Tag 16 - 17: Kisoro

Es esch so wiit mer chönnd d Gorillas go ahluege 😍😍😍. Es absoluts Highlight vom Trip wo ich mich scho wiit im Vorus druf gfreut ha. Mer händ öbbe de schlächtist Tag verwütscht wo mer händ chönne aber s Erläbnis esch glich unvergässlich! Es hed grad abe gschiffed, kei Rägejagge esch no dicht gsii, de Bode esch schlammig und Gorillas verstecked sich ergendwo wiit wäg vom Wäg under de Bäum. So simmer 3 Stund dur de Rägewald gloffe uf de Suechi nach üsne nöche Verwandte. De Guide esch mit de Machete vorus und hed ehn Wäg bilded und mer sind all hinderhär gstolpered. Leider hed de Räge au ned ufghört wo mer d Gorilla Familie gfunde händ und so heds halt ned so viel Bilder gäh - s Erläbnis blibt aber trotzdem. Mer sind so nöch ah dene Tier gsii und händ sie trotz strömendem Räge über ehn Stund beobachted. Denn simmer weder 3h zrug gloffe bevor mer de Bus zum zrugfahre erreicht händ. De Abewäg esch denn scho s nöchste Abentüür gsi well de Bus uf ehm schlammige Bode kei Halt gfunde hed. So simmer teilwiis lieber usgstiege und gloffe als im warme Bus um rutschigi Kurve z fahre.

Am nöchste Tag händ die Meiste nüt gmacht. Ich ha mich loh überrede mit ehm Malik und ehm Hendro ehn Usflug uf ehn Hügel ih de nöchi z mache zum d Vulkän vo Uganda z gseh. Es hed sich so glohnt! Wo d Sunne no am ufgoh gsii esch sind mer 3 scho uf ehm Böötli im See ghocked und sind so fast ehn Stund gmüetlich über s Wasser gfahre. Nacher eschs ca. ehn halbstund deruf gange bevor mer d Ussicht über de See und d Vulkän gha händ. Unterwägs sind überall Chind z springe cho zum üs mit "Hello Muzungu" (Hallo Wissi) z begrüesse. Eis ganz muetigs hed sich sogar trout schnell nöch zu mer z cho, min Arm ahzlänge und sich denn grad weder z verstecke. Uf ehm Hügel hed üs üse Guide no chli Froge über d Lüüt vo de Umgäbig, d Vulkän und d Gorillas beantworted. Am Mittag simmer schoweder zrug gsii und sind mit ehm räst vo de Gruppe ih es Kaffi go Zmittag ässe und de is Hostel chli go Spieli spiele und Tagebuech schriibe.Read more