La Paz - cultura

Die lang Nacht hämer eus verdient :) Währedem Zmorge burchemer na schnell d'Free Walking Tour für inere Stund und chömed denn irgend e Parade vornde Stross mit Tanz und Musig mitüber. Das wemer ned verpasse, drum wird schnell packt und denn gömer es bitz go luege. Überall isch gstueled, das schiint also öpis grössers z'si. Findemer sicher bide Tour meh dezue use. Dur en grosser Strossemärt bahnemer eusen Weg zum Trffpunkt. Als ersts gits Infos über s'Gfängnis San Pedro, wo öppe 3'000 Häftling drin lebed. Speziell: Polizei isch nume usserhalb. Dine wird alles selber vode Häftling gregled und es funktioniert anschiinend fast wie e eignes chlises Dorf. Unter anderem wird dine s'reinste Kokain vo ganz Südamerika produziert und das wüssed au alli. Wieso dases niemer intressiert? Polizei und Regierig sind korrupt und profitiered devo... Nach dem intressante Start schlenderemer dur de Rodriguez Märt, womer ufem Aneweg scho atroffe hend. Uffällig sind di viele verschiedene Härdöpfelarte. In ganz Bolivie gits öppe 2'000 Arte wilmer lang de perfekti gsuecht aber ned gfunde hät. Unter anderem gits au tröchneti Härdöpfel z'chaufe. Au uffällig isch, dass nume Fraue verchaufed. Anshiinend wil sie frünlicher sind und besser chönd mit Geld umgo als d'Männer ^^ Obwohls unzähligi Ständ mit de gliche Produkt git, gömd d'Lüt immer zude gliche Frau, wo sich denn irgendwenn "Casera" nennt. Vieli vode Fraue träged di traditionell Chleidig, wo aber natürli au europäisch beiflusst isch. D'Röck sind übertribe hüftbetonend, wil das e gueti Geburtsfähigkeit zeigt, was immerna sehr wichtig isch. Und d'Hüet, wo z'chli sind für d'Chöpf, sind trotzemene Lieferfehler dur es bitz Glück zum Renner worde. Nice tocknow: wer de Huet grad treit, isch vergeh. Schief bedüted single, verwitewd oder susr useme Grund z'ha...
Als negsts gohts dur de MÄRT, womer alles chan chaufe, womer für es Ritual für d'Pachamama brucht: Hochprozentige Alkohol, Süessigkeite i allme Farbe, Forme und Grösse, Zucker, Bier und Babylamas. Grundsätzlich gits drü Ritual: s'erste zum d'Muetter Erde um öpis bitte, s'zweite zum danke und s'dritte zum um Erlaubnis zum uf ihrem Land baue bitte. Für s'dritte werded denn au d'Babylamas als Verbindug unterem Huus gopfered.
Zum Schluss landemer ufem Hauptplatz mit de Regierigsgebäude. E churzi Erinnerig: Sucre isch di offiziell Hauptstadt, trotzdem wird aber alles in La Paz verwalted. De Guide verzellt einiges über di strub Gschicht vode Präsidente vo dem Land. S'Fazit: di miserable werded widergwählt, di einigermasde okeye bringeds um und en richtig guete hends no gar ned gha. Zuesätzlich erfahremer, dass Bolivie di stabilst Wirtschaft und e sit Jahre stagnierendi Inflation hät - wasmer vo allne andere Länder in Südamerika ned chan behaupte. Dass das uf sehr tüüfem Niveau und vorallem dankere intelligent korrupte Regierig isch, müemer ja ned z'luut sege... Nach dene vielne Infos hämer es Hüngerli und vorallem de Simon en rechte Drang, zum wider zu dere Parade go. Anschiinend wird do de Lord of the great Power gfiired und es isch erst d'Preparty vo negst Samstig, wo denn d'Parade würkli dur di ganz Stadt goht und alles na viel verruckter isch. Mir findeds jetz scho zimli extrem ^^ Ja und so passierts dasmer e Pizza gnüssed und denn und zwei vode Plastikstüehl platz nehmed und eus die negste siebe Stunde mit Bier trinke, Tänzer und Musig zueluege und zuelose, mit Locals rede wo nebed eus hocked und snacke verbringed. D'Bolivianos hend recht Freud a eus Touris, wo so usduurend mitfiired und mir eigentlich au :) Eimal wirdi ufgfordered zum go mittanze und jeglichi Abwehrversüech werded ned erhöhrt. Anschinend höts zimli überfordered usgseh ^^ Wo am nüni (oder so - s'Ziitgfühl isch Flöte gange...) de Umzug fertig isch, gömer na mit de Locals mit inen "Club". Es sich eignetli meh wie es Resti mit luuter Musig und es bitz Tanzflächi aber egal, lustig hämer. S'Highlight isch, wo plötzli DJ Bobo lauft ^^ Schliessli machemer en Abzug, wo sie gern hetted dasmer na meh zahled obwohl di erst Rundi scho uf eus gange ich - nei danke, für das müemer ned blibe. Ja und so goht en gmüetlich und lustige Tag voller bolivianische Tänz und Musig z'End :)Read more