Eigentlich wäremer ez grad in Alaska oder Kanada… eigentlich… mer möched a beschtä druus! Hallo Europa ✋🏽
Currently traveling
  • Day82

    Annecy

    September 19 in France ⋅ 🌧 12 °C

    Und Los gaht „Teil 2“. Ab jetzt suechemer nochli d Sunne, d wärmi & de Strand…drum ab nach Frankich 🥳

    Oise erschti zwüschestop hemmer in Annecy war gno. Es heisst Annecy segi s Venedig vo Frankrich. Was au würkli stimmt! Die schöne Gässli & en riesige Markt hend eus überzoge. Au de See und d Landschaft möched luscht uf meh… nur ebe s Wätter. Irgendwie hämmer eus das anders vorgestellt 🧐 so verrägnet wie da simmer aso uf de ganze Reis no nie.
    Drum hemmer eus au bereits nach einer Nacht bim Gilbert uf em Camping wieder uf de Wäg richtig Sunne gmacht.

    Da mir uf de Strecki vo de Schwiiz nach Annecy ca. 20km ufere Mautstrass gfahre sind und für das frächi 10.- händ müsse zahle (mer gältet da in Frankrich als Camper 🤌🏽) hemmer eus entschiede d Mautstrasse zumfahre und defür d Landschaft chli meh z gnüsse. Mer hend ja Ziit 😁

    So simmer dänn ca. 3 Stund vo Bordeaux entfernt ines „all you can eat“ (and drink…) Restaurant und hend ois voll gfrässe 🤤 ächt kuuli idee gsi, hesch all dini Zuetate wod häsch wellä uf de Täller dah und denn am Choch übergäh, wos für dich dänn im Wok zuebereitet het.
    Chugelrund hemmer ois wieder in Karl gsetzt und sind no ca. 30min wiiter gschlafe und hend ois es Plätzli ame See gsuecht.

    Nach ere ruhige Nacht ischs denn am morge früeh wiiter gange… Motor starte rächts abbüge und häää?! Was um Himmelswille macht de Baum dah?! Offesichtlich doch nöd so e ruhigi Nacht gsi! Und heii, wo blibt entlich das schönä Wätter?!?
    … zum Glück isch d Strass au no nach links gange und mer hend oisi Tour wiiter chönä füehre… 🥳

    (Fotis: ab in Süde, Annecy, All you can eat, Übernachtigsplatz)

    Memo a ois:
    - verlah di nie uf de Wätterbricht
    - Ab jetzt heissts WC Papier nöd vergässe wännd ufs WC gasch… susch hesch denn id schissi glanget😂 mer sind ja schliesslich in Frankrich, da isch WC Papier nöd inkl. Uf em Camping, es isch ja schliesslich Gold wert (und sit em erste Lockdown no meh vergoldet worde 💩💰)
    Read more

    Chris Müller

    Ihr 2 cooli Type😘

    Family Watkins

    Did you move the tree?

    Family Watkins

    Also, please tell me that you are heading South???

     
  • Day80

    Uf em wäg id Schwiiz

    September 17 in Switzerland ⋅ ⛅ 16 °C

    Ja was gitts schöners we en Pass fahre… oder gad zwei oder drüü?

    Da mir eh scho länger plant gha hend (ja ab und zue planed au mir öbbis😆), das oisi Route über d Schwiiz nach Frankrich füehre wird hämmer dänkt, geil da chömmer dehei doch grad mal alläs eimal dure Wäsche. Da mir aber aktuell Homeless sind. Eusäs zweite dehei (Klosters) öbber anderem siis zweite dehei de Summer worde isch, eusäs dritte de hei (Winterthur) kei Tumbler het suechemer ois halt es 4ts dehei und ladet eus doch grad no zum znacht ih 😄
    So simmer dänn in Davos glandet. Aber zersch nomal zu dä Päss. Da ja de znacht würkli plant gsi isch und eusä usflug id Werkstatt nöd, hämmer no en vorige Tag gha. Ja und will mer doch gad i de nöchi sind und mer noni viel Alkohol uf eusärä Reis kauft hend 🙊 hämmer dänkt gömmer doch no ei Nacht uf Livingio.
    Für das hämmer aber zersch no möse übers Stilfserjoch fahre. Mit 2757m höchi die zweit höchsti asphaltierti Pass i de Alpe. Nach Livingio simmer no über de Bernina und dänn no über de Flüelä. (Jetzt wo mer ja wieder Brämschlötz händ müemmer die doch gad richtig ihfahre😉) D Ines het cheibe Spass gha säg ich euch. D Kaugummi packig isch läär gsi wo mer z Davos ahcho sind.

