Beaches und Hula

Was ghört me in Maui am Strand? E chräiende Güggu. Hie uf Maui hets vieli wild lebendi Hüehner, Bibili und äbä o Güggle. Di gseht u ghört me überall, auso o a de Stränd. D Gastgeber vom letzte B&B hei üs fasch scho chli spöttisch verzellt, dass es uf Kauai viel meh wildi Hüehner heig. Mir si auso gspannt druf, ob das würklich so isch..
Hüt heimer der Weste vo Maui bsuecht und e ruehige Tag igleit. Mir si a Big Beach ga bade, när chli ar Küste entlang gfahre, hei di schöni Ussicht gnosse und immer mal wieder bimene Ussichtspunkt ghalte. Ds Highlight vom Tag isch ds Nakalele Blowhole gsi, wo mer lang bliebe si und vieli Fotos knippst hei. Das Blowhole isch so was wie e Geysir, wo aber nid heisses Wasser, sondern Meereswasser useme chline Loch höch id Luft sprützt.
Am Abä simer ines Restaurant namens Huihui ga ässe. Das isch es Restaurant imene grosse Hotelressort, wie me das us de Filme kennt. Mir hei freie Sicht ufs Meer und e Sonnenuntergang ka, hei hawaiianischer Musig zueglost, wo derzue zwo Froue Hula tanzet hei. Ds Ässe isch traditionell und sehr lecker gsi, sogar der Poi isch gar nid so schlecht gsi. Poi isch der iheimisch Brei, wo i de Reisefüehrer als Chleischter beschriebe wird.
Es isch erneut e super Tag gsi. Itz simer mit volle Büch daheim i üsem Hotelruum und freue üs ufe (Verdouigs-)Schlaf.Read more