Tag 132 & 133: Buenos Aires

Ändlech (mol weder 😉) fin de semana! För üs heissts leider ned usschlofe, sondern mer hend üs weder einigermasse ziitig troffe zom imene Kafi zäme z'Morge z'ässe ond nomol paar Sache z'plane. Wel mer üs gar nömm so wie Tourischte vorchömed, hemmer weder chli Touriprogramm welle mache (also, d'Jasi): Gäge Mettag semmer is Stadtzentrum, wo de Start vo de Hop-on-hop-off-Bustour gsi esch. Obwohl scho paar mol demet gliebäuglet (also, d'Jasi), hemmer soöppis of de Reis beshär ned gmacht (also, wägem Dani). Ofgrond vom Ziitmangel ond anere Empfählig vom Janko hemmer das jetz aber gmacht ond send met em doppelstöckige Bus zerscht mol i Südoschte vo de Stadt gfahre, wo mer Sehenswördigkeite wie de Plaza de Mayo, sowie d'Quartier San Telmo ond La Boca gseh hend. Plaza de Mayo ond San Telmo hemmer scho könnt, La Boca ond insbesondere d'Gägend om Caminito aber noni. Det semmer de au usgstege ond hend chli Ziit i de farbige Gasse verbrocht. Obwohls mettlerwiile es Tourischteziel esch, merkt mer ahand vo de Wällblächgebäude scho, dass das eigentlech es ärmlechs Quartier esch. Spannend esch au gsi, wie sech d'Mönsche veränderet hend, je nöcher mer em Stadion "La Bombonera" vo de Boca Juniors cho esch. Alles in Blau-Gälb gchleidet, fascht scho Strossefäschtstemmig in Vorfreud ofs Spel am Obig. Mer hed sech fascht echli als Iidrengling gfühlt ohni Boca-Liibli.
Zrogg ofem Bus eschs wiiter gange Rechtig Hafe, Bahnhof (ehnder ned so sehenswördig...), verbii a de Rächtsfakultät met sine 14 Süüle ond de Floralis Generica, zom Planetarium ond weder as Ufer vom Rio de la Plata, wo de Club de Pescadores ond de Stadtfloghafe esch. Mer hend mettlerwiile Honger gha, hend aber online nüüt Schlaus i de Nöchi vo dene Pönkt gfonde, wel das alles chli osserhalb bzw. eifach es Naherholigsgebiet esch onds nor Hotdogständ gha hed. Drom semmer im Bus hocke blobe, hend halbhärzig de oftmals abrupt onderbrochne Audiousfüehrige zo de Ciudad Universitaria, em River Plate Stadion, Pferdesportaalage (do hed d'Jasi scho chli gnauer äneglost) ond verschedne Monumänt zueglost, bes mer schlossändlech bem Museo Nacional de Arte Deco usgstege ond ines Kolumbianischs Restaurant send. Mer send leider beidi chli enttüüscht worde.
Nocheme chorze Abstächer hei hemmer am Obig no met de Audrey ond de Melissa us de Klass abgmacht. Die bede send vorhär no imene Tangokors gsi, wo üse Lehrer, de Carlos zuefälligerwiis au teilgnoh hed. Är heig sogar no met de Audrey tanzt 💃 Jo, plötzlech eschs halbi drüü am Morge gsi ond mer send de hei.

Am Sonntigvormittag hemmer üsi Bustour no beändet. Dämol semmer i de Sation Barrio Chino usgstege. D'Bezeichnig als "gröschti Chinatown in Südamerika" heds grösser töne loh als es tatsächlech esch. Mer hend aber feini Bao Buns gässe det ond hend d'Tour noch Verbiifahrt am tüüre Hotel Alvear Palace ond diverse Botschafte chönne abschliesse. I dere Gägend verstoht mer, werom BA als "Paris vo Südamerika" bezeichnet werd. Obwohl sech die Stadt sehr europäisch afühlt, fendemer aber, dass BA eifach BA esch ond ned als Kopie vonere andere Stadt bezeichnet wärde muess.
Am Obig eschs de nomol spannend worde: Fútbol! Huracán hed San Lorenzo zom Clásico de Barrio empfange ond mer send z'metzt denne gsi. Bereits ofem Wäg zom Stadion hend d'Heimfans för tolli Stemmig gsorgt ond es esch luut musiziert ond gsonge worde (Gästefans send in Argentinie ned zuegloh).
Obwohls extrem heiss gsi esch, esch de Jasi ehre erschti Fuessballmatch super gsi, v.a. wäg de tolle Atmosphäre i dem uralte Stadion ond emene coole Souvenir. Huracán hed au no 2:0 gwonne, vo dem här alles top! Vorem Heigoh hemmer üs no drengend benötigts Wasser ond feini Empanas gönnt. Czytaj więcej