Vorbereite….

Üse Ufenthaut hie ds Horsefly geit langsam z Änd.
Letschti Vorbereitige hei mir hüt gmacht.
Am Morge hets no grägnet u so hets üs nid pressiert. D Martina u Brigitte hei gwöschet.
Gäge Mittag isch du d Sunne cho u Urs u ig hei dr Stei/Sang, wo no ir Pickup Box isch gsi, wieder a si aut Ort bracht.
Wo dr Pickup entlade isch gsi, si d Froue no uf Horsefly i Clark‘s Store ga kömerle.
Ungerdesse hei Urs u i am Subaru Pneu ufpumpet.
Die verlüre Leider immer chli Luft.

Nach dere Püetz hei mir die feine Sandwich wo Brigitte u d Martina gmacht hei, gnüsslech gässe.

Dr Rasemäiher het o no äs Facelifting nötig gha.

Äs het no ä Lampe, wo d Chäuerstäge sött belüchte, wo nid funktioniert. Ha scho mau probiert das Glas abdschrube,. Äs isch ä chli tricky u i ha Angscht gha das Glas z versieche.
Urs het du meh Muet gha u so hei mir die Bire chöne wächsle.

Ir Chuchi hets ir Liechtabdeckig fang ä cheibe viu Flöige, Mugge u schüsch so Viecher gha. Die heimer o no abgno u itz gsehts wieder richtig schön us.

Am Abe si mir no bi Esther u Beat zum Znacht iglade gsi. Feini Spare Ribs u Pork Belly im Smoker het dr Beat gmacht u Härdöpfugmües ir Alufolile vom Griu. I säge euch,, nid nume delicious sondern sensationeu isch das Ässe gsi. So gueti Spare Rips u Pork Belly ha ig no nie gha. Merci Esther u Beat für das Ässe u dä gmüetläch Abe.

No wägem Stromusfau, Wägem Gwitter vo geschter isch ä Boum uf Leitig gheit u het die abegrisse. Wiu die Leitig übere Horsfley River geit isch o die angeri Site vom Fluss beiträchtiget gsi.
Die Kabu hei sich o verhedderet.
d „Wasserspezialischte“ vo BC Hydro hei zersch müesse cho u wiu uf üsere Site dr Zuegang zum Stormmascht schlächt isch gsi isch d Flickerei so lang gange. 23 Stung söu uf üsere Site dr Stromusfau duret ha.

Übrigens:
Geschter wo mir dür ds Beaver Valley gfare si hei mir no ä Bär u ä Wouf gseh. Si aber z langsam gsi zum Fotografiere.

Dänket dra, d Antworte vom Wettbewärb vom Dsischtig, 15. Juli sött i bis am Sunntig 23.59 pm Pacific Time ha. Das isch ir Schwiz am Mäntig Morge, 21. Juli, knapp vor de Nünie.
Antworte uf WhatsApp 079 828 02 56 oder hie aus Kommentar.Read more