Reset search
Latinamerica: Bolivia & PeruLatinamerica: Bolivia & Peru
SatelliteEdit route

Latinamerica: Bolivia & Peru

February - June 2023
A 124-day adventure by Maria Read more
  • 42footprints
  • 4countries
  • 124days
  • 609photos
  • 12videos
  • 0kilometers
Follow Calendar Share Bucket list
Date ascending
  • TravelerLatinamerica: Bolivia & Peru
    Day 73

    Holá Bolivia

    May 8, 2023 in Bolivia ⋅ ☁️ 23 °C

    Zack da bini wider - guet acho in Bolivie. Zude Reis: zweimal hani ennFensterplatz bueched aber es höckled scho anderi Lüt dete. Au egal, ha kei Lust zum diskutiere. Defür isch de dritt Flug so schlecht bueched (keis Wunder wemer vo 00.35 - 04.00 unterwegs isch) dasi freii Sitzplatzwahl han ^^ Ja und au sus lauft fast alles perfekt. Nume z'Lima chumi schnell is schwitze wil de Durchsag dass s'Boarding jetz göffnet isch folgt au na "Sie müend e Maske mitbringe und vorwiise". Das hät d'Maria natürli ned gwüsst und ihri Maske im grosse Gepäck la. Also muesi na schnellschnell eini go pöstele. Dete meint de Verchäufer dasi easy chan mit Dollar zahle (obwohl Peru ihri eige Währig hät) aber dases kei Rückgeld git. Also zahli die 72 Cent mit 75 Cent - woner aber ned wett akzeptiere wils ecuadorianischi Dollar sind. I ha gmeint es segi s'gliche 🤷🏻‍♀️ Schliessli hät de Typ ide Warteschlange hinter mir Mitleid (oder kei Geduld ^^) und zahlt für mich. Danke :) Schliessli bringt mi de letst Shuttle zum Flugi. Das isch denn so schlecht bueched, dasi freii Sitzplatzwahl han :) Ja und es churzes Nickerchen spöter simer scho im Landeaflug uf Santa Cruz. Das ganze Flughafezüg isch es bitz hektisch, wils verschiedeni Zettel wend gseh womer im Flugi usgfüllt hend und ich nie so genau weiss wele wenn und blabla. Au mitem Impfzertifikat nehmedses genau (wie befürchted) und i chume schnell is schwitze. Schliessli klappeds aber und mis Gepäck warted zum Glück au scho :) I tuusche schnell mini übrgie Dollar in Bolivianos um und mache mi uf Taxijagd - am Morge am füfi imene Land woni ned kenne. Das chan nume guet cho ^^ Es klapped und de Taxichauffeur warted sogar na, bismer im Hotel öpper d'Türe ufmacht. Die Dame isch es bitz überrascht über mich wil sie mini Reservation no gar ned gseh hät. Si schnappt sich churzerhand Bettzüg und macht s'Zimmer (woni erst abem Obig zahle) parat - muchas gracias! Zimli müed leggi mi schnell here und merke denn drü Stund spöter, dasi wohl doch zimli müed gsi bi ^^ Mini Tagesziel hüt: Wäsche, SIM-Charte organisiere und e Schnalle für min Reiserucksack sueche. Zerst bruchi aber es Brötli vom Beck, denn gohts los zude Wöscherei. Unterwegs wirdi vomene Local ufghalte, wo am liebste grad wür es Kafi go trinke. Nei danke, i wimmlen ab ^^ Ja und denn gangi mal in Richtig Stadt für e SIM-Charte. Was do sehr uffallt: jedes Auartier hät sis Thema. Im eine höts dutzendi Farmacie, im negste Isewahrehändler, denn Optiker, Nagelstudius, Kleiderläde und so wiiter ^^ Bim Netzabüter segeds mer dasi min Pass mues debi ha, woni aber im Hotel la han. Sehr geil. Also tschumpli alles zrugg... Unterwegs frogi mi aber na vo Lädeli zu Lädeli dure und finde tatsächlich e passendi Rucksackschnalle 💪 Mit vollem Mage bini es paar wenigi Stündli spöter wider im SIM-Lade und dasmal klappeds denn au - fast. I chan Social Media nutze aber s'richtige Internet goht ned. Anschiinend öpis mit Iischränkige vom Handy us. Zum das löse, gangi zum technische Support. Dä erklärt mer ganz viel uf Fachspanisch, probiert e Stund lang öpis und git denn resigniert uf. Wieso genau dases ned goht weissi immerna ned aber ja, isch halt so 🤷🏻‍♀️ Jetz gangi na e Salbi für min Chnü go poste und denn gmüetlich uf de Zruggweg zude Wäscherei. Au es Znacht derf natürli ned fehle. D'Essensgwohnheite mit viel Ries, Härdöpfel und Poulet schiined do ähnlich z'si wie z'Ecuador. Super müed bequemi mi früeh is Bett :)
    Wasi au feststelle a dem erste Tag: d'Lüt do reded (amel sicher bis jetzt) viel seltener Englisch als na z'Ecuador 😅    Read more

