Pico Austria

Mer hend la Paz am Samschtig morge verloh mit em Janosch. De Janosch het jetzt au wieder funktionierendi Schlösser und en neuä Rückspiegel. Google maps het üs dennä uf direktem Weg vo la Paz noch el Alto gschickt. Mässig gueti Idee gsie, irgendwenn isch es dennä au üs z Steil worde, wo de Stiegigswinkel öbbe 65° gsi isch. Mer hend dennä Google maps ignoriert und sind mit Umweg weniger steil in el Alto a cho. Döttä isch wiedr mol völliges Chaos gsie. Isch denn au no en fluechende Bolivianer verbi cho, wo gmain het mer segged hinderä grollt und hend sis Auto touchiert. Mer hend ehm dennä 50 BOB geh und es isch guet gsie. Obwohl i de Meinig bin, viellicht fahr doch eifach nöd uf 5 cm uf nögscht mol.
Mer hend üs dennä vorgnoh zum uf em Weg zum Pico Austria noh z tanke. Ja nei, seb goht nöd. Niemert wot dir Diesel verkaufe. Diesel isch subventioniert und nur Bolivianer:innä bechömmed dä... Super lösig für Touriste. Mer hend dennä mit em Kannister irgendwo imne Hüsli nebt de Tankstell noh 20 l becho. Btw nai mer cha de Tankstellä so viel Geld abüte wiät wotsch, sie verkaufed nix.

Mer sind dennä mit halbvollem Tank bim trailhead vom Pico Austria a cho (uf 4400m). Am nögschte Tag simmer am 7:00 los glofe. Mega schöni alpini Gegend und mer sind tip top vorwärts cho. So geg diä 10:30 simmer dennä ade 5000m Grenze verbi. So ab 5200m hanni au spöteschtens gmerkt, dass mer chli höcher sind als de Alpstai. D Linda het d Höchi weniger gspürt aber au nüm sonderlich Happy usgseh uf de letschte paar Meter. Mer hend aber duräzoge und sind uf 5327m a cho. Vo döttä simmer dennä wieder einiges schneller diä 1000 Höhemeter zrug zum Janosch glofe. Nocher simmer dennä zrug noch la Paz.
Diesel hets au damol kai geh. Däfür wiedr Verkehrs-madness in en Alto. Au was tolls. S Highlight isch gsie, wo es chlises rots Büsli vo rechts eifach uf üsi Spur druckt. Janosch het da mol aber kai Luscht cha zum nohgeh. Diä zwei Autos sind dennä liecht verkeilt gsie. Am Janosch hets nünt gmacht bzw hetter scho so viiel bühlä dass mers eh nöd würed merke. S rote Büsli isch weniger guet wegcho. Dem sini Site isch jetzt chli idruckt und meh wiess als rot. Janosch 1, rotes Büsli 0:)

Jetzt simmer wieder in la Paz und sind froh dass mer dennä nur noh 1 mol us derä Stadt mönd fahre.Read more