Znachtesse bim Antonio

Hüt bini vo mim Lehrer ihglade worde, zum mit ihm und sinere Familie znachtesse.
Mir sind drum nach de Schuel mit em Töff zu sim Automech zum sis Auto abhole. Zerschd simmer dede nochli mit em Mech am schwätze gsi und nachane meint er so: "Und mit was wetsch du fahre? Auto oder Töff?"
Ha den denkt oh oke in Equador fahre, wiso nöd. Bi den mit em Auto gfahre, will ich nur Flipflops ahgha ha. Mir sind den zemme no zum Metzger go Fleisch und imene chline Lade go Bier poste. Bi ihm dihei isch sin Sohn scho am füüre gsi und sini Frau, wo au i de gliche Schuel unterrichted, isch mit ihrere Schwöschder dine am Choche gsi. Er hett mer den de risig Garte zeiget und sini zwei Apartments woner no vermieted. Nachane hemmer den ahgfange Grilliere, isch chli komisch, will die da nur ganz dünni Stuck Fleisch grilliered. Ha denn nahgfröget wiso und er meint den, dass sie eifach nöd gern bluetigs Fleisch hend. Das hani den nöd so verstande😄
S Znachtesse isch au mega interresant gsi, mit sim ca 15 jährige Sohn, de drüh chline chind, emene einjöhrige baby, sinere Frau und de Schwöschder vo ihre. Die Wohned übrigens all im gliche Huus. Isch aber mega guet gsi zum Spanisch üebe und um no meh überd Kultur z lerne.Weiterlesen