Hrvatska - Kroatien

Nach de erste entspannte Täg si mir hüt mau chli aktiver gsi und hei üs für es Inselhopping per Schnällboot agmäldet. Träffpunkt isch am haubi 2 im Hafe vo Makarska. Mir wärde zersch i drü Gruppe à 10 Lüt ufteilt und bestige när mit üsem Captain z Böötli. Da mir z dritt si chöi mir uf em Rückbank grad hinger em Captain und sire Begleitig platz näh. Aus ersts peile mir d Insle Hvar a, dert hets e härzigi Bucht wo mer e erste Halt mache zum schnorchle. Nach guet 20 Min. geits o scho wider witer zur little Blue Cave, e chlini Höli wo me cha ine schwümme und wo dür z ifallende Sunneliecht blau erlüchtet wird. Aschliessend geits witer nach Jelsa, es chlises Hafedörfli uf Hvar. Dert hei mir e Stund zit zum umeflaniere und öpis trinke. Es het mega härzigi Gässli und ig shoppe mir wider mau es T-Shirt im ne abgfahrne Comic-/ Poster-Lade wo mir im Dörfli entdecke. 🙈 Nach em Sightseeing geits o scho wider witer uf znächste Inseli Zečevo wo die malerischi Blue Lagoon uf üs wartet. D sicht i däm Büchtli isch mega klar, ideali vorussetzige zum schnorchle und mit der GoPro paar föteli z mache. Dr letsch Spot uf üsere Tour isch d Studena Bay uf Brač. Da die Bucht chli i de Hügel ibettet isch und d Sunne scho nüm so höch steit isch es chli e schattige ufenthalt. Mir hüpfe zwar no hurti is Meer si aber ziemli schnäll wider dus. Bevors wider zrug nach Makarsks geit fahrt üs der Captain güetigerwis no es paar Meter us der Bucht a d Sunne damit mir üsvor der heifahrt no chli chöi ufwerme. Nach es paar Minute chunnt es zwöits Boot vo üsem Abieter und mir fahre zäme zrüg. Üsi zwöi Boot lifere sich es Chopf a Chopf Renne und versueche enand gägesitig azsprütze mit der Wasserverdrängig vom Boot. Zu üsem leidwäse het der ander Captain z bessere Händli, bim dritte Alouf schwappt e rise Wälle über üses Boot und mir si aui tropfnass... Mir si froh wo mer wider im Hafe achöme, schnäu zrug is Hotel, warm go dusche und trochni Sache alege... 🙈Leggi altro