    Nachdem mer bi oisem lieblings Davoser oisi Wösch gwäsche hend (zum Tumbler gitts no es Memo…) simmer no fein zum Znacht ihglade worde. A dere stell: Danke nomal tuusig für d Gastfründschaft!

    Am nöchste Tag ischs denn heizue uf Winthi gange. De Karl hemmer vo de Souvenirs befreit und noi mit oisne (also am Michi sine) Surfsache packt. Am Abig simmer no mit zwei ganz liebe Mänsche eis go trinke. Mer hend sie sooo vermisst.
    Da mit mer nöd no meh Heiweh bechömed ischs am nöchste Tag au grad wieder wiiter gange. Ab uf Bern, s neuä Surfbrett vom Michi go hohle. (Bstellt hetts de Michi de Sparfuchs bereits scho i de Lofote in Österrich und die hends gratis id Schwiiz in Lade glieferet)

    Aber jetzt heissts definitv wieder, Tschüss Schwiiz und bis bald.

    (Fotis: Pässlifahre, Znachtässe in Livingio, Hallo Migros, Hallo Schwiiz, gib am Michi kei Konsole id Händ, hät ächt d Ines guet gschlafe i dem Göstezimmer?)

    Memo a ois:
    - mer sött vielicht nöd eifach druf vertraue ha das jede moderni Huushalt en Tumbler dehei hät und au das vorher abkläre 😅
    - Päss simmer die nöchste Wuchene definitiv gnueg gfahre
    - so lang hämmer d Paprika Chips vo Zweifel vermisst und jetzt wüssemer gar nöd öb mer sie no geil findet 🙈
    Read more

    Chris Müller

    coole Strecki mit em Töff😂

     
  • Day77

    Über s Timmelsjoch is Südtirol

    September 14 in Italy ⋅ ⛅ 19 °C

    Pleiten Pech und Pannen 2.0? Mir hoffeds nöd aber wer weiss…
    D Schlechtwetterfront isch leider au in Österrich ahcho und anstatt wie plant uf Serfaus z fahre hemmer eus fürs Südtirol, gnauer Meran entschiede. Über s Timmelsjoch, de Karl de arm Cheib het sich bis uf 2500m.ü.m möse ufekämpfe, wohi kämpfe übertribe isch er macht das wie die ganz Reis scho üssert souverän, mängisch chunt zwar biz viel schwarz zum Uspuff uus aber janu, öppe Euro 0 halt 🤷‍♂️
    Vo 2500m.ü.m isches denüber 2000hm durab is Dorf St. Martin im Passeier gange. Dert hemmer als Nachtlager en schöne Parkplatz mit WC und eme Spielplatz gfunde.

    Am nächste Tag isches na biz wiiter durab uf Meran, ca. 350m.ü.m gange. Dert simmer beid biz überrascht gsi vo dere Stadt. Einersiits simmer überrascht gsi wie viel alti lüüt dases da het, Kanare 2.0?, anderersiits het eus au d Stadt selber bzw. au die unmittelbar Natur sehr beiidruckt. Das in Meran nöd würkli e Übernachtigsmöglicht geh bzw. de Einzig Camping 65 Euro kostet het, hemmer eus en Stellplatz ca. 40min entfernt und ide Berge usgsuecht. Nach ungefähr 1km, wobi de Karl dir letschte 500m bim Bremse biz komischi Grüsch vo sich geh het, isch de Michi den ad Tankstell gfahre. Bremse vorne kontrolliert, tiptop, er het die ja irgendwo uf de Reis die Chlötz mal kontrolliert. Bremse hinde links ahglueget: ohhhh Metall uf Metall….. aber irgendwie isch da s Gfühl ume gsii, daser die doch au ahglueget het.

