Nadine`s Geburtstag mit genialem Gschänk

Hüt isch üse dritt Touchtag und ar Nadine ihre Geburtstag! 🥳 z früeche Usfstah het sie nid so gfiiret aber was näh mer nid aus i chouf für üsi Lideschaft und wie sech no wird usestelle nid vergäbe...
Aber eis nach em angere, bi üsem erste Touchgang hüt hei mer under Wasser plötzlech es sehr luts Brumme ghört und starchi Vibratione gspürt. Was me aus Toucher guet kennt vo de Boot, wo jewils über üsne Chöpf hinwägdüse, aber hüt einiges stercher. Das mau isch aber wit u breit kes Boot z gse xi... wie mer de bir nächste Oberflächepouse hei erfahre het sech ganz ir Nechi vo üs es Ärdbebe ereignet 😳 krass, das hei mer o no nie erläbt...
Bi üsne Touchgäng hei mer wider viu Fischli, Haie und Seestärne gse. Da d Nadine und ig im Gägesatz zu de andere Toucher es paar Täg hie am touche si, hei mer chönne usläse weli Touchplätz mer we go mache. Für e dritt si mer wie scho die letschte zwe Täg a Wahoo Rock dert hets meistens Plankton-Wulche und die beste Chance öpis grössers z xe, under anderem Walhaie, was üs bis jetz vergönnt blibe isch. Bis jetz... die ersti haub Stund vom Touchgang isch no relativ ereignislos gsi, wo mer aber uf ca. 20 Meter ir gäube Planktonsuppe ghoket si schwümt plötzlich öpis grosses, wiis punktets düre! Üsi ersti Begägnig mit dere schöne Kreatur, nume churz und flüchtig aber was für es Erläbnis! Da die schüche Tier sech schnäu löh la vertribe het üs üse Guide, d Christina, ermahnt nach bim Felse z blibe und abzwarte, fillicht chunnt er ja nomau zrug? D Geduld het sech glohnt, nach es paar Minute isch er tatsächlech nomau uftoucht und über üsi Chöpf hinwäg gleiet! D Nadine het grad es paar Tränli verdrückt 🥹 und ou mir hets grad chli d Sprach verschlage 😲.
Für d Nadine het sech hüt e lang ghegte Troum erfüllt, was für es Geburigschänk! 🎉🥳🙌Read more