Potosí - minas de plata

Mir halted a eusem Plan fest und nehmed hüt am Morge en Bus uf Potosí. Chum stiigemer zum Taxi us, werdemer vo Billetverchäuferinne überrennt. Wie söll mer da nume de Bus finde, wo als ersts goht und bequem isch...? Eifach probiere halt. De erst wo losfahrt hämer sicher ned verwütscht. Er hett sölle 08.30 starte (was eh schwirig isch wil mir 08.40 am Terminal gsi sind ^^), loht sich denn aber Ziit bis 09.15. Ich gange mal devo us, er warted eifach biser voll isch. Ja und d'Fahrt isch denn recht gmüetlich und schön. Zerst gohts abe und denn wider ine beidruckend grossi Hochebni ufe. Wo die fertig isch, so ca. 30 km vor Potosí, ghöremer es komisches Grüsch und vo denn a fahremer nume na im erste Gang mit öppe 20 km/h. Das wür denn heisse, dasmer statt wie mal denkt am Mittag erst öppe am zwei achömed und das widerum chönnt en Seich geh wilmer vernuetli am 22.00 wider en Nachtbus nehmed. Tja, chömer ja ned ändere... Nach 20 km heissts plötzlich usstiige, si hend entgege mine Erwartige tatsächlich en Ersatzbus organisiert und so gohts wider i normalem Tempo de Berg ufe :) Dummerwiis werdemer ned wie bueched zum Busterminal brocht, sondern afangs Stadt usegschmisse. Danke für nüt, do chömer weder eusi Tour für de Nami na de Bus am Obig bueche. Also frogemer eus dure bismer eine vo dene Minibüs stopped, wo eus an Terminal bringt. Isch au nume es bitz müehsam mitem grosse Rucksack aber mir schaffeds... Dete findemer en Abüter für eusi Strecki, wo so halbmotiviert Tickets usstellt. Guet, namel öpis gschafft aber agspannt bini trotzdem na wili no ned weiss, obmer das mit de Tour hüt Nami na schaffed oder ned. Es isch immerhin scho drü. Und Hunger hani au ^^ Mir schnapped eus wider en Minibus is Zentrum zum das mit de Tour regle. Unterwegs zum Quartier mit de Agencies schneuggemer endlich mal öpis chlises und scho fühli mi besser ^^ Bald werdemer fündig und chönd problemlos na für hüt Nami e Tour id Silbermine bueche - für die isch di höchstglegni Grossstadt vode Welt bekannt und au entstande. Vorem Tourestart spazieremer chli dur di hügelig Stadt, essed na meh und trinked es Bierli. Jetzt woni weiss dass alles klapped bini wider entspannter :)
Pünktlich startemer d'Tour id Mine ohni wiiteri Teilnehmer. Defür werdemer mit Gummistiefel, Schutzkleider und Helm mit Stirnlampe usgrüsted. Zerst machemer Halt bimene Lädeli wo au d'Mineure am Morge iichaufed. Dete gits ganz viel Informatione zur Arbetsvorbereitig vode Mineure. Wil d'Täg zum Teil bis 20 Stunde gönd und sie denn nüt essed, isch s'Zmorge riesig und sie helfed sich dur de Tag mit Cocablätter. Bi normalem Konsum pushed die für öppe drü Stunde, wemer vorher e spezielli Zigarette us schwarzem Tabak, Anis und Orange raucht hebeds sogar siebe. Oder denn gitses au als scho verarbeiteti Riegel mit Gschmack und Tabak, was au siebe Stunde anehebed. Zuesätzlich trinkeds währedem ganze Tag saumässig viel Alkohol und zwar sottige mit 96%... Mir probiered de au und müend sege daser ned grad fein isch... Denn gits au na Infos zum TNT, wos do für d'Sprengige bruched und ohni Genehmigung vo jedem cha kauft werde. Mit es bitz Verstärchig gits en Vortrieb vo 4 Meter mit einere Sprengig. De Berg selber, de Cerro Rico, isch (wenis richtig verstande han) mal 5'170 Meter höch gsi. Dank de Ushöhlig sackter öppe 3 cm pro Jahr ii und isch au na abbaue worde, drum ischer jetz nume na 4900 Meter höch.
Ja und denn gohts nachere churze Fahrt ab id Mine, wo übrigens komplett privat sind. Mir nehmed eine vo 450 Iigäng, wo au aktuell na in Betrieb isch. Ide Schwiiz wär das defintiv ned möglich ^^ Churz nachem Iigang machemer Halt bimene Dio, enere Statue, wo übersetzt "Gott" heisst. Dete erfahremer viel über d'Gschicht vode Mine. 1545 hend di erste Abbauarbete agfange und zwar vo afrikanische und indigene Sklave unter de Leitig vode Spanier. Zu Spitzeziite hend 5000 - 6'000 Arbeiter ide Mine glebt und sind gar nüme usecho. De Grund: nach eim Johr schaffe ide Mine chunnt mer Silikosis (Staublunge) über und wenn das d'Spanier gmerkt hend, sind d'Sklave umbrocht worde. Bis hüt isch das mit de Silikose es Problem. Staubmaske werded immerna ned brucht wil d'Arbet ide dünne Luft sust scho gnueg astrengend isch. 1810 hät d'Sklaverei ufghört. Während d'Potosianer blibe sind und uf eigni Fust wiitergmacht hend, sind d'Afrikaner in Richtig La Paz zoge, wos wärmer isch. Dete produziereds imene Dorf bis hüt Cocablätter für s'ganze Land. Au bim Dio zue lernemer s'Ritual vode Mineure kenne, wo si bruched zum vode Pachamama kei Problem z'ha im Berg. Und denn gohts richtig los. Mir laufed, chrüched und stiiged entlang vode enge Gäng, gsehnd Silber schimmere, mineralisierti Stalaktite und Stalakmite, Löcher entlang vo Silberadere i all Richitige, stiiged Steihüfe ufe, Leitere abe und präpariered als Highlight en eigne Sprengsatz womer natürli au zünded. Nume scho ein Satz chlöpft ordentlich, i wett ned wüsse wies mitere ganze Ladig isch. Für mich au na unvorstellbar: vo dem ganze 19-stöckige Gangsystem gits kei Charte oder so. D'Mineure wüssed alles uswändig. Wie intressant wärs denn bitte zum alles erfasse?! @Schaukelgäng: wer chunnt go helfe? 🤭 Womer schliessli de Usgang erreiched, isch d'Sunne scho weg. Mir gönd zrugg, gebed alles ab und gönd denn schwer beidruckt uf Pizzasuechi. Nach dere Stärchig bringt eus wider en Minibus an Terminal, womer eus für d'Nacht im Bus parat mached und denn tatsächlich au pünktlich losfahred in Richtig Tupiza. S'Hostel dete hämer informiert, dasmer zmitzt ide Nacht achömed, so daser eus sött d'Türe ufmache :)Read more