    Ja guet so chan d Reis nöd wiiter gah aso mal e Werkstatt gsuecht und den simmer zur Freud vo de Italiener mit 20-30km/h, de Warnblinkahlag und so guet wie ohni Bremse dert ane gschliiche. Wemer den doch mal hend möse Bremse, hets de Ines gad im Herze wehtah. Die Erscht Werkstatt het leider kei ziit gha, eus aber en guete Tip geh wer chönnti Ziit ha. Zur Sicherheit simmer mal dert ane gloffe und tatsächlich er chönnts nächste Tag mache. Jetzt isch nur na d Frag wo schlafe…. Aso zmitz ide City uf en grosse Parkplatz gfahre und dert Rdy fürd d Nacht gmacht. Den na go Znachtesse und bevor mer uselaufed ja no ufs WC, de Parkplatz het nämli keis…. Ufd d Details gömmer da jetzt da nöd druf ih xD

    Am Morge denn de Karl id Werkstatt bracht und ab id Therme Meran. Mir hend extra uf die 9i es Ticket inkl. Früehstück reserviert. S Früehstück z finde het sich als gar nöd sooo eifach usegstellt. Mir bereits ide Therme s Früehstück irgendwie usserhalb, hemmer na müesse über „Alarmgsichereti“ Drehchrüz gumpe aber irgendwie het das niemer interessiert 🤷‍♂️.
    S Zmorge und de Tag isch perfekt gsii und am 5i hemer den de Karl wieder chönne go hole.

    Usechoo isch:
    Brems hinde links Metall uf Metall.
    Hinde rechts d Bremschlötz na ca. 6mm.

    Memo ah Ois:
    - Immer all Bremschlötz ahluege
    - Planig isch alles, wenn scho e Panne den im Südtirol wos dütsch chönd unds 28Grad isch
    - Wemer 50i sind gömer wieder mal uf Meran und gebed eus uf jedefall das Zmorge namal
    - Es WC im Bus wär amigs scho ken Seich

    Fotis:
    - Timmelsjoch
    - Schlafplatz „Chinderspielplatz“
    - Meran
    - Therme inkl. Zmorge
    - de Bremschlotz…..
    Read more

  • Day75

    Sölden

    September 12 in Austria ⋅ ⛅ 14 °C

    Pleite Pech und Pannen… so hät öbbe eusä erschti Bike-Tag in Sölde ahgfange.
    Nach em Zmörgele hemmer eus ready für de Bikepark gmacht. Bikehose, Chnüschönär, Ellbogeschonär, Helm und Händsche ahzoge no schnell de Luftdruck a de Pneu kontrolliert… oder ebe versuecht zkontrolliere.
    Bi de Ines ihrem Pneu het sich immer s Ventil mitdreiht, au mit umewürge isch zersch müt gange… irgendwie hämmer dänn d Luft aber glich inebracht jedoch isch die ganz grad wieder use und de Platte isch dah gsi. Da mir beid ohni Schluch fahred, hemmer eus churzerhand entschiede mir eini ineztue und so hemmer s Problem einigermasse schnäll chöne behebe und sind mit es biz verspötig doch no los.

    Nach de erste zwei Rundene (es sind ENDLOS Trails vo bis zu 10 Km lang) het d Ines dänn plötzlich gmeint sie chöngi nümä brämse. De Michi het das natürlich nöd glaubt und isch ufs Bike vo de Ines ghocked und hät dänn aber rächt schnäll festgestellt - jap du hesch kei brämschlötz meh. Toll, simmer doch gad ersch wieder mit de Gondle ue gfahre.
    Ja nu irgendwie het d Ines ja doch ihrgendwie wieder abe müesse, so isch sie uf die naheliegendi Gletscherstrass (die isch ca. 15km lang wo mer an Rettebachgletscher chunnt und au im Summer Skifahre chasch) und mit öbe 10h/km de berg durab drössled. Alles natürlich nur mit de Vorderbräms brämst🙈) de Michi het natürlich de Trail gno 😜
    Uf em Camping ahcho, het d Ines defür Pizza zum Zmittag organisiert und de Michi neui Brämschlötz montiert.

