S letschte und Land Nr 15 vo eusere Tour

Da d Wettervorhersag ade Atlantikküste zimli mies worde isch und d Ines scho de Schlafsack het müese füreneh, hemmer eus denkt mir lueged mal wo dases na biz wärmer isch. Da d Temperature in Barcelona wiitus besser sind, hemmer eus entschiede über d Pyrenäe (sehr ihdrücklichi Landschaft!) uf Barcelona z fahre. De Michi wär a sim Geburi zwar lieber go Surfe aber janu mer cha nöd alles ha. In El Grado hemer welle go fein Znacht esse und mir sind natürli Pflichtbewusst am erschte Strasseschild in Richtig El Grado gfolgt. Dases dert es Fahrverbots schild gha het, irgendwas vo Vehiculo Touristico und es unter <2m breiti Schild gha het, het de Michi nöd so interessiert. Wenn da de Bus und co durechunnt, chömed mir da easy au dure. Es paar älteri Dame hend eus na schön platz gmacht und das het de Michi na bestätigt. Naja nach ca. 30 Meter het d Welt scho biz anderscht usgseh….. aber das wird ja nur die Stell (Foti) sie vo wo eng isch, das schaffed mer scho.
Leider falsch gedacht, es isch na enger worde. De Michi isch den mal usgstiige und go luege wie schlimm dases würkli na wird, d Ines het während dem tüüfeenstpannt im Auto gwartet 😅.
Nachdem de Michi d Lag abcheckt het, lächle mitem Dume gäge ufe zeigt het und die ältere Ladies na lachend irgendöpi zu ihm gseit hend, verstande heter natürli nix, isches den wiiter gange. Leider gits da kei Fotis meh aber irgendwie hemers mit ineklappte Ussespiegel und zwei Iheimische wo na biz gwunke hend doch dur das Gässli gschafft 😂.

In El Grado ahcho, hets den na de Geburichueche usem Supermärt für de Michi geh und mir hend eus zerscht mal vo dem Nervechtzel müese erhole.

Gässe hemmer den übrigens nöd dert und e normali Strass is Dorf hetis au geh 😄.

Pfuused hämer irgendwo und am nächste Tag isches uf de Camping Barcelona, wo übrigens nöd in Barcelona sondern in Matarò isch, gange.

Dert simmer am Abig mit de Velos na go zNachtesse und es het na en abentürliche Heiweg geh.

Fotis
- Pyrenäe
- Gässli in El Grado
- Geburi in El Grado
- Heiweg in Matarò

Memos a ois
- vlt. nöd eifach Fahre wemer d Strasseschilder nöd verstaht
- es isch amigs doch enger als dases usgseht
- In Katalanie stinkts fast überall nach Chuehmischt 🙈Read more