Killarney

Was fürne Tag! Hüt sind eusi Adrenalin Reserve und Nerve zünftig strapaziert worde...
De Tag het wiederum mit vil Schakal-Gjaul und Löwe-Gebrüll agfange. Ufem morgendliche Game Drive hemmer dismal au de Leu us zimlicher Nöchi chenne gseh, es wunderschöns Tier! Nachher simmer ufen Lookout mit endloser Wiitsicht ga käfele und denn wiiter ufd Suechi nach Elefante. Au da hemmer numal Glück gha und hend en Teil vu de Herde im Gebüsch entdeckt. Zwei Männli hend denn ganz i dr Nöchi vu eusem Jeep afange striite (ca. 10m, all Rüssel usgfahre), wo denn de eint verlore het, heter us luter Fruscht uf eus los welle! Da het d Megane, euse Ranger, de schnell messe Gas gä zum eus id Sicherheit zbringe.
Nacheme ruhige Zmorge und Abschied vu dr Lodge Truppe und Gäst simmer denn wiitergfahre, in Norde, Richtig Drakensberge. Es isch en relativ wiite Weg und mer hend scho hüt so wiit wie möglich welle cho und en Unterkunft inere Guest Farm i dr Nöchi vu Maclearen buecht. De erschti Teil vu dr Fahrt isch sehr malerisch gsi, unendlichi Wiitene, sanfti Hügel und immer wieder Townships und langwierigi Baustellene. Nachdem mer eus mal churz uf en Pass verfahre hend, het eus Google zwei möglichi Route zu der Guest Farm vorgschlage: ei längeri durch d Stadt und ei chürzeri Überland. Zerscht hemmer der Überland Route nid so recht traut, die Dirt Roads sind nid all im glich guete Zuestand und mit eusem Toyota Corolla simmer nid grad Offroad-tauglich... doch d Abzwigig uf die Überland Route het en guete Idruck gmacht, isch afänglich sogar nu teert gsi, somit hemmer eus für die vermeitlich chürzer Route entschiede. Definitiv en Fehlentscheid! Nach de erschte paar Kilometer isch die Strass nüm teert gsi, nach ca. 15km isch si eher Traktor- als Corolla-tauglich gsi... aber mer hend nüm zrugg welle, es isch nämli scho dunkel gsi und mer hend dänkt vil schlimmer chas ja nüm werde... naja, summa summarum, nach einigem Gfluech, liechter Hysterie, vil Fahrgfühl vum Sämy und paar unliebsami Begegnige vum Auto-Underbode mit afrikanische Stei und Bode, hemmers denn endlich in die Guest Farm gschafft! Mer sind sehr härzlich empfange worde und entspanned eusi strapazierte Nerve am offne Für miteme ghörige Schluck Dessertwii vu Klein Constantia... all is well that ends well!Read more