Erste Touchtag und Pizza

Hüt hei mer ändlech üse erst Touchgang gha uf Coiba! Der Wecker het meeeega früech glüte (knapp vor de 6 😵‍💫, so früech stöh mer nid mau für z bügle uf... 🙈) aber es isch ja für ne guete Zwäck! Zersch e chlini Sterchig im Kafi und denn ab as Briefing ir Touchbasis. Z wichtigste isch schnäu verzellt und z Equipment zügig gfasset und so hocke mer nid viu speter im Boot richtig Coiba. Drü Touchgäng mache mer a däm Tag und zwüsche jedem Abtouche e stund Oberfächepouse a de schönste Stränd. Üsi nöii GoPro hei mer hüt noni derbi, drum gits vorerst nur Bilder vo de Stränd, Idrück vor Underwasserwält folge aber scho gli... Nach em touche hei mer no chli am Pool und uf üsere Sunneundergangs-Terrasse chillt und si de speter go Znacht ässe. Der Seafood isch richtig geil hie aber zur abwächslig darfs o mau öpis angers si, drum si mer hinech mau id Pizzeria um e Egge. Z Lokal isch mega härzig mit gmüetlichem Sound und d Pizzas us em Steiofe si sehr lecker. Zu üsere Überraschig louft plötzlech sogar no Züri West, jetz isch ou klar weli Nationalität der Restaurantbsitzer het... 🤣Leia mais