Taroko Nationalpark

Eis vo de beliebtiste Touristeziel in Taiwan und ned ohni Grund :). De Taroko Nationalpark esch es wunderschöns Wandergebiet. Da chinesischi Touriste ned gärn laufed esch mer sobald mer echli vo de Hauptstross wäg esch au zimlich allei 😅.

Ich bi mit zwoi Kollege vom Hostel los und mer händ planed de hinder Teil vom Park z erkunde und de am nöchste Tag vo vore ahzfo. Es esch voll ehn schöne Park und es hed eifach alles: Ehn wunderschöni Schlucht, Wasserfäll, riesigi Summervögel, tropischi Pflanze und und und.

Leider esch üse Wandertag früehziitig beänded worde. Es hed es Erdbebe (6,1) gäh wo Erdrütsch im ganze Park usglöst hed. Vom Bebe sälber händ mer nüt gmerkt aber mer händ de Erdrutsch ghört und sind mega verschrocke. Ned ohni Grund. Ahnschinend send grad ehn Kurve hinder üs es paar rächti Felse uf de Wäg kracht und uf ehm Wäg wo mer am Morge gmacht händ send zwoi Lüüt verletzt worde. Mer sind denn ca. 2 h uf ehmene Parkplatz festghocked währeddem sie die beide verletzte (uf sehr unprofessionelli Wiis) abgholt und d Stross grumed händ. Mer send alli ächt froh gsii esch üs nüt passiert.Read more