Day off ohni touche

Jede Tag drü Touchgäng go mache isch scho asträngend, drum hei mer üs hüt mau e chillout Tag gönnt. Mir hei der Tag merheitlich am, respektive im Pool verbracht und si zwüschine chli dür Santa Catalina flaniert. Näb der Hundefamilie, wo mer jede Morge uf em Wäg a Strand gse, hei mer am Strasseeand es Hüenernäscht mit Bibeli entdeckt. 🐥
D Chäre wärde hie z Bode gfahre. We zum Bispiel d Handbräms nüm geit isch das nid so schlimm. Me mues haut bim parkiere luege, das der Parkplatz gnue äbe isch... Apropos parkiere, das hei si scho no im Griff die Panamese. Millimetergnau wärde die Chläpf teilwis abgstellt 🤣
Für z Znacht hei mer üs e Tapas-Bar mit no guete Bewärtige usegsuecht. Grad ir nechi vo üsere Touchbasis sig das Lokal lut Google. Wo mer aber vor Ort achöme isch es verdächtig dunkel und es xet so gar nid nach Beiz us i däm Näbesträssli. Der Local wo entspannt am Strasserand hockt meint uf üses Nachefrage, dä Schuppe gäbs scho lang nüm... 🙈 zum Glück isch grad um e Egge d Tiki-Bar dert hei mer eh o dänkt chönnt me mau verbi (was mer aber wider verworfe hei, wiu üs d Bilder uf de Google Reviews nid so agmacht hei). Mit nid all zu grosse Erwartige si mer haut dert ine und si positiv überrascht worde. Burger und Pommes si tip top xi. Sogar d Resti-Hündin Magie cha dene Gricht chum widerstah und hockt während em ganze ässe näb üsem Tisch und wartet erwartigsvoll ob äch für sie o no öpis abfallt. 🥹Lue lisää