    See translation
  • TravelerLatinamerica: Bolivia & Peru
    Day 74

    El Fuerte

    May 9, 2023 in Bolivia ⋅ ☁️ 20 °C

    Hüt wirdi früeh, sehr früeh, also am vieri, vom Wecker gstört aber halb so wild, es isch für en guete Zweck :) D'Hoteldame, d'Olga, hät gmeint, si chan mi an Flughafe fahre um die Ziit. Da segi natürli ned nei dezue, denn muesi keis Taxi sueche. Dummerwiis verpennt sie und i mues warte, bis sie parat isch... Zuesätzlich hät s'Flugzüg woni erwarte so viel Ruggwind gha, dases scho glanded isch. Wird wohl knapp für mich zum pünktlich si 🙈 Zum Glück hämer wenig Verchehr und siehe da, es isch na niemer in Sicht woni ide Akunftshalle bin. Öppe zwei Minute spöter ischs denn so wiit und de Simon chunnt um de Egge. Lasst die Päärlireise beginnen 🥳 Für di negste vier Wuche sötti hoffentli ned elei unterwegs si. So nach zwei Mönet Trennig gits durchus öpis z'verzelle, was di ganz Rückfahrt und au im Hotel wiitergoht :) Schliessli nickemer namel i, bevormer am nüni wider abgmacht hend für en Tagesusflug id Berge. Namel en Tag ide Stadt bruchi ned ^^ Mitem Minibus (also emene grosse Auto...) werdemer 2.5 Stunde in Richtig Samaipata gfahre und mir beidi freued eus über d'Sicht i di rötliche bewaldete Felshügel. Churz vorem Dorf stiigemer us und spaziered friedlich zum El Fuerte, de bedüdenste Sandsteistätt vo Südamerika. Dete acho gits zerst mal Zmittag und denn spazieremer e Rundi dur d'Städte. Vom Ussichtspunkt über en Tempel wo in Sandstei gmeissled isch und dur Wohnquartier zum Gmeinschaftsbereuch mitem Verwaltigsgebäude. De Baustiel isch immer glich: de unterst Meter isch us Stei, druf chömed Ziegelwänd und es Holz- und Strohdach. Hüt übrig isch nume na de unterst Meter. Lang vor de Inkas, öppe 200 v.Chr. hend sich do scho Lüt agsiedled. Ja und nach dem Rundgang mit fantastischem Blick i di umliegende Hügel simer scho so müed, dasmer ned na is Dorf mitem Museum wend. Wil die wenige Autos und Büs da obe immer zimli usbuecht z'si schiined, meldemer eus bim Fahrer vom Morge zum zrugg cho. Er isch grad na mit anderne Lüüt unterwegs, mir sölled ihm entgegelaufe, er chömi i so 20 min. Wie erwarted werded us dene 20 öppe so 70 Minute und mir sind scho fast wider ade Hauptstross une woner uftaucht ^^ Völlig kaputt stiigemer i und lönd eus zruggfahre. Bald mal fangts a iidunkle, was super usgseht :) Zrugg im Dorf gits mit de andere zwei usem Taxi Znacht (Riis, Pommes & Poulet ^^) und denn gömer schnuerstraks is Bett. Das isch ufgrund vode Nächt vorher en durchus astrengende Tag gsi 🙈Read more

    See translation
  • TravelerLatinamerica: Bolivia & Peru
    Day 75

    Santa Cruz

    May 10, 2023 in Bolivia ⋅ ☁️ 26 °C

    Usschlofe isch agseit 🤗 Denn heissts mal wieder packe bevormer eus uf de Weg zum Busterminal für d'Reservation vom Nachtbus uf Sucre hüt Obig mached. Zum laufe isches es bitzeli wiit und uf Taxi hämer kei Lust, drum hoffemer, dasmer s'Bussystem gnueg guet verstande hend zum so as Ziel cho. Es git Ringstrosse um s'Zentrum und mir gönd devo us, dass d'Büs eifach dete rundumefahred. Also stoppemer eine (Büs sind do so Minibüs) und stiiged i und siehe da, es funktioniert sogar ^^ Am Terminal landemer zerst bide Waretickets und froged eus halt dure bis zum richtige Ort. Es bitz spöter hämer Billet und gönd z'Fuess uf de Zruggweg. Unterwegs organisieremer e SIM-Charte für de Simon (dasmal ohni Problem), Bargeld, en Adapter für mis Notebook (was gar ned mal sooo eifach z'finde isch) und hend denn schliesslich Hunger. Per Zuefall gheiemer namel eusne Kollege vo gester über de Weg. Viel Touriste häts do ned, aber mer findets trotzdem wider ^^ Denn schlenderedmer dur Souvenirlädeli inen super gmüetliche Innehof miteme Beizli für s'Zmittag :) Nach dem gönnemer eus es feins Glace und höckled bitz im Park ume. Schliessli gömer is Hotel go Gepäck fasse und lönd eus vode Olga an Terminal chauffiere. Pünkltich wie bstellt simer 30 min vor Abfahrt dete, zum denn meh als es Stündli warte bis mal en Bus uftaucht. Schiint do glich z'funktioniere wie in Ecuador 😂 De Bus selber isch zum Glück zimli gmüetlich und au für d'Nacht usgleit im Gegesatz zu mine Nachtbüs in Ecuador. Mir hend eus mit Sandwichzüg für s'Znacht iigrichted, was aber ned nötig gsi wär wil sowohl am Terminal als au im Bus werded chalti und warmi Znacht verchauft... Minimal störend zum ischlofe sind es paar anderi Passagier, wo no ned im Ziitalter vo Chopfhörer acho sind und dementsprechend werdemer vo Gamemusig, Facebookvideos und Fuessballspiel beplätschered... Janu, irgendwenn chrösemer trotzdem i :)
    Santa Cruz isch genau das gsi woni ghört ha sege: ned viel usserd en Flughafe. I freue mi uf schöneri Städt und meh Natur :)    Read more