    Am Tag zwei hetts doch eifach grägnet, so das mer churzerhand in AquaDome go bädele sind.

    Tag drüü isch defür wieder d Sunne füre cho und mer hend ois wieder ufs Bike gschwunge.
    Dasmal fasch ohni Panne nur mit eme chline usrutscher vom Michi 😄 isch aber nüt meh passiert.

    ….spoiler….
    D Brämschlötz wärder bald wieder Thema… 🙈

    Fotis/Video: (3Täg Sölde)

    Memo a ois:
    - jetzt wüssemer defür au, das d Ines nöd die gliche Brämschlötz het wie de Michi und ihri dur de chauf in Sölde ez vergoldet sind.
    - kei Dumplings chömed a oisi sälbergmachte ane!
    - wänn de Camping sogar e gschirrspüelmaschine het, denn weisch er isch tüür 😅
    Read more

  • Day71

    Salzburg und d Eisriesenwelt in Werfen

    September 8 in Austria ⋅ ☀️ 22 °C

    Sooo wiiiter gahts mit Brichtli schriibe, hocked übrigens gad mit Jägertee in Sölde ufem Camping Tag 1 Bike hemer au guet überstande aber ich schwiife ab.

    De erst abig ufem Camping hemer scho en wunderbare Sunneuntergang gha, dezue es gläsli Rotwii was will mer meh 😍. Am nächste Tag simmer go d Eisriesenwelt in Werfen go ahluege. Die grössti Eishöhli vo de Welt. Eigentlich isch nur scho de Weg zu de Höhli es Erlebniss gsii. D Gäng vode ahöhli sind 42km lang aber nur de ersti Kilometer isch veriist und nur de Teil isch für Touris begehbar. Mer hend eus aso mit ere Karbidlampe, eusem Guide em Roman und na paar anderne uf de Weg i die Höhli gmacht. Nachdem mer eus dur de Ihgang kämpft, dert herrschet Wind vo bis zu 140km/kämpft hend, hemmer au scho bald die erste vo insgesamt 700 Stufe berguf derfe in Ahgriff neh. Amigs sind die Stäge cheibe steil gsii und da nur jede 4ti e lampe gha hät ( d Ines isch ganz stolz gsii uf ihri) unds sust keinerlei Licht gha het isches au recht dunkel gsi.

    Nach erfolgriicher Erforschig und bizli meh wüsse hemer eus uf de Abeweg gmacht, dert hets dej natürli no de obligati Kaiserschmarre geh.

    Am Abig simmer den na uf d Festig Hohensalzburg, hend dert de Sunnuntergang gnosse und euse Wii, womer uf de Fähre Stockholm - Tallinn kauft hend, drunke. Uf de spati Znacht isches den na id Pauli Stubn gange. Wenn ihr mal uf Salzburg gönd, unbedingt dert go esse und de ofenfrische Schweinsbrat‘l im Dunkelbiersafterl (wieso chönd eusi Gricht nôd so geili näme ga) bstelle😍

    Jaa das wärs glaubs au scho gsii für Salzburg und irgendwenn schriibed mer den vlt na biz öpis über Sölde 😄

    Leider chömer nur no 6 Fotis und 1 Video uelade… Findpenguins wend eus zu Premium zwinge.

    Fotis
    - Camping
    - Salzburg
    - Eisriesenwelt

    Memo a Ois
    - d Ôstericher sind eifach super
    Read more

  • Day69

    Bratislava und Wien

    September 6 in Austria ⋅ ⛅ 19 °C

    Jaa soo cheibe viel gits da nöd oder nüme z verzellä 😝

    Zwei mal super schöns Wetter, zwei mal guet gesse und zweil mal wunderschöni Altstädt.
    In Bratislava simmer nur es paar Stündli gsii und biz dur d Altstadt gloffe.

