Hoteltag🌞

Hit hemmer so ziemli dä ganz Tag am Hotel verbracht. Diä warmä Sunnästrahlä hend ys nachem Badä im Pool schnäll uifgwärmt & scho fir bruinii Huit gsorgt🤩. Am Namitag hed ufem Hotelareal ä Märt stattgfundä, det simmer durägschländeret & hiäsigs probiärt - diä frischä Frücht sind sehr lecker gsi. Am 6i hemmer mit ysnä Frindä Katy & Mike abgmacht zum go schnorchlä. Ja das isch äs absoluts Highlight gsi. Sie hend ys bestens uisgristet mit Lampä, Neoprenahzüg, Brillä & Flossä. So hemmer ys ufä Wääg is Meer uisä gmacht & vieli scheeni Fisch gsi. I dä Nacht chemid sehr viel Mantarochä zum Liächt. So sinds vor ysnä Aigä durägschwummä & miär hend sie sogar chenä ahlängä. Wenn diä uf eim zuäzschwimmä chemid ischs im erstä Momänt chli unheimlich, diä sind nämlich bis zu 7 Meter breit. Wo mr de ä ca. 2.5 Meter langä Hai gseh hend hemmer scho chli Angst gha. Dä Mike hed jedoch scho ziemli viel Erfahrig & hed ys chenä beruhigä. Zrugg a Land hemmer ys vo dänä beidnä miässä verabschiedä, sie wärdid ys definitiv fählä. Fotis vo däm Schnorchelabentiir gids leider keini will GoPro de Geist uifgää hed. Isch aber halb so schlimm, so hemmers vollkommä chenä gniässä & wärdids nid so schnäll wieder vergässä. Ä Schwumm im Whirlpool hed ai hit Abig nid derfä fählä. Unvergässlichi Momänt hemmer uf Big Island derfä erläbä. Morä ziämer wiiters uf diä nechscht Inslä. Ez heissts aber erstmal nu Rucksack paackeen🤿🐠🌊🐚Read more