Satellite
Show on map
  • Day39

    120 Kilometer i 15 Stung

    October 10, 2018 in India ⋅ ⛅ 14 °C

    Mir si üs ja scho einiges gwöhnt a aasträngende Reisetäg. Aber was mr geschter erläbt hei isch no ds Tüppfli uf ds I gsi. Hie im Norde isches ghögerig u bugglig. U so si ou d Strasse. Sit dr Fahrt vo Bagdogra nach Klimpong u vo dert nach Darjeeling si mir mit houperigem Uf und Ab, änge Kurve u durendem Huupe vertrout. Aber Geschter…uff..i ha ja süsch fröid uf wiudem Terrain z fahre aber so nach 5 h….föh mr vorne aa.
    Geschter hei mir üses Sii vo Darjeeling nach Sikkim besser gseit nach Yuksom verschobe. Wow, Sikkim! Es uraute Königrich, es buddhistisches Heiligtum! Me brucht es Speziau-Visum um dert ine z cho. Das wunderbare Fläckli Ärde ligt haut nach am Konfliktherd Tibet / China. Vorusschouend wie mir Schwizer si, hei mir das Visum scho in Bärn organisiert. Bim Iireise bruchts aber de ä Stämpu wo bestätigt, das die bewilligte 15Täg itz aafö. Eigentlech wärs nid so wit vo Darjeeling nach Yuksom aber wüu zwüsche Sikkim und Westbengale e aagspannti Stimmig herrscht isch dr entscheidend Checkpoint sit churzer Zit gschlosse. Kes Problem, mir gö übere anger Checkpoint in Melli ine, Umwäg vo lächerleche 40km..hei mr gmeint.
    D Fahrt vom westbengalische Darjeeling is sikkimische Yuksom geit houptsächlech am Teesta-River entlang. E wunderbar wiude Fluss wo sich vom Himalaya dürab, dür steili, tschungu-bedeckti Bärge u Hügu schlänglet. Ds Klima isch ruuch, es git Monsun, Hitz u iischchauti Nächt. Es isch e duurende Kampf zwüsche Mönsch u Natur däm Gländ e einigermasse befahrbare Bitz Strass abzverlange. Doch für die abglägne Himalayadörfli wie Yuksom isch dä Kampf unverzichtbar, um mit Ware u nid dsletscht ou mit Touris versorgt z wärde.
    Uf jedefau het me gmunklet, das mehreri Abschnitte zwüsche Darjeeling u däm besagte Checkpoint immerwieder stundewiis wäge Bouarbeite unterbreche wärde u mir drum frühe los müesse um de am Mittsg in Jorethang no vor 13:00 e Sammu-Jeep ds verwütsche.. Kes Problem heimr dänkt, bis mr gmerkt hei, das sofrühe wie mir müesste gah no kene fahrt..auso Privat Taxi am 6:00 am Morge für die erschte 40km.. für huere viu Gäut u weni Komfort. Bis zum Checkpoint, u när nach Johrethang, auso die Streki wo agäblech so schwierig sig, hei mr eigentlech kes Problem gha. Mir si am 10.00 ds Jorethang gsi..es hät auso guet ou dr Sammeljeep glängt aber äbe me weis ja nie.. Dä hei mr de am 13:00 richtig Yuksom wöue bestige…aber dä wo am eis isch cho het üs nid wöue mitnä..är isch o scho völlig überlade gsi. Uf Jeepbänkli wos ds dritt scho äng isch, d Inder normalerwiis ds viert hocke, hei sie sich dasmau ds füft drufdrückt …danke, merci..mir näme dä wo agäblech i 10 Minute chunnt. Us indische 10 Minute si de 90 Minute worde…aber, immerhin, mir hei ds ganze Hingerbänkli für üs gha we me vo däm haagere Inder abgseht wo näbe mir dr viert Platz het igno u we me dr Heisswasserboiler wo si üs no quer über de Bei gleit hei nid iiberächnet. Wo de aues verlade isch gsi isches am 15.30 losgange.
    Scho churz nach dr Stadt isch d Strass nüm teeret gsi. Uf dr Siite gäge Teesta-River si immerwieder grossi Bitze vor Schotterbischte abgrütscht gsi wüu si vom Flusd ungerspüut si worde..dr schier ändlos Strom vo Laschtwäge, Jeeps, Bösse u Töffe hei sich dert immerwieder müesse Vortit la u sich uswiiche, was zu hausbrächerische Manöver gfühert het. Dert wos nid angers geit tuet dr Staat mit riisige Bagger u Laschtwäge das wo dr Fluss unger dr Strass furt spüut obe wieder drufschütte. Was äbe zu dene erwähnte, stundewiise Strassesperrine u de entsprächende Stous fühert..sobaud de aube aui wieder i beidi Richtige chöi Fahre chunnts wieder zu dene unsägleche Uswiichmanöver. Die vom Fluss usghöuti u vom Räge usgwäschni Strass het riisigu Sumpf- u Schlaglöcher. So das dr Fahrer nid nume viiu gschick sondern ou ungloubleche Optimismus u es riisigs Vertroue i si chlapperig Jeep brucht. So si füf wiiteri Stund vergange..schüttle, houpere, es umeschlaa vo linggs nach rächts (mit Böiler uf de Chnöi), füre, hingere, gasgä, abbrämse, horne u huupe…
    D Batterie wo usgfaue isch, d Brügg wo eigentlech nume vo eim Fahrzüg gliichzitig hät dörfe befahre wärde und dr duurend us de Boxe trällernd Bollywood Schnulze Sound hani itz wägglaa... Uf jedefsu si mir heil, todt müed u früsch düregschüttlet in Yuksom acho!!
    Read more

    Sunci: ich bin oft in gedanken bei dir! Es berührt mich zu lesen, wie es dir auf deiner reise (innere und äussre und ich wünsche euch

    11/1/18Reply

    Wie es dir auf deiner reise (innere und äussere) geht. Weiterhin all the best and be happy!!

    11/1/18Reply

    Sunci: wir sind daran, einen flug für april 19 nach colombo zu buchen... marin freut sich. Falls ihr tipps habt, sind wir dankbar. Alles Liebe! Sunci

    11/1/18Reply