    In Wien simmmer ja scho mal für zwei Nächt gsii und dementsprechend hemmer des ganze Touri zeugs, unter anderem Sache womer nöd stolz sind druf, scho erledigt und hend eifach biz d Altstadt und d Donau gnosse :)
    Es freut eus aber riiiiieesig dasmer eifach wieder mal chönd ines Restaurant hocke und verstönd was um eus ume so gredet wird 😂 het eus mega gfehlt.

    Fotis:
    - kischtig im Ubahnhof Wien ( und neue Outfit vo de Ines)
    - Domchile
    - Wienerschnitzel (d Ines wo sich über ihri 3 Chnoblischnitzel freut)
    - Bratislava
    - Kunst in Bratislava 😄

    Tmorrow oder so ca inere Stund set den na Salzburg folge 😂
    Read more

  • Day66

    Tatra Gebirge

    September 3 in Slovakia ⋅ ⛅ 12 °C

    Yes, äntlich schöns Wätter und äntlich wieder Berge!
    Über d Nacht hemmer d Landesgränze id Solwakei passiert und Pole hinder eus lah. Zumindest so bizli. Eusäs Ziel sind d Tatra Gebierge gsi, welli halb zu Polen ghöred und halb zur Slowakei und da mir eus für en Gipfel entschiede hend wo d Wanderig i de Slowakei startet hämmer eus au gad dete es Schlafplätzli, gsuecht.

    Eusäs Ziel isch de Sivy vrch gsi uf 1805 Höhi.
    Dä Start wär ca. uf 1000 Meter gsi, wär… wänn mer nöd am morge entdeckt hettät das mir ime chline Skigebiet glandet sind und de Sässellift sogar im Summer fahrt.
    So hämmer eus dänn rächt gfreut das mer eus die erschte paar 100 Höhenmeter hend chönä spare!
    Schlussändlich ischs au bitter nötig gsi, ersch underwägs hämmer gmerkt, das mer bis zu eusem Ziel no 2 anderi Gipfel hend müsse passiere. Es isch es ufe und abe gsi, aber wunderschön! Ganz e spezielli vegetation, mängisch hesch dich im Regewald gefühlt, dänn wieder im Hochgebierge, nachher inere Wüeschti und und und…
    Leider hämmer uf em letschte Gipfel rächt schnäll wieder müesse de Rückweg in Ahgriff näh und de Michi het sich scho wieder müsse vo sim neue Kolleg verabschiede (siehe Video;-))
    Irgendwo hemmer ebe gläse, das s letschte Bähnli am 5i fahrt und da mir wieder alles hend müesse zrugg wandere, simmer es bizli in Stress cho.
    Mer sind aber so tifig gsi, das mer bereits am viertelab 4i bim Bähnli ahcho sind. Chum ahcho, het eus denn aber de Bahnmitarbeiter gfröget öb mir no abe welled, sie seged am zue mache… so hemmer doch no riese Glück gha!
    Mer sind eus bis hüt nöd sicher wielang de Sässel het söllä laufe, Google Rezessione säged, es chöngis scho mal gäh, das sie d Öffnigsziite nöd ihhaltet…. Danke für dä 😉

    (Fotis: Wanderig😍)

    Memo a ois:
    - Wanderprofis simmer immer noni und hend wieder mal s Ersatz Shirt vergässe
    - defür Hauptsach immer zviel Jaggene debii
    - de Michi het sogar Blüemli & Pilz ahgfange Fötele (das spricht für d Wanderig)
    Read more

