Tag 130 & 131: Buenos Aires

Set mehrere Täg esch es zemmli heiss ond töppig. Obwohl jede Wätterbrecht s'Gägeteil vorhärseid, glaubt d'Jasi, dass es hött ned z'heiss esch för Jeans ond es T-Shirt useme decke Stoff. In Neuseeland hätt das no funktioniert, do esch es definitiv z'warm.

I de Schuel hemmer üs hött de Verbe gwidmet. Spanisch schiint meh onregelmässigi Verbe z'ha als anderi Sproche, aber met de (erlaubte) Helf vo moderner Technologie lösemer d'Üebige düütlech schneller als no vor 25 Johr i de Schuel.
Am Nomittag semmer weder ines Museum, dämol s'Museo Casa Yrurtia. S'ehemalige Wohnhuus ond Atelier vom Könschtler Rogelio Yrurtia esch voller verschedne Skulpture ond hed sech drom au geignet zom verschedeni Körperteil lehre, au derigi, wo oft meteme Blatt bedeckt send. Natürlech esch au do chli giggelet worde...
Wel mer för am Obig met paarne us de Klass abgmacht hend zom eis go näh, eschs im Aschloss met em Bus i Stadtteil Palermo gange. Em Janko sin Vater hed det scho of üs gwartet (die beide send zäme do i de Ferie ond während de Janko i de Schuel esch, erkondiget de röschtig Manfred d'Stadt), glii send de no de Andreas, d'Melissa, de Alfred ond d'Audrey dezue cho. De sehr loschtig Obig hed bem Andreas dehei of de Dachterrasse gändet, wo u.a. no öber d'Celine Dion ond Schönheitsideal diskutiert worde esch. Sini schön Wohnig dued er öbrigens of Airbnb vermiete, falls öpper Inträssi hätt.

Am nöchschte Tag esch i de Schuel sone Abschiedsstemmig i de Loft gläge, wels för mehreri us de Klass de letscht Tag gsi esch. Anderne Klasse a de Schuel esch es wohl ähnlech gange, wel de Schuel-Groppechat met Groppefotene gfluetet worde esch. I üsere allerletschte Lektion bem Carlos (nöchscht Woche, hemmer erfahre, semmer be de Roxana) hemmer öber üsi landestypische Grecht gredt. Chorz vorem Mettag esch die Lektion em Dani vorcho wie Folter, s'Zmettag im Aschloss hemmer ned schnell gnueg chönne hole. Wel no einigi vo üsne Klassekamerade, wo d'Schuel jetz zwor verlönd, nöchscht Woche no i de Stadt send ond mer sie wohrschiinlech nomol wärded gseh, esch d'Verabschiedig nochem gmeinsame z'Mettag einigermasse verhalte gsi. Noch em Nomittagsonderrecht hed au niemer welle öppis go trenke ond so semmer halt elei de Abschloss vo üsere erschte Woche Spanisch go fiire ond zwor met plane. Bes mer es Plätzli gfonde hend, eschs leider chli länger gange ond dämol heds d'Jasi vor Honger fascht nömm usghalte. Es Öpfelchüechli ond en Orangesaft hed ehres (ond em Dani sis) Läbe grettet ond mer hend üsi nöchschte Woche chönne plane. Zom das gebührend fiire semmer fein go ässe ond de no go trenke.Read more