Around The World

Tongariro Crossing

Am 4:45 bin ich ufgstande mit voller vorfreud aber ich bin au chli nervös gsi. Am viertel ab 5i hett mich de shuttlebus im hostel in taupo abgholt und zum start vo de wanderig bracht. D wanderig han ich elei gmacht, aber es het immer anderi lüüt gha underwegs. S tongariro crossing isch e sehr bekannti wanderig in neuseeland. 20 kilometer dur e vulkanlandschaft. Ich han am 7bni gstartet und d wanderig gaht zwüsched 6 und 8 stunde. Gwüssi vulkän sind immer no aktiv. Es isch chüel gsi woni gstartet bin und ich bin froh gsi um mis stirnband und d händschä. G wanderet bini mit mine turnschue woni debi han. Am afang isch de weg recht easy gsi für ei stund aber mini bei händ sich scho gschpürbar gmacht!! Und ich ha no 6 stund vor mir gha und nöd nur eifachi wäg!! Super hani denkt, mag scho nüme nachere halb stund!! :)) nachere stund isch es den ei stund de berg duruf gange mit stege. Ha scho recht früe extrem müse schnufe. Ich bin aber erstundlich schnell underwegs gsi und de ufstiig het sich churzwilig agfühlt. Die schöön landschaft mit de vulkän het mer natürli die ganz ziit chönd bestuune. Es hett sogar schnee gha. Das isch den echli zu mim problem worde, will ich ja nur mini nöd- wasserfeschte schueh agha han ^^ eigentlich hani welle wanderschueh miete aber mer het mir gseit mini schueh segged guet,de schnee segi gschmolze will de bode vom vulkan ja warm isch. Jajaa, das isch en witz! En halbe meter bini im schnee igsackt und ha nach de helfti nassi socke und schue gha 😛 aber; that's part of the experience ;)) nach em ufstieg isch es den e chli grad us gange und nacher dur de schnee de berg duruf, isch zimmli rutschig gsi aber ich bin den zumene schöne ussichtspunkt cho. Woni no chli witer gloffe isch hani den en blick uf 3 türkisfarbigi see gha. Grüücht hetts, wills ja en vulkan isch. Isch uu schöön gsi :) wiiter ischs gange dur schwarze sand und ene dur de tüüfi schnee wieder ue. Deht hani den nomal en schöne see gse. Nacher isch denn recht easy um de berg ume gange richtig endi vo de wanderig. Ich ha den mal no min zmittag bimene chline hüttli gesse und ha no ziit gha für es kapitel z lese vo mim buech. Ich han nemmli unbedingt müse de halbi 3 shuttle zrugg verwütsche, will ich den am abig de bus gha han an nöchschte ort. Ich bin schneller gsi als ich denkt han und bi under de erschte lüt gsi, wo am endi acho sind. Juppiii! Mini kondition isch doch nöd so am arsch wie ich denkt han ;)) ich bin am viertel vor 2 fertig gsi. De schluss het sich den chli zoge und es isch immer durab gange. Mini chnü händ zum glück dureghebed. S ganze crossing isch de hammer gsi. Öppis vom beschte wo ich gmacht han. Chas gar nöd richtig realisiere. D landschaft isch so schöön gsi ;) ähnelet extrem de schwiiz ;)Leggi altro