    Chris Müller

    Hoppla.So steil😉

    Chris Müller

    I hät sBier gno😃

     
  • Day63

    Krakau

    August 31 in Poland ⋅ 🌧 14 °C

    Vo Danzig isches direkt fascht bis uf Krakau gange. Während dene 6h Fahrziit hets glaub nöd einisch ufghört regne und für Krakau und umgäbig hends extremi Niederschlagswarnige usegehh. Janu sind eus de Räge ja gwönnt… hend den aber spontan doch es Appartmenet , natürli wieder mit Whirlpool wanne 🤪, bueched. Tag 1 hemmer dem meh oder weniger untertage verbracht. Mir sinds s Salzbergwerk Wieliczka go besichtige. Seeeehr idrücklich gsii! De Michi isch sich zum Teil biz wie in Herr der Ringe vor cho. Mer gaht über div. Stäge bis zu 130 Meter id Tüüfi. S Ganze Bergwerk erstreckt sich über 250km Gäng und gaht über 350m id tüfi und stammt zum Teil usem 15te Jahrhundert. Die ältiste Teil womer cha besichtige stammt usem 16te Jahrhundert und au en Teil vo de Stützene sind guet 400 Jahr alt. DKunst womer gseht isch bis uf ei usnahm usschliesslich vo Bergmanne gmacht worde. Au s Salzwasser hetmer na derfe probiere, mit 320gram pro Liter isches aso nöd sehr schmackhaft gsii.
    Ad Oberflächi het eus denn en 4 stöckige Gruebelift beförderet. Selbstverständlich alles Coronakonform…. Hetis e Stäge geh, mir hetet fix d Stäge gnoh. Sooo vertrauenserweckend het de Lift nämli nöd usgseh 😅
    Am abig simmer den trotz Räge na go d Altstadt go erkunde. So viel Prachtbaute und Chilene dasmer amigs gar nöd so recht weiss wo aneluege und fast biz erschlage isch. Für en Städtetrip chömer Krakau aso nur empfehle.
    Tag 2 hemmer Wöschtag unter anderem gha entli mal imene Wöschsalon wäsche xD wiiter simmer na chli ide Stadt umegwatschlet und ah ungefähr 1000 Bruutmode gschäfter verbii cho. Da isch am Michi ufgfalle daser fürd Hochziit vo Dieters next Jahr, ja no en Ahzug bruucht. Zack inen Lade eine Ahgleit, au vode Ines für guet befunde worde und de Michi het jetzt en Ahzug us Pole 😂

    Ufem Weg in Richtig Slowkaei hets na en Abstecher uf Auschwitz geh. Eifach nur unvorstellbar wemer bedenkt, dass elei in Auschwitz über 1.1 Millione Mensche, gröschteteils vergast worde sind.
    75% vo de ahkommende Persone sind nöd mal erfasst worde, sondern direkt vom Bahnhof id Gaschammere gschickt worde. Fotis hemer nöd würkli gmacht wills doch recht es bedrückends Gfühl gsi isch.

    Jetzt simmer ide Slowakei ahcho und s Wetter set die nächste Tage entli besser werde 🥳

    Fotis:
    - Prag
    - Salzbergwerk
    - Wöschsalon

    Memo a ois:
    - de Schwiizer (Ines) und sies Sackmässer. Het natürli promt ahgeh bi de Kontrolle in Auschwiz 🙈
    Read more

    Family Watkins

    The translation did not work well today - is this the Whirlpool part? 🤣

    Family Watkins

    you have travelled a LONG way today?

    Chris Müller

    sVideo.Wo anne goht de Lift🤔

    Pföschtäontour

    As Tagesliecht :) jo s video isch wieder mal z lang gsii

     
  • Day62

    Danzig

    August 30 in Poland ⋅ 🌧 17 °C

    No am morge uf em Stellplatz hemmer eus churz d Frag gstellt werum mir eigentlich de Umweg gfahre sind und wär eigentlich vo eus uf Danzig cho isch und öb sichs bi dem Räge au würkli lohnt no die letscht Stund in Ahgriff z näh.
    Aber mer hend eus rächt schnäll defür entschiede. Was sind scho 2Stund umwäg 😅
    De schuldig hemmer au recht schnäll gfunde (keine vo beid, falls de Schuldig das gad liest, Danke 😉)
    Defür ischs au würkli nur e churzi Stadtbesichtigung worde. Aber sie het sich glohnt! U schöni gmüetlichi Gässli mit ganz viele Restaurant. Ja und wänn mer no weiss, dass Danzig eigentlich au no wunderschöni Sandstränd hät, denn ischs e Reis da ane definitiv wärt.
    Damit mer vor eusärä lange wiiterfahrt doch no chli Sport gmacht händ simmer no uf en Chileturm ue gloffe. E wändelträppe mit ca. 450 Stufene, es isch eus nur es bizli trümmlig worde 😅

