Likely…

Hüt am Morge immer no ke Strom. Zum Glück hei mir ä grosse Griu, Uf däm chame fasch aues mache, o ds Zmorge.

Üse hütig Usflug isch dür ds Beaver Valley nach Likley gange. Chedar Point Provincial Park isch ds Ziu gsi. Teuwies wieder ä houprigi Aglägeheit.

Ungerwägs heimer ä Haut bim Bullion Pit Lookout gmacht.
Vo der het me ä gueti Usicht uf Bullion Gruebe.
Die riesigi Gruebe isch zwüsche 1892 u 1942 dür hydroulische Abbau entstande. Mit höchem Druck isch Wasser i Feus/Stei sprützt worde.
Die Bullion-Gruebe isch ä mau aus die gröschti hydroulischi „Goud-Seifemine bezeichnet worde.
Di isch über 3 km läng, 245 m breit u über 120 m tief. Bis 1942 het die Gruebe über 218 Mio Dollar Goud härgä. Im 1942 isch die Gruebe stiu gleit worde, wiu wäge diverse neue Vorschrifte u Gsetz, die ganzi Förderig ztür wär worde.

Nach däm Abstächer si mir du zum Chedar Point Provincial Park gfahre. Ä schöne Provicial Park am Ändi vom Quesnel Lake.
Dert hets o ä Dampf-Bagger vom Bullion Pit gha. Idrückläch was die i dere Zyt härebracht hei.

Äs het langsam Durscht gä u mir si nach Likley Lake side. Ds Likely Lodge Restaurant het zue gha.
So simer haut i General Store ga Getänk u öppis zum Knabbere ga hole u ufem Terässli vorem Store die Sache trunke u gässe.

Zrügg gfahre simer du nid dür ds Beaver Valley sondern über Big Lake.
Am 4 pm simer wieder im Carpe Diem acho u zum Glück hets wieder Strom gha.
Warum mir ke Strom hei gha, de morn.

Am 9 Ougust 2023 bi ig o Likely gsi!

Übrigens:
Dr Quesnel-Lake isch 266 Quadratkilometer gross u het ä Tiefi vo über 500 Meter. Är isch der grösst Fijord-See uf dr Wäut. (dr Vierwaudstädter-See het ä Fläche vo 114 Quadratkilometer u ä Tiefi vo 214 m)Read more