Dak Kơwêl

Wie scho atönt, simmer vo zwei Töfflibuebe vo Da Nang uf Hoi An bracht worde. Sie hend eus denn bimne Kafi ihri Agebot a Töfftoure unterbreitet. Zerst simmer recht skeptisch gsi, aber nachdem mer verschiedeni Reviews agluegt hend und mer au scho devo ghört hend (merci Sara), hemmer eus dezue entschiede, nomal 4 Täg mit em Töff unterwegs z si. De Suu (euse Guide) het all euses Gepäck uf sin Töff gschnallt und mir sind s zweite ufeme Scooter unterwegs gsi. Am erste Tag simmer d Tempel vo My Son go aluege und hend debi es sehr netts Pärli vo London kenneglernt. Denn simmer wiiter in Richtig Berge wo mer scho s erste Mal komplett verregnet worde sind. S Wetter ide nöchste Täg isch sehr wechselhaft bliebe. Mir hend immer wieder Halt gmacht bi verschiedene Tempel oder Iheimische/minoritäre Völker. Währenddesse hemmer viel über s Land glernt und de Suu het au viel vom Vietnamchrieg verzellt und was es us sinere Perspektive mit de Bevölkerig gmacht het. Es sind idrücklichi und sehr schöni Täg gsi. Es isch aber mit de Ziit au sehr astrengend worde und d Nadine het au starchi Hüftschmerze becho vom viele Töfffahre. Vo dem her simmer denn au mal froh gsii, gsund und zfriede in Na Trang acho z'si und mit em Zug wiiter nach Ho Chi Minh z'reise.Read more