    See translation
  • TravelerLatinamerica: Bolivia & Peru
    Day 76

    Sucre - la capital

    May 11, 2023 in Bolivia ⋅ ☁️ 19 °C

    D'Nacht und de Schlof sind so naja aber mit dem hämer ja grechnet. De Sunneufgang gnüssemer usem Bus use, während de sich de Berg duruf kämpft. Au Zmorge gits im Bus. Pünktlich nach 12 Stunde Fahrt simer am Terminal z'Sucre und mached eus miteme Taxi uf de Weg zude Unterkunft uf de andere Stadtsiite. De erst Iidruck isch super: bitz ruhiger, dütlich schöner und familiärer. Im Hostel chömer scho s'Zimmer bezieh und chömed grad au Tips für d'Stadtbesichtigung über vom Eddy, em Bsitzer. Z'Fuess machemer eus uf de Weg zum Ussichtspunkt El Mirador. Dete und unterwegs hämer so halbe gueti Usblick uf d'Stadt, drum stiigemer denn au na uf eine vode Huushügel, womer e na besseri Sicht erwarted. De Ufstiig isch astrengender als erhofft, de 3000 müM sei Dank... Dobe findemer e tolli Ussicht uf d'Umgebig, de Blick uf d'Stadt isch aber recht vo Wald verdeckt. Ja richtig: Wald. D'Baumgrenze isch do definitiv viel höcher als bi eus. Ide Jesusstatue do obe isch e chlini Kapelle integriert, wo s'ganze Johr zuegänglich isch und für Ritual gnutzt wird. Mir gnüssed d'Rueh miteme chline Snack.
    Wider zrugg ide Stadt stoppemer es Taxi in Richtig Parque Cretácico, de weltwiit grösste Fundstädte vo Dinosaurierfuessabdrück. 1949 sind während Abbauarbete vo Kalkstei di erste Abdrück entdeckt worde. Inzwüsche sinds über 12'000. D'Bilder zeiged d'Dimensione vode Wand. Früehner isch de Weste vo Südamerika und dementsprechend au Sucre en riese See gsi. Im Lauf vode Ziit hät sich alles erhobe und die Platte sich au ufgstellt. D'Platte bestoht us verschiedene Schichte us mehrere Jahre und mit jedere Schicht wo verwittered, werded neui Spure freigsetzt - faszinierend. Vo Dinos verstohni immerno ned so viel, aber es sind uf jede Fall alli vier grosse Familie do vertrette gsi, au de T-Rex :) Zuesätzlich zum Museum chömer mitere Füehrig bis ad Spure ane. Beidruckend, die Grössi! Ja und denn isch das verbi und mir gönd mitem Dino-Bus zrugg is Zentrum und essed dete wider traditionell und für zwei Franke super billig aber fein Zmittag. Ufem Weg zrugg is Hostel machemer en chline Umweg über de Friedhof, wo extrem gross isch wil i verschiedenste Chrieg leider viel Brutalität gherrscht hät und au immer mal wider Indigeni i grosse Menge besitigt worde sind. Dur d'Grössi isches aber au sehr ruhig im Friedhof und er isch sehr schön organisiert. Perfekt, zum di mitbrochte lokale Guetzli koste ^^
    Zrugg im Hostel müemer mal schnell über di negste Täg rede. Eusi Planig lauft zimli sehr spontan aber glaube das isch do allgemein gar ned so schlecht... Online bueche chosted anschiinend eh immer z'viel. Fazit nacheme Gspröch mitem Eddy und es bitz google: morn wandere ide Nöchi, übermorn am Morge mitem Bus uf Potosi für Besichtigung vo Silbermine und denn mitem Nachtbus uf Tupazi, womer vermuetli e viertägigi Tour in Richtig Uyuni-Wüesti atretted. Mal luege obs denn au würkli so chunnt aber e Idee hämer mal ^^ Denn gömer frisch usebutzt namel id Stadt, womer e Free Walking Night Tour bueched hend. Unterwegs müemer na schnell d'Tour für morn go zahle und schneugged es ungsunds Znacht to go. Denn füehrt eus de Manu dur d'Stadt, erklärt verschiedeni Sache zude Gschicht, Gebäude, Strasse, Mensche und Kultur vo Sucre:
    - Di "Wiessi Stadt" isch di offizielli Hauptstadt vo Bolivie. Das wird aber immer mal wider agfechted vo La Paz, wo di inoffiziell Hauptstadt und au de Regierigssitz isch
    - 1909 hät vo Sucre us de Unabhängikeitschrieg gstarted und sich aschlüssend in ganz Südamerika usbreited. De Uslöser defür: Frankriich isch in Spanie imarschiert und hät dete d'Regierig gstürzt. Sucre hät also nüm s'Bedürfnis gha, amene instabile Land aghöre.
    - 350'000 Lüt lebed do. 30 - 40'000 devo sind Studente
    - D'Uni isch 1662 gründet worde und zellt zude beste in ganz Südamerika
    - Sucre hät scho vier Namensänderige hinter sich
    - und natürli vieli Infos meh :)
    Au en Stop inere chichería liit dine. Das isch e Bar, wo di Indigene us de Region ihri selber braute Schnäps serviered. Mir probiered zwei verschideni Schnäps, eimal mit piña und eimal mit tumbo. Fein und fruchtig sind beidi mitem süesse Gschmack :)
    Mir sind beide zimli müed und hend je länger je meh Müeh, alles mitübercho 🙈
    Nach de Tour gönnemer eus na es süesses Dessert imene Café und gheied denn kaput is Bett. So Stadtbesichtigunge sind eifach immer astrengender alsmer denkt...
    Mim Chnü gohts übrigens wider fast perfekt aber ich unterstützes zur Sicherheit immerna mitem Strumpf und Sälbeli...    Read more

