• Out to Withsunday!

    November 12 in Australia ⛅ 27 °C

    De Tag hät hüt grad mal mit chli Stress agfange! Ich han gmeint, ich wird am 9i abgholt. Ha aber d Ziit mit mim Rundflug vo morn verwechslet. S Boot isch nämlich scho am 9i abgfahre und ich hätt am 8:20i det müesse sii! Zum Glück hani das grad no rechtziitig gmerkt. Han sogar mini halbi Mango müesse zrugglah, was mer fascht am meiste weh gtah hät!

    Denn ischs use zu de Whitsunday Islands gange. Zerscht zum berühmte Whitehaven Beach mit eme wunderschöne Lookout. De Sand det isch unglaublich wiiss und fein, aso 98 % puure Sand. So öppis hani no nie gseh! Eifach en traumhafte Ort mit ere bsundere Beüütig für d indigene Bevölkerig.

    Nach chli Entspanne am Strand und eme feine Mittagsbuffet uf em Boot simmer mit eme Speedboot zumene Riff go schnorchle. Vill farbigi Fisch und schöns Wasser, au wenn ich nach mim Tauchabenteuer am Great Barrier Reef villicht scho es bitzli verwöhnt worde bi!

    Zrugg in Airlie Beach hani no chli d Gegend erkundet und bin denn im Hostel uf de Lukas troffe. Zäme simmer go es Bier trinke und plötzlich mitten imene Cane Toad Race glandet! Ziemlich schräg, aber ja!🤷‍♂️

    En richtig schöne Tag mit vill verschiedene Erlebnis. Morn wartet de Rundflug über d Whitsundays, bevors denn bald wiiter Richtung Brisbane gaht!
    Read more