Markha-Valley Tag 5

Die Nacht hett sich de Schlafsack uszaut, dadurch hei mir chönne die dünne Mäteli mit de Dechine verstärke und so gäg unde isoliere. Wiu dMeret ellei im Zelt isch gsi, hett sie so weich gschlafe, wie zIndie no nie - Prinzessin auf der Erbse uf 4376 M.ü.M.
Während die andere im Camp zum Teil dNacht düre gfrore hei, hei mir gmüetlich düregschlafä...

Gschied (und bitzli egoistisch) wie mir si, hei mir scho am Abe vorher gmerkt, dass zWasser extrem knapp wird si und si drum 10 min früecher zum zmorge und hei so aui üsi fläsche chönne füllle...

Vo Afang a rächt steil isch es los gange Richtig Nimaling. Am Afang, bis zu de Snackpousä a zwöi chline Bergsee, si um üs richtig "viu" Lüt ufem Trek gsi - vo Kang Yaze Expeditionsgruppe bis Seniore Markha Valley Gruppe, nach de Pousä hett sich das aber wieder ziemlich usenand zoge und mir hei zBergpanorama numme mit Hase, Gämschis, Yak und andere Tierli müesse teile. Wius numme 7km si gsi, hei mir üsi Tagesetappe scho am 11:15 beendet ka. Nachem Zelt irichte, Zmittag ässä und Mittagsnap isch immer no ersch haubi 2 gsi und so hei mir üs entschiede no chli dUumgebig zerkunde...

Am Tipp vom Zeltplatzwächter und Bergführer si mir nid Richtig Kang Yaze Base Camp sondern querfeldein ufbroche, wiu dert isch de Gletscher viu nöcher... Nachdem mir dHöchi vom morgige Pass erreicht hei und weder Gletscher no Endi in Sicht isch gsi - dNoémie isch sogar no wiiter ufe - hei mir üse Usflug für beendet erklärt und eifach vo dert Ussicht gnosse 😊

De Nami/ Abe hei mir när ire gmüetliche Rundi mit alte Bekannte vom erste Homestay und neue Gesichter verbracht. Schnell hei mir dert aber dHöchi vo 4841 M.ü.M gspürt und endlich mau üsi warme Sache chönne uspacke, ou die sie auso nid für nüt gsi :)Read more