Nationalpark und Beer-Tasting

Für e richtigi Jungeltour het üs d Zit chli gfählt. Mir hei nid e ganze Tag wöue opfere für das und zuegä hei mer nach all däm Touche und Surfe o nüm ganz so früech möge der Wecker stelle. Aui die Tagestrips starte nämlich scho relativ früech... 🙈 Aber es git o zmitz ir Stadt e Nationalpark mit ere churze Wanderrundi. Perfekt auso für üse Churzufenthalt in Panama City!

Mir lö üs zum Bsuecherzäntrum bim Igang la fahre, wo mer der Itritt zahle und churz d Parkregle erklährt überchöme. Denn geits o scho los! Allerhand Tier söue i däm Park dehei si. Üses Ziel isch es Fultier, e Aff und e Tucan z entdecke 🧐. Nach paar Minute hei mer e Kolibri zwüsche de Äst gse düre schwire. Nid uf üsere Bucket List aber ou guet. Nah dis nah finde mer aber tatsächlich aui Tier wo mer hei wöue xe, we ou ziemli höch i de Böim obe... Z Fultier het sech chli wit uf d Äst usegla, plötzlich knackts und der Ast mit em Fultier dra knickt ab 😱 sie stürze no öpe ab, das machi ihne nüt, meint e andere Bsuecher wo o grad dert steit. Ok, aber mir hoffe glich das es nid abegheit...🦥 Zwüschine hets immer wider Ussichtspünkt wo me uf d Stadt abe gset. Isch scho no lustig wie die Wulchechratzer usem Jungel userage. Es Teichli hets o mit öpe tusig Wasserschildchrote drin und Eidechsli wo über z Wasser chöi sekle. Nach guet zwöiehalb Stund chöme mer wider bim Bsuecherzäntrum a, wo mer gstartet si.

Das Wandere ir tropische Hitz het üs chli durstig gmacht (mir hei o gfüehlt je es paar Liter verschwizt...). Da dr Nationalpark unwit vor Altstadt ligt, beschliesse mer nomau dert häre z ga. Es isch üs eh no e Cerveceria empfohle worde, wo me lokali Bier chönn degustiere. Z ideale Aschlussprogramm nach üsere Wanderig! Zum Tasting bstelle mer üs natürlech no öpis z biise und vom Bierfavorit es Halfpint. Salude!Baca lagi