    See translation
  • TravelerLatinamerica: Bolivia & Peru
    Day 77

    Cráter de Maragua

    May 12, 2023 in Bolivia ⋅ ⛅ 13 °C

    Fast usgschlofe gnüssemer hüt es rechts Zmorge im Hostel. Denn werdemer mit nume 10 Minute Verspötig vo eusne Tourguides abgholt. Es stoht en Tag im Maraguas-Krater a. D'Crew bestoht us eus zwei, emene Fahrer, emene Guide und enere Guidepraktikantin. Mir hend also sicher gnueg Betreuuig ^^ Uf de zweistündige Hiifahrt machemer Halt zum Tablette und Coca-Blätter poste zum eus uf di immer höcher werdendi Meereshöchi ide negste Täg und Wuche vorbereite. De Marcello, eusen Guide, verzellt au scho fliessig vode Region und frogt eus allerlei Sache über d'Schwiiz. Mir reded es lustigs Gmisch us Spanisch und Englisch, je nach Thema ^^ D'Stross wechsled vo neu teered uf Pflasterstei und für di zweit Fahrstund schliessli uf Staubsteistross ^^ Uf de Höchi vode erste Hügelchetti started eusi erst Wanderig. Ufem Inkatrail schlänglemer eus abe is Tal und gnüssed debi di fantastisch Sicht uf d'Ande und de Maraguaskrater 🤗 700 Höhemeter wiiter une warted euse Pickup und bringt eus wiiter is Dorf Maraguas, wo inmitte vom Karater liit. Dete gits es mitbrochts Zmittag. Wie de Krater entstande isch, weissmer no ned so genau:
    - Theorie 1: Meteoriteischlag. Für eus unwahrschiindlich, für das isch de Krater z'unregelmässig
    - Theorie 2: es isch en Vulkan, womer wege umliegendem Gebirge ned als sottige erkennt. Chan si, glaubemer aber au ned so recht
    - Theorie 3: es treffed a dem Ort vier Platte ufenand wo während de Bildig ned wie normal nach ufe sondern nach abe druckt hend. Für d'Guides und au eus isch das di wahrschindlichst Vatiante...
    Im Dorf (also Kaff) selber lauft nüt wil di wenige Bewohner uf de Felder am schaffe sind. S'Land eignet sich guet für Landwirtschaft, isch aber aktuell au dütlich z'troche und so sind d'Erträg au sehr chli. Es wird vorallem Weize und Mais apflanzt und es hät es paar Chüeh, Schöf und Säuli ume. Gmacht wird alles na vo Hand wil d'Maschine eifach z'tüür sind. Ide Schuel sind insgesamt öppe 30 Chind, wo us allne umliegend Wiiler und Hüser zemegsammled werded. Fürs Studium und s'junge Erwachsenelebe ziehts denn di meiste Lüt id Stadt - verständlich wil do gits würkli nüt usser Landwirtschaft und Hügel... Nach de Stärchig fahremer zum Usgangspunkt vode zweite Wanderig. Die füehrt eus verbi ade "Regebogefelse vo Bolivie", wo de Felse dank verdchidene Mineralie i verschidene Farbe schimmered - beidruckend und unnatürlich schön :) Nachere Halbstund erreichemer s'Ziel: Dinospure. Nume asatzwiis so gross wie die gester aber defür frei zuegänglich. Anschiinend isch die Steiplatte erst vor öppe 20 Johr nach hefitge Regefäll freigspüelt worde. Mir gnüssed do d'Sunne und d'Rueh binere usgiebige Pause, bevors wider zrugg is Auto goht. D'Höchi merkemer au hüt nume atemtrchnisch aber ohni Chopfweh oder so. Obs ade Coca-Blätter liit? Uf de Zruggfahrt haltemer bim Wasserfall "Garganta del Diablo", wo trotz sine 40 Meter Höchi ned soo beidruckend isch, wiler sehr wenig Wasser hät. E chlini aber schöni Höhli isch au na Teil vo dem schöne Flecke Erde. Nach dem Stop folgt e zweistündigi Rückfahrt id Stadt, wobi mer bide Fahrt entlang vom Inkatrail de Sunneuntergang bestuuned und nachher besti Sicht uf d'Liechter vode Stadt hend :)
    Ide Stadt selber steckemer es bitz im Verchehrschaos fest, gönned eus e heissi Duschi und mached eus denn uf Pastasuechi. Das mitem Riis und Poulet hämer grad satt ^^ Natürli werdemer fündig und lönds eus miteme guete Esse, lokalem Bier und emene bolivianische Gläsli Wii guet go - hämer eus verdient hüt :)    Read more

