Baden - Selfoss eifach via Grindavik

Wie ihr ih dem Post scho gsehnd, ja d‘Julia und ich hend nah Ferie und das trotzdene 2 Mönet wommer weg gsi sind. Drum isch es hüt am 1 mit em Zug richtig Flughafe ZRH gange. Schnell bim Schalter euses Gepäck wo mer teiled ufgeh und den dur d‘Sicherheitskontrolle. Wie ihrs scho chönd ahne isch Glichgwicht vo Kleider vo mir ih dem einzelne Gepäckstück wommer teiled ned glich gross wie de vode Julia. Ide Bar nach de Kontrolle hemmer eus den en Aperol Spritz mit Ussicht uf de Flughafe gönnt. Spöter simmer den zum Gate und nah am Otto Walkes verbi glofe. Pünktlich hemmer chöne Boarde und s‘Flugzüg vode Icelandair isch halb leer gsi. Nachem Start hemmer den mit erschrecke müsse feststelle das vor eus Zwei ganz fäscht Blähige gha hend. Es sind immer wieder so Welle cho wommer hed müsse dus T-Shirt schnuffe das mers überlebt. Am 18:50 simmer glanded in Keflavik und eigentlich wär 2h spöter gsi weg de Zitverschiebig. Ide Ahkunftshalle hemmer den ide Autovermitig ahglütet das eus chömed go hole zum Mietauto entgege neh. Ih dene 30 min hed den d‘Julia d‘Bewertige vo dene checkt und omg die zocked alli ab. Dementsprechend viel Fotis und Videos hemmer bide übergab gmacht ned das eus irgend en Chrebel chönd verrechne. Chum losgfahre isch zum glück au nah die letschti Fehlermeldig weg und mir sind richtig Grindavik gfahre. Das isch de Ort wo d‘Erde ufbroche isch und Hüsser mit Lava verschütet worde sind. Sehr spanned für mich da ich scho 4 Dokus vo dem Ort gluegt han. Nach witere 1h fahrt simmer den im Hotel ahcho. Nachdem ich ade Rezeption min Name gseid han, han ich eifach de Schlüssel id Hand drückt becho ohni ID oder Kreditkarte zeige, komisch für mich aber die vertraued da eifach de Lüt. Nachen Schwefelgschmakschock im Bad isch de Tag au scho ume gsi.Read more