Wale & Delfine in Husavik

Hüt am Morge simmer ih eusem MikroTinyHouse ufgwacht. So guet gschlafe wie no nie wills da absolut ruhig isch und mer ned de Lärm vo Bade ghöred. So simmer am Morge früher los gfahre will mer hüt wieder en riesigi Strecki vor eus gha. Ersti Halt isch de Ort vo eusem Z‘Morge gsi. Und zwar heds en wunderschöne Ussichtpunkt gha wo mer den euses Müesli wie im Camper verusse gässe hend. Churzi Zit spöter isch den au scho de Nebel und de Rege uftaucht wo eus ziemli de ganz Tag begleitet hend. Ebefalls im Rege hemmer au 3 Schöfli uf de Strass gseh wo versucht hend nach Esse z’bettle ihdems z‘mitts uf de Fahrbahn gstande send. Churzi Zit spöter hemmer den au scho euse Zwoiti Stopp erreicht und zwar de Godafoss Wasserfall. Churz us em Auto usegsprunge alles abglofe Fotis und Selfis gmacht und den hets au scho weder gheisse zum nächste Stopp Dettifos Wasserfall, was eine vode grösste vo Europa sötti sih. Uf em Weg dete hi hemmer den nah ah Schwefelfelder ahghalte wo uf em Weg gsi sind. In Dettifos ahcho hemmer schnell gmerkt das vor luter Nebel de Wasserfall ned emal sichtbar wird si drum hemmer eus den entschiede grad zum Hotel vode 3te Nacht z‘Fahre. In Husavik ahcho hemmer den nah 2h müsse Todschlah will eusi Whalewatching Tour erst am 6i am abig gstartet isch. So simmer churzerhand in es Resti wos au es EurovisionSongMuseum gha hed go 2 Bier und 2 Aperol trinke. Pris für die 4 Getränk 72 Fr. Holymoly türer wie in Züri. Mit de Ihstellig mir hends mir gends simmer den zu eusere Waltour. Dete ahcho heds gheisse Overall, Regemantel und Schwimmweste montiere. Verchleidet wie zwoi Pilone simmer den ufs Schnellbot und zäme mit zwoi Amis und ere italienische Familie simmer ufs Meer usegfahre. Nach 15 Minute us minere sicht geilstem Wellegang heds den d‘Muetter vode italienische Familie gna und sie hed den Fisch gfüettered. Nachdem mer sie den namal 15 min hend müsse zum Hafe zruggfahre heds den gheis Vollgas. Bi Strömende Rege simmer den 30min mit Vollgas use gfahre. De rege isch so unahgnehm gsi das mer chum öppis gseh hed. Duse ahcho hed den d‘Julia behauptet das mer kein einzige Wal gsehnd. Plötzli isch euse Bootsführer den Vollgas in en Richtig gfahre und siehe da de ersti Buckelwal. Mir hend den nah 3 witeri gseh und au öppe 5 Delfin wo wie so Talahons de Wal belästigt hend. Delfin sind den wie uf Droge us em Wasser jumpd und hend en Show abgliefered. Pflotsch nass und duregfrohre simmer den weder zrug in Hafe gfahre. Dete ahcho hemmer den nah imene Resti öppis gesse und den isch de Tag au weder ume gsi.Read more