    See translation
  • TravelerLatinamerica: Bolivia & Peru
    Day 78

    Potosí - minas de plata

    May 13, 2023 in Bolivia ⋅ ☀️ 11 °C

    Mir halted a eusem Plan fest und nehmed hüt am Morge en Bus uf Potosí. Chum stiigemer zum Taxi us, werdemer vo Billetverchäuferinne überrennt. Wie söll mer da nume de Bus finde, wo als ersts goht und bequem isch...? Eifach probiere halt. De erst wo losfahrt hämer sicher ned verwütscht. Er hett sölle 08.30 starte (was eh schwirig isch wil mir 08.40 am Terminal gsi sind ^^), loht sich denn aber Ziit bis 09.15. Ich gange mal devo us, er warted eifach biser voll isch. Ja und d'Fahrt isch denn recht gmüetlich und schön. Zerst gohts abe und denn wider ine beidruckend grossi Hochebni ufe. Wo die fertig isch, so ca. 30 km vor Potosí, ghöremer es komisches Grüsch und vo denn a fahremer nume na im erste Gang mit öppe 20 km/h. Das wür denn heisse, dasmer statt wie mal denkt am Mittag erst öppe am zwei achömed und das widerum chönnt en Seich geh wilmer vernuetli am 22.00 wider en Nachtbus nehmed. Tja, chömer ja ned ändere... Nach 20 km heissts plötzlich usstiige, si hend entgege mine Erwartige tatsächlich en Ersatzbus organisiert und so gohts wider i normalem Tempo de Berg ufe :) Dummerwiis werdemer ned wie bueched zum Busterminal brocht, sondern afangs Stadt usegschmisse. Danke für nüt, do chömer weder eusi Tour für de Nami na de Bus am Obig bueche. Also frogemer eus dure bismer eine vo dene Minibüs stopped, wo eus an Terminal bringt. Isch au nume es bitz müehsam mitem grosse Rucksack aber mir schaffeds... Dete findemer en Abüter für eusi Strecki, wo so halbmotiviert Tickets usstellt. Guet, namel öpis gschafft aber agspannt bini trotzdem na wili no ned weiss, obmer das mit de Tour hüt Nami na schaffed oder ned. Es isch immerhin scho drü. Und Hunger hani au ^^ Mir schnapped eus wider en Minibus is Zentrum zum das mit de Tour regle. Unterwegs zum Quartier mit de Agencies schneuggemer endlich mal öpis chlises und scho fühli mi besser ^^ Bald werdemer fündig und chönd problemlos na für hüt Nami e Tour id Silbermine bueche - für die isch di höchstglegni Grossstadt vode Welt bekannt und au entstande. Vorem Tourestart spazieremer chli dur di hügelig Stadt, essed na meh und trinked es Bierli. Jetzt woni weiss dass alles klapped bini wider entspannter :)
    Pünktlich startemer d'Tour id Mine ohni wiiteri Teilnehmer. Defür werdemer mit Gummistiefel, Schutzkleider und Helm mit Stirnlampe usgrüsted. Zerst machemer Halt bimene Lädeli wo au d'Mineure am Morge iichaufed. Dete gits ganz viel Informatione zur Arbetsvorbereitig vode Mineure. Wil d'Täg zum Teil bis 20 Stunde gönd und sie denn nüt essed, isch s'Zmorge riesig und sie helfed sich dur de Tag mit Cocablätter. Bi normalem Konsum pushed die für öppe drü Stunde, wemer vorher e spezielli Zigarette us schwarzem Tabak, Anis und Orange raucht hebeds sogar siebe. Oder denn gitses au als scho verarbeiteti Riegel mit Gschmack und Tabak, was au siebe Stunde anehebed. Zuesätzlich trinkeds währedem ganze Tag saumässig viel Alkohol und zwar sottige mit 96%... Mir probiered de au und müend sege daser ned grad fein isch... Denn gits au na Infos zum TNT, wos do für d'Sprengige bruched und ohni Genehmigung vo jedem cha kauft werde. Mit es bitz Verstärchig gits en Vortrieb vo 4 Meter mit einere Sprengig. De Berg selber, de Cerro Rico, isch (wenis richtig verstande han) mal 5'170 Meter höch gsi. Dank de Ushöhlig sackter öppe 3 cm pro Jahr ii und isch au na abbaue worde, drum ischer jetz nume na 4900 Meter höch.
    Ja und denn gohts nachere churze Fahrt ab id Mine, wo übrigens komplett privat sind. Mir nehmed eine vo 450 Iigäng, wo au aktuell na in Betrieb isch. Ide Schwiiz wär das defintiv ned möglich ^^ Churz nachem Iigang machemer Halt bimene Dio, enere Statue, wo übersetzt "Gott" heisst. Dete erfahremer viel über d'Gschicht vode Mine. 1545 hend di erste Abbauarbete agfange und zwar vo afrikanische und indigene Sklave unter de Leitig vode Spanier. Zu Spitzeziite hend 5000 - 6'000 Arbeiter ide Mine glebt und sind gar nüme usecho. De Grund: nach eim Johr schaffe ide Mine chunnt mer Silikosis (Staublunge) über und wenn das d'Spanier gmerkt hend, sind d'Sklave umbrocht worde. Bis hüt isch das mit de Silikose es Problem. Staubmaske werded immerna ned brucht wil d'Arbet ide dünne Luft sust scho gnueg astrengend isch. 1810 hät d'Sklaverei ufghört. Während d'Potosianer blibe sind und uf eigni Fust wiitergmacht hend, sind d'Afrikaner in Richtig La Paz zoge, wos wärmer isch. Dete produziereds imene Dorf bis hüt Cocablätter für s'ganze Land. Au bim Dio zue lernemer s'Ritual vode Mineure kenne, wo si bruched zum vode Pachamama kei Problem z'ha im Berg. Und denn gohts richtig los. Mir laufed, chrüched und stiiged entlang vode enge Gäng, gsehnd Silber schimmere, mineralisierti Stalaktite und Stalakmite, Löcher entlang vo Silberadere i all Richitige, stiiged Steihüfe ufe, Leitere abe und präpariered als Highlight en eigne Sprengsatz womer natürli au zünded. Nume scho ein Satz chlöpft ordentlich, i wett ned wüsse wies mitere ganze Ladig isch. Für mich au na unvorstellbar: vo dem ganze 19-stöckige Gangsystem gits kei Charte oder so. D'Mineure wüssed alles uswändig. Wie intressant wärs denn bitte zum alles erfasse?! @Schaukelgäng: wer chunnt go helfe? 🤭 Womer schliessli de Usgang erreiched, isch d'Sunne scho weg. Mir gönd zrugg, gebed alles ab und gönd denn schwer beidruckt uf Pizzasuechi. Nach dere Stärchig bringt eus wider en Minibus an Terminal, womer eus für d'Nacht im Bus parat mached und denn tatsächlich au pünktlich losfahred in Richtig Tupiza. S'Hostel dete hämer informiert, dasmer zmitzt ide Nacht achömed, so daser eus sött d'Türe ufmache :)    Read more

