Delfinschwimmen🐬

Am Morgä am 6i isch hit dä Bus los gfahrä, zum Hafä im Westä vo dä Inslä. Det simmer ufs Boot umgstigä & sind los düsed. Um diä Ziit isches nu ziemli frisch gsi ufem Boot, s‘hed ai ziemli diä ganz Fahrt biz grägnet. So simmer wiit i Ozean uisä gfahrä. D‘Crew hed debii immer nach Delfinä gluägt. Als Ritual hemmer alli ä Bluämä ubercho, d’Hymne (oder epis ähnlichs) gsungä & de d’Bluämä uber Board griährt - das sell Glick bringä. Miär sind sicher epä ä Stund umänand gfahrä bis mr diä erstä Delfinä entdeckt hend. Äs sind epä um diä 15 gsi, sie hend ai d‘Babys debi gha die sind so härzig gsii😍 Delfinä sind sehr schnälli Tiär, drum sinds amä gschwind wieder fort gsi. Z‘Hawaii isch vom November bis April Walsaison. Diä nämid dä langi Wäg vo Alaska uf sich um hiä i dä Winterziit ihri Babys uf d‘Wält zbringä & sie grossziäh, diä hemmer hit leider nid gseh. Chli necher am Ufer hemmer amänä Riff halt gha & hend det chenä go schnorchlä, isch bis ez dä scheenschti Riff gsi🤩🐠🐡 S‘Boot hed nu diversi Wasseraktivitäte ahbotä wo sehr lustig gsi sind zum uisprobiärä & ys warm phaltä, wiä ä Rutschbahn, Paddle Board, Luftmatratze & nu meh. Dä Yuya (Fotograf) hed cooli Fotis ufem Boot wiä ai under Wasser gmacht, diä Fotis hemmer leider nunid ubercho..
Zrugg bim Hotel hemmer ys erstmal im Whirlpool miässä uifwärme. Am Namitag simmer numal chli dur d‘Stadt glufä, sind go käffälä & hend dä Volleyballer zuägluägt. Spannend hiä in O‘ahu isch, dass egal wiä wiäscht s‘Wätter durä Tag isch am Abig duäds immer uif & gid ä scheenä Sunnäundergang. Jedä Fritig gids äs Fürwärch, das hemmer ys natürlich nid chenä la entgah🎇 Spontan hemmer diä bekannti vo Alpnach glich nu troffä & dä Abig so lah uisklingä. Miär frääid ys morn mal wieder chli länger z‘schlafä😊 Czytaj więcej