La Paz - teleférico

Hui ja die Nacht isch gar ned mal soo guet gsi aber janu, nachem Zmorge gohts scho fast guet :) Und denn heissts endli mal ufruume und alles wider am richtige Ort packe. Sitem ein Huayna Potosí isch alles eifach immer irgendwo glanded... Und glichziitig gnüssemer au namel die Duschi ^^ Bim Checkout erfahremer, dass d'Büs in Richtig Dschungel ned wie erwarted im Stadtzentrum fahred. Drum setzemer ufbd'Charte "wird scho spontan ohni Platzreservation klappe wie immer", lönd s'Gepäck in Hotel und spaziered zude Kathedrale, ide Hoffnig dass sie offe hät und siehe da, es isch anschiinend grad Pfingstmäntigsgosttesdienst womer schnell es bitz zuelueged und losed. Und denn hämer eus für s'Zmittag es Resti vorgno, wos fancy lokals Esse söll geh. Anschiinend simer ned di einzig mit dere Empfehlig wil d'Warteschlange isch scho 30 min vor Öffnig einigermasse lang. Mir blibed, warted und chömed tatsächlich mit de erste Ladig ine :) Ja und denn gohts los miteme vierngäige Gricht woni d'Näme wider vergesse han aber es isch uf jede Fall zimli genau wie versproche: fancy, lokal und fein. Verschiedesti Gschmäcker werded und für eus komischi Arte zemegmischt und schön präsentiert - njami :) S'beste: tüürer als bim Inder isched denn au ned ^^ Guet gsättigt machemer Platz für wartendi Mensche und stüüred uf e Seilbahnstation zue. Eusen Plan isch e Stadtrundfahrt mit Stops, wo au immer mer grad wend. Zerst gohts wiit abe, inen neuere und riichere Stadtteil, womer en churze Spaziergang mached. Debi findi endli en Schoggigipfel, woni sit öpoe drü Wuche am sueche bin! Nachher gohts mit de negste Linie id Höchi vom Stadtteil El Alto - immer mit bester Ussicht natürlich :) Dete dobe gnüssemer denn de Schoggigipfel (wo zwar ned mit Schoggi sondern Caramel gfüllt isch aber trotzdem guet isch ^^) und amched eus denn uf de Zruggweg zum Hotel. E perfekti Beschäftigung für sonen halbverkaterete Namittag :) Vom Hotle bringt eus es Taxi zum richtige Busterminal und vo denn a wirds chaotisch. Anschiinend fahrt nume na ein Bus hüt uf Rurrenabaque und nacheme Telefon vode Bustdame müemer feststelle, dass dä scho voll isch - scheibe. Alternativ chömer es Taxi neh, isch aber z'tüür und unbequem über Nacht. Und sus? Irgendwenn chunnt d'Busdame wider und seit, mir chönd au en normale Bus neh en Teil und denn umstiige inen Nachtbus. Tönt semiverlockenfd aber immerhin isches e Lösig ohni dasmer en andere Terminal bruched, wos denn vilicht au ned klapped. De Bus fahrt aber i 10 min und mir sötted dringend (sehr dringend wil mir hend na genau 20 BOBs) Geld ha. De erst Bancomat frisst mis Chärtli und spuckts nüm us - danke, genau das hani jetz brucht... Also trennemer eus. Ich organisiere Znacht und es WC, de Simon Geld. Pünktlich und immerna schüch gstresst simer bim Bus. Natürlich zum denn na 15 min warte, biser tatsächlich abfahrt 😂🙄 Aber ja, mir sind imene Bus i di richtig Richtig. Nach vier unbequeme Stunde hämer d'Bergchetti hinter eus glo und stiiged 4'000 Meter tüüfer zum Bus us. Am Terminal frogemer nacheme wiitere Busbuf Rure. De Typ meint "ahorita" fahrt eine. Wörtlich übersetzt heisst das "jetz sofort". Normalerwiis bedüteds "mir gönd so inere Viertelstund". Hüt bedüteds, dass de Bus scho gange isch aber namel chan ufghalte werde für eus - perfekt, zum Glück hämer wider Geld 😅 Obs de letst Bus gsi isch für hüt hämer ned usegfunde aber isch vilicht au besser wüssemers ned ^^ Und so höcklemer imene richtige Nachtbus und chönd sehr beruhigt schlofe :) Also mir probiereds, wil d'Stross isch imene so schlechte Zuegang, dases e chli schwirig isch di erste füf Stunde. Zwüdchedine gits mal irgend e Kontrolle, wo en Polizist verbichunnt und vo wiitem d'Rucksäck kontrolliert. Wirde scho fast grundlos nervös ^^ Schliessli wird d'Stross ruhiger und es klapped so guet mit schlofe, dasi d'Akunft in Rure verpasse 🤗 Es isch erst halbi sechsi und frühner als denkt, drum isch eusen Plan jetzt am Terminal hänge bis d'Agencies ufmached zum na für hüt en Dschungeltrip bueche. Bald mal haut eus eine a, wo öpis vomene Kolleg und sim Agebot verzellt und eus zum Dorfbeck bringt, zum eus dete mit ihm treffe. Easy, isch gmüetlicher dete als am Terminal. Währedem heissi Schoggi trinke chömemer e chlini Füehrig und es Süessigkeitetsting über, vomene stolze französische Bäckermeister 😀 D'Tour vom Kolleg isch irgendöpis survival-artigs und das wemer ned. Also wartemer na bitz länger (und miteme sehr frische und feine Schoggibrötli) bis en Abüter mit sehr guete Recensione öffnet und gönd denn bi dem verbi. Sis Agebot tönt sehr guet: drü Täg Dschungel und zwei Täg Pampas, wos denn meh Tier söll ha. Chosted verhältnismässig gnueg aber egal, für eus immerna guet zahlbar. Bis das ganze losgohts, hämer na e Stund Ziit zum en Snack und Geld für d'Bezahlig organisiere. Tiptop, hät also doch na alles klapped so wiit 🤗Baca lagi