    See translation
  • TravelerLatinamerica: Bolivia & Peru
    Day 79

    Tupiza

    May 14, 2023 in Bolivia ⋅ ☀️ 20 °C

    Siehe da, d'Fahrt mitem Nachtbus lauft so problemlos, dasmer scho znacht am drü statt wie agmeldet am füfi in Tupiza achömed - Überraschig ^^ Es Taxi bringt eus souverän zum Hostel und dete kapeeds au mit Eigetümer useschälle und Zimmer bezieh. So schlofemer e Stund spöter scho wider und gnüssed denn d'Möglichkeit zum usschlofe. Nachem mitbrochte Zmorge machemer eus uf is Dorf zum e Tour für di negste 4 Täg dur s'südliche Gebirge bueche. Bi drü verschiedene Agencies chömemer drü liecht unterschiedlichi Route für de fast glich Priis über. Wieso dasmer eus denn genau für Nr. 3 entscheided, wüssemer ned, isch eifach mal wider s'Buchgfühl ^^ Das ganze hät es bitz länger dured als denkt, so dasmer euses reservierte Riite vom Nami na es bitz hindere schiebed, öpis gönd go esse (es isch usnahmswiis mal ned fein...), Bargeld probiered organisiere, Snacks und Wasser posted und denn fast pünktlich bim Treffpunkt sind 😇 Wil eusen Hostelier das ganze organisiert hät, wüssemer gar ned so genau, was eus erwarted ^^ Mir werded zude Rösser brocht, wos denn grad Cowboyusrüstig git unds schnuerstracks los goht. Am Guide sis Ross isch hyperaktiv, mis ganz normal und am Simon sis zimli lahm ^^ Bald mal simer zum Dorf us und werded vo rotem Felse ide Ferni überrascht. Tatsächlich stüremer uf das zue und stuuned ned schlecht über di beidruckende Formatione Puerta del Diablo, Valle de los Machos und Cañon del Inca. Das hettemer vilicht in Nordamerika und Australie erwarted aber ned do. Ab und zue und ganz im Canyon hine haltemer a zum eus d'Füess vertrampe. Es isch so überraschend wie schön i dene Felse ine, mit Bäum wo meh als 2000 Johr alt sölled si 😍 Anschiinend regneds in Tupiza nume öppe zwei Wuche pro Johr und zwar im November. Dementsprechend troche isches denn au... Au de Zruggweg ide Obigstimmig isch wider schön und nach fast drü Stunde freued sich eusi Chnü und Füdli, dasmer endgültig zrugg sind. Riite isch ja super für so öpis aber halt scho ned sooo bequem ^^ Wil s'Hostel bitz usserhalb vom Dorf isch, erledigemer zerst alles do: ichaufe unter anderem für Brot & Chäsznacht im Hostel, meh Geld organisiere, Dessert esse und Bierli trinke. Währenddesse chunnt eus e Schüelerprozession mit Blasmusig entgege - do losemer natürli gern chli zue :) Die arme Chind müend am Sunntig Obig no öpis mache. Wases genau für en Alass isch, wüssemer ned... Ja und denn gohts miteme Tuktuk-Taxi zrugg is Hostel, wos Znacht und e heissi Duschi git :)Read more

