Hiriketiya 2.0: d’Sunne isch wieder da

Wüus üs dert so gfaue het und wüus zum Surfe o guet isch heimer üs entschiede, nomau uf Hiriketiya z‘gah. Bi üsere Akunft hets immerno gschiffet, drum simer direkt ines Kaffi und hei dert öpis gässe und chli Spieli gspiut. Später am Nami heimer üs trotz Räge ines Strandbeizli verschobe und hei dert es paar Bier trunke und witergspiut. De Yännu het üs z‘Spiu „Poseidos“ bibracht, und nacheme churze Telefonat mit de Lori und schriftlechem Abkläre mitem Keve si de o d‘Spielregle wieder klar gsi. Im Nachhinein heter vermuetlech beröit, üs das Spiu zeigt z‘ha, vo ca. 10 Parteie heter no nie gwunne 😂
Wüus de irgendwenn chli spät isch gsi simer direkt ga z‘Nacht esse. Mir hei aui es mega feins Curry gha, wo vor Schärfi här aber grad chli ar Grenze isch gsi. Derna simer zrugg id Unterkunft und hei i üsem Zimmer, wo gfüut 60m2 isch gsi, no e Filmabe gmacht. De Film „Athena“ uf Netflix isch sehr empfählenswert, o weni am nächste Tag ca. 1h ha müesse nacheluege wüui so müed bi gsi und bi igschlafe.
Am nächste Tag isch ändlech d‘Sunne wieder da gsi. De Yännu het das usgnützt und isch früeh am Morge scho ga surfe, de Sacha und ig hei chli länger gschlafe. Nachem z‘Morge - es het mau wieder die srilankesische „Hopper“ gäh - simer a Strand und hei de ganz Tag eigetlech dert verbracht. Churz vorem Sunneuntergang simer zum Dickwella Strand, wo nur ca. 5 Minute entfernt isch, füre Sunneuntergang z‘luege. Derna simer ga z‘Nacht esse, es het wieder es Curry gäh, u dismau sogar mit Buffet, wome het chönne selber sis Curry zämesteue.
Am nächste Morge isch de Yännu wieder früeh uf zum ga surfe, und derna simer aui zur Nicky iz Yin Yoga u när no grad mit ihre iz Mond (z’coole Hotel womer z’erste mau si gsi) es Kaffi ga trinke. Ufe Mittag simer a Dickwella Strand, wüu dä zum Chille und Umeliege fasch chli gmüetlecher und weniger voll isch. Es het churz chli grägnet, aber zum Glück isch recht schnell d’Sunne wieder füre cho. Währendem Räge hets mau wieder e Rundi „Poseidos“ gäh, wo de Yännu wieder nid gwunne het. Zum z‘Nacht hets einisch meh es Curry gäh 😂
A üsem letzte Tag in Hiriketiya simer nomau a Dickwella Strand und si dert, bi bestem Wetter, no bis am früeche Abe bliebe. Gäg die 5i simer zrugg id Unterkunft, hei üs unter de Garteduschi churz abduschet und hei de Bus gno richtig Hikkaduwa.Read more