    (Fotis: Danzig)
    Read more

  • Day61

    Masurische Seeplatten

    August 29 in Poland ⋅ ☁️ 16 °C

    Wie scho im letschte Bricht erwähnt isch für eusäs nöchste Ziel viel Autofahre ahgseit gsii.
    Obwohls ja eigentlich gar nöd wiit ewäg gsi wäri…🙈
    Da mir ja zuedem eh no viel langsamer mit em Karl am umetöterle sind und so grad nomal länger händ wie Google das immer vorus seit, hämmer eus es Zwüscheziel usegsuecht wo mer au wieder mal aktiv cha sie.
    So simmer uf die Masurische Seeplatte gstosse, e Seelandschaft in Polen.
    De Michi het eus no en Kajak verleih usegsuecht und google het eus denn quasi in Vorgarte vome private Hof gfüehrt. Churz simmer verunsicheret gsi öb mer da au würkli richtig sind, will kei Menscheseeli umegsi isch, doch plötzlich isch en junge Purscht vo irgendwo her cho und het eus ihgfüehrt. Sprich Kajak anegleit und gseit wo de ihstig isch. Er sälber isch denn gad wieder loszoge, will er Gescht het müsse am Ziel go hole.
    Die ganzi Tour gaht zwüsche 2-4 Stund Fluss abwerts und de Fluss isch meh es Bächli, also easy… hämmer gmeint…!
    Rächt schnäll hemmer tschägget das es doch nöd so eifach. Überall hetts immer wieder Bäumstämm im Wassergha wod häsch müesse umfahre und teilwiis doch au recht zug gha.
    Die erschte Baumstämm hemmer drum au mitgno und teils sogar schmärzhaft🙈
    Irgendwie hemmer eus denn aber meh oder weniger guet de Flussabwärts chöne manövriere und sind dunde denn vom Vater wieder abgholt worde.
    Es isch würkli e kuuli abwechslig gsi und mer hend sogar Glück gha und chlini trocheperiode verwütscht💪🏽

    Nachdem eus de Polnisch Vater äntlich gah lah het (er het eus bombadiert mit frage und immer gseit nur no ei frag 😅) simmer wiiter gfahre zum d Marienburg no go besichtige. D Marieburg gilt als s gröschte Werk vo de Backsteingotik… es isch und blibt mit Abstand die schnällsti Besichtigung wo mer uf dere Reis gmacht händ😂 es het wiedermal in ströme grägnet und isch chalt gsi und mer hend überhaupt kei luscht gha. Au das muss mer sich chöne zuegestah. Aber immerhin hetts no für es Selfie glanget 😄

    Zrugg im Büssli hemmer eus es Polnischs Restaurant gseucht und sind dete die mit Abstand besti Zurek Supper go ässe!!

    Gschlafe hemmer wieder mal irgendwo Mueterseeleallri bimene usrangierte Hafe :)

    (Fotis: Kajake, Marienburg, Zurek, Stellplatz)

    Memo a ois:
    - öb mer im Kajake au so es dreamteam sind wie susch… da drüber laht sich stritä
    - niemeh Zurek ässe, es wird nöd bessär!
    Read more

    Chris Müller

    sie nid do Wildpferd i de Gegend?

    Pföschtäontour

    Jo gemäss google scho 😄 hend eus da aber nöd informiert und kei gseh

    Chris Müller

    machet eu es bizli schlau😉

    Pföschtäontour

    🤷‍♂️ es git gfühlt überall 1000 Sache zgseh (wie d Wisents im Nationalpark zu Wissrussland) aber irgendwie het dert na keine en Wilde gseh nur die Gfange so züg lömmer den gern weg ;) und mit Pferd hemer sit mer die spanischi Hofriutetschuel gseh hend eh abgschlosse 😂

    Chris Müller

    Konic heissets glaub🐎