122 & 123: Queenstown & Buenos Aires

Scho üse zwoitletscht Tag be de Kiwis! S'Programm för hött esch gsi: Campervan abgäh, met allem, was dezue ghört. Wel mers geschter vor luuter rede nömm gschafft hend, s'Büssli z'potze, hemmer das also am Morge mösse mache. "Respectfully clean" heds gheisse, also hemmer v.a. eifach usegwöscht ond hartnäckigi Fläcke met Zahpasta (Trick 77 😉) wägpotzt. No schnell-schnell packe ond de semmer eigentlech scho halbe wäg gsi. Nor no "chorz" N & H tschüss säge ond e gueti Reis wönsche... 30 min spöter ond met wederholte Zuesecherige, ehri Töre in Östriich stieng för üs emmer offe, semmer de wörklech onderwägs gsi. Ei Stond spöter semmer in Christchurch gsi, wo de Stress agfange hed: Zerscht mol d'Gasfläsche uffölle. Guet gange, check. Denn s'Büssli i de Wöschaalag wäsche. Länger gange ond tüürer gsi als plant, aber au do hemmer s'Höggeli chönne setze. Söttemer dehei vellecht au hüüfiger mache... Met em suubere Van semmer zom Hostel, wo mer s'Gepäck mol deponiert hend, bevor mer wiiter zom Tanke hend welle. Em Dani esch d'Idee cho, dass mer, solang mer no mobil send, üs benere Bank met USD för Argentinie chönnted iidecke. Wie scho in Vietnam esch au do d'Suechi noch USD komplizierter gsi als dänkt ond wo mer de noch zwoi Fählschläg be Banke ändlech hend chönne NZD i USD omtuusche, semmer erliechteret gsi.
Guet, nor no tanke ond Camper abgäh. Au das esch relativ guet gange, s'Problem met de ramponierte Stossstange esch denn au schnell klärt gsi.
Met em Bus eschs zrogg is Hostel, wo mer no rechtig packt ond üs före Usgang parat gmacht hend: Bier inere Chele (wo mer en ächte Sea Shepherd troffe hend) ond im Aschloss no Z'Nacht met de Margaret ond em Miles, wo mer ofem Paparoa Track könneglehrt hend.

En 13. als Reisetag z'wähle mag muetig erschiine, mer reised aber nochem Motto "Läbe am Limit" 😎 Nocheme feine z'Morge semmer scho rächt glii a Floghafe, demet mer au jo gnueg Ziit hend zom s'Gepäck ufgäh (online hed mer s'Gepäck ned chönne dezue bueche, drom hemmer met möglecher Verzögerig grächnet). Wo das greglet gsi esch, hemmer 2,5 Stond gha, wo mer chli gläse ond Podcasts före Flog abeglade hend. De Flog of Auckland esch guet gsi, de Dani hed sech meteme Geolog agfröndet. In Auckland hemmer gmüetlech chönne s'Terminal wächsle, zom Gate, iistiige ond üs 11 Stonde lang wie Sardine chönne fühle. Omstiige in Santiago de Chile ond noch 2 wiitere Stonde semmer am Obig am sächsi acho. De Uberfahrer hed üs sehr zögig i d'Stadt brocht ond zor Freud vom Dani Reggaeton abgspelt.
Wo mer nochem iichecke ändlech hend chönne dusche ond üs omzieh, hemmer üs scho besser gfühlt. Nochem z'Nacht imene koreanische Restaurant esch dä sehr langi 13. Februar för üs de au z'Änd gange.Read more