Tangalle: Trochezyt?

Nachm uschecke und dr Hügu abeloufe in Ella heimer ar Strasseegge no zwöi Banane u es Kaffi kouft und si mitemne Direktbus bis nach Tangalle ad Südküst gfahre. Mir si beidi froh wirds üs nid schlecht i dene Fahrzüg, dr Fahrstiu bsunders di ersti Haubstund wisi die Passstrass zderab fresä isch definitiv gewöhnigsbedürftig.
In Tangalle simer de mitm Tuktuk zu üsere Ungrkunft direkt am Strand. Bimene Mango u Ananasshake heimer no Reisebricht u Nachrichte gschriebe und womer ufm Liegestuhl ungr dr Paume hei wöue afa Qwixx spiele hets afa rägnä. Zum Glück isch z Strandbeizli deckt gsi u so heimer vom trochnigä zuegluegt wie d Fischer und ihri ganzi Familie im strömende Rägä z Netz usm Wasser zogä hei.

Vorem zNacht heimer üs e Ayurveda-Massage gönnt. Mitzt drin hets währendem Räge dr Strom kappt und si hei im Dunkle u Stiue völlig unbeirrt witer knättet.
Sehr entspannt u no rächt ölig simer de drna es paar Meter witer ga zNacht ässe. Erneut es Kottu Rotti mitemne Schoggi Banane Rotti zum Dessert. Da mr di einzige Gäst si gsi, es isch augemein recht leer gsi a dem Ort, het üs dr Beizer no sis Härz usgschüttet. Nid zum erste mau hei üs di Iheimische vrzeut wie unglücklech und unzfridä sie si mit dr momentane Situation. D Korruption ir Politik, kes Recht uf Demonstratione und die stetig stigende Chöste machene z Läbä schwär. So ischs üs de o chli liechter gfaue d Rechnig, wo gloub z höch isch gsi, ohni Diskussion z zahlä.

Da mr beidi nid so Fan (höhö) si vo Klimaalage heimer eich nid vorgha die z’bruche. Das aber, iz womer wieder ar Südeküste si, o ir Nacht mega heiss isch gsi hättemer gärn druf zrügg griffä. Wo natürlech aui am pfuse si gsi heimer de gmerkt das die nid funktioniert. So heimer üs eine abgschwitzt und i bi ir Nacht sogar ufe Baukon u ha dert uf dr Liegi zwöi Stund chli pennt. Wüus mässig bequem isch gsi bini immer wieder ufgwacht u es het mi no dünkt es heig paar Moskitos. Z bis übere Chopf zieh vom Siedeschlafsack het, has ersch am nächste Morge gseh, gar nid so viu bracht.

A däm Morgä, mir hätte de ändlech chönne pfuse, simer am 7ni wieder ufm Baukon gsi. Diesmau freiwillig fürne Lektion Hatha-Yoga :) Es het guet da mau wieder aui Körperteil z bewege und z strecke.
Drna hets es zMorgä mit Ris, Curry und Ananas-Crepes gä. D Füess fasch im Sand heimer drbi dr Usblick ufs Meer gnosse und de nimmer müede Fischer bim schrissä am Netz zuegluegt.

E Härdöpfeler-Jass-Partie später simer de wieder mitm Tuktuk zum Busbahnhof um für zwöi Nächt, womer scho länger buechet hei, nach Hiriketiya z fahrä.Read more