Die Garteninsel

Hüt heimer so richtig verstange werum dass Kaua'i ou "die Garteninsel" gnennt wird! Mir hei mit üsem Shaka Guide ä Tour i üsere nächi gmacht u si zersch zu de Wailua Wasserfäll. Dr Wailua Fluss isch hie öpä dr einzig wo ds ganze Jahr Wasser füehrt. A sire Mündig i ds Meer hei d Hawaiianer früecher Tämple (sogenannti Heiau) ufgsteut. U wüu ds Tal mit däm Fluss so fruchtbar isch gsi, heis nume d Könige u ihri Familiene dörfe beträte. A eim Ort i däm Tal hei si ä Chriegstämpel wo si jede Monet äs Mönscheopfer hei bracht u diräkt näbedranne isch dr sogenannt Geburtsstei gsi. Wenn ä König oder Stammesfüehrer nid dört isch uf d Wält cho, de het är sis Amt nid dörfe aträte... Äs speziells Völkli. 🙈 Mir hei ou ganz viu härzigi Gschichte zur Entdeckig vom Füür u zur erschte Kokospalme dörfe lose. Am Schluss hei mir no ä wunderschöni chlini Wanderig (Ho'opi'i Waterfalls Hike) zu 2 Wasserfäll gmacht. Dä Jungel hie isch so unbeschriblech toll! Mir si üs vorcho wie ire angere Wält, wie wenn das hie alles äxtra apflanzt wäri. Wie z.b. ir Masoalahalle in Züri. Nume viiu grösser u schöner!Les mer