Thôn An Ninh

Wies verlangt wird simmer den um die 20:00 Uhr, also e Stund zfrüeh am „Busbahnhof“ gsi. Da simmer vo ihheimische Chind mit Spieli guet unterhalte worde und somit isch die Wartezit au wie im Flug vergange.🥰
Luschtig, dFreud ah dem Nachtbus wird aber immer chliner. Bi de erschte Fahrt hemmer üses Glück mit dem ultra coole Bus fascht nöd chöne fasse und hüt stigmer mit Bedenke in Bus ih und hoffet, dass die Nacht oder anderscht gseit die lange 9 Stunde schnell und ohni Zwüschefall vergönd und mir wenns ganz guet chunt, viellicht no es paar Stündli schlafe chönd.🥲

Trotzdem spart mer eso extrem viel Zit wemmer über dNacht chan witerreise. Mir nutzet die Zit de Tag dur lieber umno viel meh Ihdrück vo dem beidruckende Land und dere spannende Kultur zgseh. Mir fokussieret üs uf Ihdrück wo üsi Auge zum strahle bringet, uf all die Moment wo üs es Lächle is Gsicht zauberet und eifach uf die gmeinsami Zit wo mir i vollschte Züg gnüsset, üs erfüllt und zfriede stellt.❤️ Usserdem sind mir devo überzoge dassmer eso am meischte chan erlebe und was gits schöners als all die Erinnerige & Ihdrück derfe mitheizneh? 🫶

01:37 Uhr, Guetnacht usem fahrende herte Bett mit de Decki wo nach nassem Hund schmöckt.🌝

07:15 Uhr, wunderschöne guete Morge „Hôi An“ 🔮🎎Read more