Tag 127 - 129: Buenos Aires

Nochdem mer geschter be üsne Gaschtfamilie de Obig verbrocht hend ond wägem spote z'Nacht de Gedoldsfade vo üsne Mäge scho emene erste Stresstescht onderzoge worde esch, hemmer üs am Morge früeh troffe zom zäme i d'Schuel goh. D'Jasi hed schlächt gschlofe ond esch froh gsi, heds i de Schuel för alli Neuling zerscht mol Kafi ond Medialunas (Gipfeli) gäh. Ofe Iistufigstescht esch be üs verzechtet worde...
Noch ere Iifüehrig send alli i ehri entsprächende Klassezemmer. Mer send zäme met 9 anderne zom Carlos cho. Ond de esch Spanisch gredt worde. Dank iigroschtete Französischkenntnis hed d'Jasi en Teil defo verstande, was de Carlos alles gseid hed, de Dani weniger. Trotzdem hed üs ei Morge Spanischonderricht scho so vel Sälbschtbewosstsii gäh, dass mer üses z'Mettag (warmi Sandwich) of Spanisch traut hend z'bstelle. Wels en Intensivkors esch, hemmer am Nomittag au no Schuel gha, dämol be de Julieta. Chlii ond luut beschriibt sie träffend. Sie lacht gärn ond vel, leider verstömmer meischtens ned, ab was sie lacht. Obwohl mer vo de vele Iidröck (ond vo de schlächte Nacht) scho total döre gsi send, semmer am Ändi vom Tag no zäme hei gloffe. Onderwägs hemmer no schnell imene Tierpark Halt gmacht ond zom Abschloss hemmer üs es Glace (helado) gönnt. Am Obig hemmer üs met üsne jewiilige Hosts scho besser chönne onderhalte.

Am nöchschte Tag hemmer üs benere för üs nöchere U-Bahnstation troffe. Die iigsparte 10' Fuesswäg hemmer i dem onderirdische Labyrinth aber leider weder verspelt. Mer hends aber doch no rächtziitig i d'Schuel gschafft ond hend en onspektakuläre Schueltag gha. Zom no chli öppis vo de Stadt gseh, hemmer anere Tour teilgnoh, wo d'Schuel organisiert hed. Es wär secher interessant gsi, leider hemmer de Iara ehrne Usfüehrige zom Recoleta Friedhof, de zwoit(?)ältischte Chele vo de Stadt ond de Floralis Genérica nor schlächt chönne folge. Was mer verstande hend: Be de Rächtsfakultät gäbs de Aberglaube, dass mer d'Süüle a de Gebäudefront ned döfi zelle als Studänt, sösch bestieng mer s'Studium ned. Wel mer ned im Sinn hend, jetz no Awält z'wärde, hemmer sie zellt. Es send 14.

Am drette Schueltag hemmer en neue Mitschüeler becho, de Eli us Israel. Nochdem mer als Klass i de vergangne zwoi Täg vel Ziit investiert hend wie mer sech anere andere Person vorstellt ond mer enand entsprächend guet könnt hend, eschs för ehn secher chli e doofi Situation gsi.
Zom de Onderrecht chli uflockere, hed üs de Carlos i Groppene usegscheckt met de Ufgab, of Wörtersuchi z'goh. Mer send z'drette met em Janko gsi ond hends rächt loschtig gha. Am Nomittag esch weder Outdooronderrecht agseid gsi. Im Museo Larreta hemmer üse museumsspezifische Wortschatz chli usbaut (estatua, jardín, azulejo...), hend aber vo Google Translate ufzeigt becho, dass mer mind. 1 Beschriibigsscheld komplett falsch interpretiert gha hend. Bem aschliessende Kafibsuech esch d'Jasi fascht iigschlofe. Voci lehre esch nömme möglech gsi.Read more