    See translation
  • TravelerLatinamerica: Bolivia & Peru
    Day 80

    Tupiza - Quetena Chico

    May 15, 2023 in Bolivia ⋅ ☁️ 11 °C

    Eusi viertägig Tour started mit de Abholig im Hostel am Morge. Das kapped und churz spöter isch d'Gruppe mitem Guide, de Margaux us Frankriich, de Sarina us de Schwiiz und eus zwei komplett. Ide negste Täg werdemer i dere Gruppe miteme Gländewage ide verlassne Wiite vode südliche bolivianische Hochebne, Berge und Wüestene unterwegs si. Tag 1 bringt folgendes mit sich:
    - Start in Tupiza uf 2'800 m.ü.M
    - Ufstieg (Uffahrt) zu El Sillar, was wunderschöni usgwäschni Felsformatione sind. Inmitte vo dene häts Goldmine
    - Fernsicht vo mindestens 250 km
    - Lamas - sehr viel Lamas. Die lebed so halbe wild, heisst, si übernachted i Hospedajes, sind aber dur de Tag frei unterwegs
    - Geisse uf über 4'000 m.ü.M
    - Strusse
    - Sehr abwechsligsriichi Landschaft. Verlasse isch si immer
    - Vicuñas: di zweite grössere Säugetier nebst Lamas wo do lebed. Si sind ganz wild und derfed au ned gjagt werde
    - Es Nickerchen im Auto
    - Zmittag imene Dörfli. Es git Ghackeds :)
    - Ciudad del Encanto: Intressanti und beidruckendi Formatione wo usgsehnd wie Felse aber eigentli meh Dreck sind 😍
    - San Antonio del Nuevo Mundo: D'Ruine vonere Silberstadt
    - Viscachas, au Pikachu genennt: Wildi Hase miteme lange Schwanz
    - Schneefäll ide ferne Berggipfel. Es chönnt also sehr chalt werde ide Nacht - und mir zwei hend s'Gfühl gha dasmer kein Schlofsack bruched. Hoffentlich chunnt das guet...
    - De Sunneuntergang ufem höchste Punkt vode Route uf fast 4'900 m.ü.M. - hermoso! Au uf dere Höchi gits immerna e "Stross". So höch isch ned mal de Mont Blanc, und do chömer immerna fahre ^^ D'Wulche sind zum griife nöch oder sogar unter eus!
    - Laguna Morejon ide Obigdämmerig
    - Wiiterfahrt im Dunkle mit Sternehimmel
    - Total 280 km und meh als 2'000 Höhemeter uf Staub- und Schotterstrosss
    - Hostelbezug - uff das wird chalt. Duschi gits keini (oder amel nume e iischalti)
    - Sterne und Milchstross luege - wow! Es isch fast Leermond und dementsprechend guet gseht mer d'Sterne
    - Super feins Znacht

    Ja und mit dem goht de erst sehr beidruckend Tag z'End. Di verschidene Landschafte, Tier, d'Höchi und Einsamkeit bringed sehr viel Idrück zum verarbeite mit sich. Dank dem und de Chälti hani so mini Müeh zum ischlofe aber es klapped und ich hebe fast bis am Morge dure. Nach de Pinkelpause zrugg is warme Bett chrüche isch übrigens super agnehm und warm ^^    Read more

    See translation
  • TravelerLatinamerica: Bolivia & Peru
    Day 81

    Reserva Nacional

    May 16, 2023 in Bolivia ⋅ ☀️ 7 °C

    D'Nacht isch alles i allem gar ned mal so schlecht gsi und di negste sötted eigentli wärmer werde wilmer wider tüüfer gönd :)
    Nachem packe gits es super Zmorge und denn gohts wider los mit eusem Auto. A dem sinds immer es bitz am schrübele, anschinend häts weniger Power alses sött. Das hämer gester au gmerkt wil immer wenns ufe goht überholed eus all andere ^^ Janu, so hämer meh Ziit zum gnüsse und solangs lauft isch ja guet. Also zu hüt:

    - Erste Halt: Lamahospedaje: Mir chönd quer dur s'Freilaufghäg und d'Lamas schlendere und dene bim Widerchäue zueluege
    - Laguna Hedionda Sur vo Wiitem: so früeh am Morge isches na chalt und es stört eus ned, dasmer ned länger spaziered. S'wiesse isch ned öppe Salz sondern Borax
    - Laguna Kollpa: Ganz viel Flamingos sind uf Fuettersuechi 🤭 Langsam taued au mini Füess uf
    - Durchfahrt vode Salar de Chalviri: die bestoht zu 5 % Salz, 20% Borax und de Rest bini ned sicher aber nime mal a Staub und Dreck. D'Durchfahrt isch marsartig 🥰
    - Desierto de Dalí: E Staubwüesti, ziert vo Felsbröcke wo währedeme Vulkanusbruch gstreut worde sind
    - Di wiessi Farb ide Berge isch do Schwefel
    - Laguna Verde: Bestoht us drü Mineralie. Je nach Sunne, Wind und so zeigt si sich i unterschideliche Farbe. Glichziitig hämer Sicht uf Licancabur und Juriques, wo Grenzvulkän zu Chile und nume no öppe 10 km vo eus entfernt sind
    - Nickerchen im Auto
    - Es wird au hüt wider richtig heiss im Auto. Ich höckle hüt vorne und han d'Sunne de ganz Tag frontal uf mir, wasi au gnüsse aber Klimaalag hämer keini und Fenster ufmache isch mitem Staub ned möglich, drum ischs sehr heiss und stickig
    - Bädele ide vulkanische Terme: Es git zwei verschiedeni Temperature, wobi di heisser scho zimli usefordernd isch für de Kreislauf ^^
    - Esse bide Terme
    - Geysire Sol de Mañana: beidruckend, stinkend, schön und gemäss Guide di einzige in Bolivie. Das glaubi aber ned, han scho vo andere glese... D'Termalenergie wird für di nöchglegeni Militärstation gnutzt
    - Laguna Colorado: Mineralie, Flamingos, Lamas und Vicuñas gits do. Kompletts Programm also. Mir mached en wunderschöne, sehr windige und recht chalte Spaziergang
    - Bitz meh als 200 Autokilometer ide Höchene vo Bolivie
    - Hostelbezug mit Doppelbett - mal luege ob das wärmer isch als letst Nacht ^^
    - Sunneuntergang knapp verpasst aber Dämmerigsspaziergang trotzdem schön
    - Tee & Guetzli
    - Pläuderle
    - Znacht
    - Sterne luege und probiere fötele mit de Kamera. Ha aber z'wenig Geduld und de Wind isch au z'bissig zum Erfolg ha. Zum Glück gits Lüüt mit Handykameras, wo das alles automatisch erlediged und super Fotis chönd mache :)

