Tag 147 - 148: Torres del Paine NP

Tag 3 hed die längscht Strecki met Rucksack vorgseh, total hemmer fascht 5h onderwägs verbrocht. S'Wätter esch wie im April i de Schwiiz gsi: Chli Sonne, zöschetdöre chli Räge ond emmer vel Wind! Mer hend de Wind am Vormittag zom Glöck ehnder im Rögge gha. Eim wo üs entgäge cho esch, heds grad d'Rägehölle abem Rocksack gwindet. Die esch de zom Glöck imene nöche Busch hange blobe, de hed er sie weder chönne iifoh. Das esch üs e Lehr gsi: Höllene nomol äxtra befeschtiget, Huet abzoge, bzw. Kapuze öber d'Chappe, alli Riissverschlöss zue ond wiiter. Obwohl de Wind zom Wandere chli müehsam gsi esch, hed er ofem See för schöni Usbleck gsorgt, v.a. met de Sonnestrahle. Chli spöter esch de Wind ned nor es betzli müehsam, sondern rechtig scheisse gsi, nämlech wo mer imene Sompfgebiet öber einzeln gleiti Baumstämm hend mösse balanciere (met mehrere Kilo ofem Rögge), zom einigermasse trockenen Fusses öbere z'cho. Grad, wo d'Jasi of dem ronde Holz am dröberlaufe gsi esch, chond en Windstoss ond die trochne ond suubere Füess send Vergangeheit gsi. Aber au alles balanciere hät nüd gnötzt, es hed einewäg zwenig Stämm obd Stei gha, zom troche of di ander Siite z'glange. De Dani hed denn also au nassi Füess gha.
Bim Ufstieg hed de Wind dreiht ond üs entgägeblose. Ond chorz vorem Refugio Chileno, üsem Tagesziel, hemmer ofem Paso de los Vientos sehr iidröcklech erfahre, wie dä Pass zo sim Name cho esch.
För die letscht Nacht hemmer i üsem 280 USD tüüre Zält wenigschtens Chössi ond Schlofsack (wo mer zwor ned bruuched) gha, de Wäg zo dere "Luxusonderkonft" esch aber de steilschti Aschtieg vom ganze Tag gsi. Nochere wohlverdiente Duschi hemmer de Räscht vom verrägnete Obig im Ufenthaltsruum verbrocht ond hend meteme Päärli us Zöri onverbendlech abgmacht, dass mer morn e Sonneufgangswanderig zom Mirador Base Torres möched. Mol luege, öb mer ufmögid...

El despertador hed üs am füfi us üsne Träum gresse. Noch chorzem Zwiifle hemmer üs us de warme Schlofsäck kämpft ond hend üs met liechtem Gepäck ond Stirnlampe ofe Wäg gmacht. Trotz de mässige-ongmüetleche Wätterbedengige semmer ned die Einzige gsi, hend aber üses Tempo guet chönne laufe. Wo mer bim letschte Astieg acho send, esch de Wäg meteme Seil gsperrt gsi, was üs chli irritiert hed. Gliichziitig esch rächts en Wäg abe zom Ranger /Camping gange. I de Hoffnig, det es warms Plätzli förne chorzi z'Morge-Pause z'gfende, hemmer de 4er-Wandergmeinschaft, wo grad noch üs cho esch, gseid, mer gienged mol det go luege. Offebar hend sie üs falsch verstande, wel wo mer noch erfolgloser Suechi nocheme z'Morgeplätzli weder zrogg cho send, hend üs mettlerwiile ca. 20 erwartigsvolli Gsechter met ehrne Stirnlampene aglüüchtet ond hend welle wösse, öb de Wäg denn jetz offe seig. Zuefällig hemmer im Camp en Ranger atroffe gha, drom hemmer die Frog chönne met "Yes" beantworte. Nehmt üs Wonder, wie lang die det usgharrt hättet, hättemer es Plätzli gfonde ond det z'Morge gässe.
Ab dem Ponkt eschs steil worde, de verblockti Wäg esch ergendwenn us de Vegetationszone usecho, wo mer denn en liechte Schneefall gha hend. S'Tagesliecht esch mettlerwiile gnueg gsi, dass mer d'Stirnlampe hend chönne usschalte ond üse Wäg öber halbveriist-schneepflotschigi Stei zom Mirador fortsetze. De Abstieg hed de Jasi jetz scho Sorge gmacht.
Dobe acho hemmer hendereme grosse Stei Zueflocht vorem Wind gsuecht, zäme met de bede Zörcher, anere Böndnerin ond eme Hamburger (pun intended).
S'esch emmer heller worde, d'Wolche hend sech aber nie rächt welle verzieh ond so semmer noch 90' döregfrore weder abe. Ohni uszrötsche hemmers weder is Refugio Chileno gschafft, wo mer met desne no es Kafi gnoh hend. De Hamburger, wo de O-Trek macht ond sine Chnüü i de letschte Täg chli z'vel zuegmuetet hed, esch vo de Jasi no schnell tapet worde, de send mer zwoi Rechtig Tal ond Ändi vom W-Trek gloffe. D'Sivan, d'Zörcherin, hed üs vonere andere Schwiizerin verzellt, wo i dem Gebiet zwoi Pumas gsechtet hed (ond au no met emene mindestens verstuuchte Chnöchel no zwoi Täg gwanderet esch!), mer hend leider kei Glöck gha.
Besagti Schwiizerin ond ehre Frönd hemmer spöter bem Warte ofe Bus könneglehrt. Sie wohned im Maihof 😄
Of de Heifahrt hemmer de gliich no Glöck gha ond hend usem Bus use en Puma gseh.Weiterlesen