San Cristobal de las casas

So ehn schöni Stadt :) Ich ha eigentlich nor zwoi Nächt welle bliibe uf de Durchreis uf Guatemala...aber es sind denn halt 5 worde.

De Grund esch vorallem au dasd mer vo dere Stadt us so viel cooli Usflüg cha mache und das han ich ih dene 5 Täg au werklich gnötzt. Ich bin zum Canyon del Sumidero woni Krokodil und Affe gseh han, zu de Chamula Chile wos es speziells Ritual mit Cherze am Bode dore füehred, ha s vo de Regierig unabhängige, linksextreme Dorf Oventic bsuecht, bi zum Chiflon Wasserfall und zu de Montebello Seee (Seeä, Sees... höö?). Jede Usflug esch uf sini eigeti Art sehr beidruckend und schön gsii. Ich chönnt wahrschinlich über jede ehn eignige Footprint schriibe, da ich aber kei Lust uf das ha mönd d Föteli länge.

D Stadt sälber esch au mega toll. Da sie ih de Bärge esch hani au mol chli chälter (also ja so 15 - 20 grad). Es hed viel Kaffis, super Restaurants und ehn mega tolle Märt!

Morn Morge gods aber trotzdem wiiter. Ich mach mich uf de Wäg uf Guatemala und bi ganz ehrlich scho chli trurig - ich werde die ganze Tacos vermisse :)Read more