    Und denn isch scho wider Ziit zum all die neue Idrück inere möglichst lange Nacht verarbeite. Ischlofe isch au hüt s'zweite na recht chalt aber es goht besser als gester :)    Read more

    See translation
  • TravelerLatinamerica: Bolivia & Peru
    Day 82

    Reserva Nacional - Salar de Uyuni

    May 17, 2023 in Bolivia ⋅ ☀️ 14 °C

    Au hüt bini trotz de einigermasse chalte Nacht recht usgschlofe wo am halbi sibni de Wecker schelled. I gseh dases recht schöni Morgestimmig isch dusse, drum gömer grad all go luege vorem packe und zmörgele. Es isch totestill, mer ghört eigentli nume d'Flamingos us de Ferni :) Zum Zmorge gits hüt Pancakes - mmh. Und denn stoht wider e Autofahrt mit Zwüschestops a:

    - Mirador Laguna Colorado
    - Endlosi Desierto Siloli uf 4'600 m.ü.M mit Arbol de Piedra und wiitere lässige Steiformatione, wo vo Wind und Sand über d'Johr gformt worde sind
    - Yareta = Moosartigs Grüenzüg uf Vulkangstei
    - Ussichtspunkt Montaña siete colores
    - Laguna Ukhuqucha (Laguna Honda): Di erst vo vier nöch zemeliggende Lagune. Si erschiint übrraschend hinteremene Hügel
    - Laguna Chiar Khota (Laguna Negra)
    - Smelly Lake (Laguna Hedionda): Vorallem i dere Lagune häts wider Flamingos. De Grund: do gits es Dörfli und d'Touris füettered d'Flamingos
    - Laguna Cañapa: Di letst vo dene vier und au namel wunderschön mit viel Boraxablagerige
    - La Niña de quemes: Spaziere mit Ussicht uf aktive Vulkan Ollagüe mit Rauchwölkli. Denn Zmittag naja und Wii dezue au naja
    - Au hüt isches sehr windig. So windig dasmer e Windrose gsehnd :)
    - Autowrack am Strasserand. Sehr neu, zum Glück ned wie zerst befürchted vo eusne Kollege
    - 10 km vor de Grenze zu Chile bügemer wider ab in Norde
    - Überquerig Bahngleis Chile - Bolivie. Bahn wird nur no für Güeter gnutzt. Barriere oder so isch Fehlazeig
    - Salar de Chiguana. Do sind 5% vom Salzvorkomme, in Uyuni 95%
    - En Güeterzug taucht uf 😍 D'Fotis werded schlecht. Anschinend hani gester nach de Sterne e Istellig ned zrugggsetzt unds bis jetz ned gmerkt wili immer sehr viel Sunne uf de Bilder gha han. Janu, muesi halt lerne nochebearbeite...
    - Stop in San Juan. Dete isch es ganz chlises Quinoa-Museum im Dorflädeli integriert. Di wenige Dörfli im Niemandsland ernähred sich hauptsächlich vo Lama und Quinoa, meh wachst anschinend ned. Es git es Glace und es Bier zur Erfrischig :)
    - Akunft im sehr schöne Salzhotel uf 3'600 m.ü.M nach 300 km Fahrt hüt. Bezug vo Zweierzimmer - sehr nice :)
    - Sunneuntergang ide Salar de Uyuni 🥰

    Währedem Sunneuntergang wirds scho wider richtig chalt und mir freued eus druf, dasmer hüt endlich mal chönd warm dusche. Nach Tee & Guetzli isches denn so wiit, nume wetts bi mir leider nur so drü Sekunde lang klappe mit heiss Wasser... Warti halt namel en Tag, jetz chunnts au nüm drufa und nachere chalte Duschi heizt ja de Körper besser uf ^^ Bisi fertig bin isch s'Znacht scho parat. Es git Spaghetti. Die sind zwar ned grad italienisch aber i findes trotzdem super fein :) Chum simer fertig gits na Unterhaltig vo drü Chinder usem Dorf, wo chömed go Sackgeld (oder wohl ehner Familieunterhalt) verdiene mit es paar eifache Liedli wos dezue "tanzed". Herzig aber bitz lang und langwilig... Nach dere Vorstellig gohts ziitig is Bett, wil morn wemer für de Sunneuntergang scho ide Salzwüesti si :)
    So langsam aber sicher frogemer eus, wiemer eigentlich ab morn Namittag wiiterreised. Grad en Nachtbus oder e Nacht in Uyuni? S'Dorf selber hegi absolut nüt z'büte seit mer. Mal luege wemer wider Internet hend. So e heissi Duschi anstatt en Nachtbus wär scho verlockend...    Read more

    See translation
  • 2024© FindPenguins
  • Home
  • About us
  • Blog
  • Group Tracking
  • Press
  • Terms
  • Privacy Policy & Cookies
  • Support
  • Legal notice
  • English