft und nach insgesamt 10 (!) Flüg uf mis eigete Bett, bir nächste Reis gits definitiv de chli meh slow travel. 😊    もっと詳しく

    翻訳をご覧ください
    旅行の終了
    2024年6月15日
  • 2025© FindPenguins
  • ホーム
  • 当社について
  • グループ追跡
  • プレス
  • 規約
  • プライバシー & Cookies
  • ヘルプセンター
  • 印象