Phnom Penh - museum, killing fields

Gester ahcho in phnom penh het hüt eine vo de deprimierendste täg ahgfange. Deprimierend nid wius üs schlecht geit oder mer ke lust hei, deprimierend wius hüt um d gschicht vo kambodscha gange isch. Genauer um d ziit zwüsche 1975 bis 1979. Unger grausamer herrschig si während dere zit über 3 millione, meh aus 1/3 vor bevölkerig, ermordet worde. Die zahle si vor auem us zwe gründ so höch: so hei lieber unschuldigi festgnoh aus dass "der feind" se vo inne zerstört, vo jedem wo umbrocht/gfange gno worde isch, hei si die restlechi familie o ihgsammlet wiu da die süsch rache chönnte weue.

Vorwarnig: wird brutali u grausami gschichte ha i de nächste zile.

Mir si toul sleng genozid museum gsi wo früecher mou e schuel gsi isch, nachher zum ne gfängnis u folterahlag isch worde, u hüt aus gedenkstett und museum dient. Zwüsche 12000 u 20000 kambodschaner u vereinzelti ussländer si i dem gfängnis mehrmous täglech gfolteret worde. Was früecher e pousehof mit chletterseili gsi isch, isch später zum ne ort worde wo unzähligi grausami tate vollzoge so worde. A de hingerem rücke verbundne arme si si a besagtem chletterplatz bis zur ohnmacht ufezoge worde, nur um wieder abegloh z werde um chopfsüber i grossi töpf mit de fäkalie vo de insasse gsteckt z werde. Um nur eis vo vielne szenarie z beschribe. Die wo ufgrund vor folter es (haut erfundnigs) gständis abgleit hei si mit lastwage zu de killing fields brocht worde, wo si i massegräber chautblüetig higrichtet worde si. Seubst babies si vo de rote khmer vor de müetere eifach am ne boum erschlage worde. Bi eim vo dene killing fielss simer hüt nachem museumsbsuech gsi. Hüt zeigt nur no es momument u z gedenkzentrum, was das mou für ne grausame ort isch gsi u waser für ne vergangeheit het.

Bsungers schockierend heimer gfunge, das das ganze grad mou 40 jahr her isch. Speziell isch o das das ganze vo kambodschaner gege kambodschaner statt gfunde het.

So lehrt me wieder z schetze wie guet das mes het u wieviu glück mer hei.Read more