New home, new standards

Ich hocke ez i mim Zimmer i minere Unterkunft direkt nebed de schuel. Das Student House het nume Platz für 8 Persone, wiiter une vom Gländ hets aber na e zweiti Unterkunft für ganzi 60 Persone. Ich han es Zimmer im Student House, das zmitzt ide Mitti. D Wänd sind sehr dünn, ich ghöre jedes Wort vo mine zwei Schwizer Zimmernachbarinne. Au die komisch Engländerin/Australierin wo eim d Hand nid git bim Hoi sege (bin mer schochli dumm vorcho woni ihre d Hand anegstreckt han und sie seit "sorry, I don't shake hands"), au dere ihres Lache über die langwiligst Make-up Sendig im Fernseh ghöri, als wür sie nebed mir hocke. Janu, zum Glück hanich en sehr tüüfe Schlaf, denn wird mi das scho nid stööre.
S Huus isch eher dreckig als suuber, das liit aber glaub dra, dass sie e noii Putzfrau münd iihstelle und drum i moment nid regelmässig putzt wird. Zum Glück binich nid heikel bi so sache, das hani wohl mine Eltere z verdanke.

Hüt binich zudem fascht de ganz Tag am Strand gsi. E langi Strass durapp mit eim Lade am nägste und überall wunderschöni Graffitis/Zeichnige ade Wand. Mer fühlt sich sofort wohl & sicher. De Strand da isch RIESIG! Und obwohls so en wunderschöne lange Strand isch, hets relativ wenig Lüüt gha. Is Wasser hani mi aber nanig traut, bi 23 Grad und eher starchem Wind, ischs mer also na z chalt gsi. Es absoluts Highlight isch de Sänger ade Strandwiese gsi, wo mich mitem Titel "no woman no cry" in Halbschlaf gsunge het. ☀️🌬💤🎵Read more