Death Road

Nochdem mer überall gäse hend, dass mer unbedingt Death Road mit em Velo söllid mache, hemmer das au in Agriff gnoh.

D Rhianna und de Rob wo mer uf de Uyuni Tour kenneglernt hend, sind au gad in La Paz gsie und au mitcho.
Mit eme Bus simmer uf 4800 m ufä gfahre worde. Vo döttä simmer dennä 3 h mit em Mountainbike durab gfahre bis uf 1200m. Zersch über diä normali Autostross in alpiner Umgebig. Noch so 45 min und nochdem d Linda sich s fancy Velo vom Guide gschnorret het, simmer uf d "Death Road" abbogä. Diä isch vo Paraguanische Kriegsgfangnä baut worde und bim Bau sind au sehr viel Lüt gstorbe. Da het sind Teil zum Name Death Road bitreit. Susch isch sie frühner hald au diä einzig verbindig gsie vom Dschungel is Hochland. Sie isch jetzt nöd sonderlich breit und guet gsicheret. Drum sind dennä au bis zu 400 Persone pro Johr gstorbe. En witere Teil wieso sie Death Road heisst. Sit diä Stross für de Normalverkehr gsperrt isch und hauptsächlich Velos unterwegs sind, isch sie recht sicher. Ide letschte 15 Johr sind "nur" circa 20 Persone verunglückt.
Uf de death road hets dennä au schö gholpperet und mer hets ide Handglenk chli gspürrt. Währed de nögschte 2 stund isch es dennä immer füächter und wärmer worde bis mer ide Vorstufe vom Boliviabische Urwald acho sind. Döttä simmer denn noh go bädelä bevors mit em Bus zrug noch La Paz gange isch.Read more