"Pousetag"

Früeh wie immer heimer Zmorge übercho üses Lunch-Päckli ipackt und hei üs ufe Weg gmacht. De Plan isch gsi vo Markha uf Hankar zloufe und dört öppe ufe Mittag acho. Scho nach es paar Minute heimer zum erste mal über de Fluss müesse wo zimlich kalt isch gsi und ou so gross dasmer üsi Schueh hei müesse abzieh. Wenn öpper no nid wach isch gsi denn het sich das spätischtens ize gänderet gha 🥶
Kurz drufabe simer zumene Kloster cho womer üsi Rucksäck hei la stah und die fasch 200 Höhemeter no schnell gmacht hei zum die schöni Ussicht zgseh. Wie me aber uf d Idee chunnt dört obe es Kloster zboue isch niemerem vo üs ganz klar gsi.
Nachem zimlich langsame Start heimers de aber ufe Mittag glich is erste Homestay vo Hankar gschafft womer de üses Zmittag gha hei. Nach kurzer Diskussion heimer de Entschide das mir glich nid hie blibe und no witer loufe uf Tachungtse was 5km witer isch und e Zeltplatz het. Defür heimer üs ize d Wahrscheinlichkeit erhöht morn no zum Fuess vom Kang Yatse Gletscher zloufe erhöht. Us üsem Pousetag isch so aber glich e Tag mit meh als 15km und fasch 800 Höhemeter ufe worde 😂
Defür chöme im Zelt villicht endlich üsi warme Kleider usem Rucksack womer bis ize zimlich für nüt mittreit hei

Nachtrag: Vorem Znacht simer no 2 Hügel grad hinter em Zeltplatz ufegloffe und hei vo dört us d Ussicht gnosse. Während em Znacht heimer üs de bi de andere chli unbeliebt gmacht wöu mir sobalds wider Wasser het gha üsi Fläsche für morn hei wölle fülle und es het nume es paar Dezi pro 10min gä. Mir heis denn ou relativ schnell ufgäh und hei für Tee i de Thermos gfragt.
Es isch nid würk kalt worde die Nacht aber defür heimer am Abe no chli chönne Sterne aluege und hei usegfunde wie sogar üsi Handys chöi Sternefotos mache 🤩Läs mer