Tag 149 & 150: Pto Natales - El Chaltén

Nochdem mer üs im tüüre Hotelzemmer s'Zmorge sälber zuebereitet hend, hemmer üs ofe Wäg a Busbahnhof gmacht, wo mer de Bus noch El Calafate in Argentinie bestege hend. De Gränzöbertrett beidsiits esch weder gschmeidig gloffe ond mer send bald weder of de Stross gsi - jo, chli schneller hättets of de argentinische Siite wohl scho chönne fahre.
Wel mer in El Calafate en Aschlossbus of El Chaltén gha hend ond üs langsam es onguets Gfühl beschleche hed, hed de Dani inere (unnötig lange) Fahrpause of Maps mol gluegt, wie lang d'Fahrt noch El Calafate ongföhr no duuret. Maps hed d'Akonft of 14.17 berächnet, üse Bus esch of di 14.30 agsetzt gsi. Met de 20'-Pause wärdemer also niemols rächtziitig acho. S'Mail bim Busabieter, ob mer s'Ticket ofne spötere Bus tuusche chönd, esch zemli prompt positiv beantwortet worde, de nöchscht Bus esch leider erscht of di 6i glischtet gsi.
14.34 semmer denn i Busbahnhof igfahre, d'Jasi parat zom allefalls de Bus ufzhalte, wo mer gseh hend, dass en Bus, wo met El Chaltén agschrebe gsi esch, s'Terminal verlohd. Mescht.
Denn gömmer halt go s'Ticket am Schalter tuusche, hemmer dänkt. Det esch üs gseid worde, dass de vermeintlech knapp verpassti Bus gar ned üse gsi seig, dä hed nämli sälber Verspötig gha ond mer hend rond 40' spöter chönne iistiege.
I de vorderschte Sitzreihe im obere Stock esch es denn Rechtig El Chaltén gange, wo mer am Obig acho send ond nochemene chorze Zwöschestopp im Hostel, wo mer s'Zimmer aktuell för üs elei hend, imene Resti z'Nacht gässe hend. Zo Schwiizer Priise. Das Dorf werd halt vo velne Touriste wie üs frequentiert.

5.30 Uhr, de Wecker lüütet. Mer wennd üs früeh of die höttig Wanderig mache, om de Fitz Roy im morgendliche Liecht z'gseh. De Trail esch rond 10 km lang, bis zom Sonneufgang am 7.39 Uhr wärdemers secher ned bis zom Schloss schaffe - aber bereits noch vier Kilometer geds en Ussechtsponkt, das esch üses erschte Ziel.
Das hemmer au rächtziitig erreicht ond mer send medemene wolchefreie Sonneufgang belohnt worde, d'Bärgchetti esch ines rots Liecht taucht worde.
Noch dem chorze Halt hemmer üs gmeinsam met de Vanessa, wo mer bim Halt troffe hend, of de wiiter Wäg gmacht. Vorem Schlossufstieg hed sie sech denn vorläufig vo üs verabschiedet, sie hed welle en Pause iilegge.
Onterdesse send Wolche ufzoge, was d'Secht am Ändi vom Trail "Laguna de los Tres" ned sonderlech gschmäleret hed. S'Logo vo de Chleidermarke Patagonia gseht in Ächt ond vo nöchem scho sehr idröcklech us.
Nochdem mer usem Park gschleche send*, send go iichaufe ond imene Pub en Stopp igleit hend, hemmer a dem Tag im Hostel för üs gchochet ond bi dere Glägeheit de Vladi us Littau ond de Abel us Holland könneglernt, was üse Plan för de Obig, di wiitere Statione noch El Chaltén z'plane, verhenderet hed. Aber das esch guet gsi so.
De Vladi hed vor sinere Reis i de Radiologie vom LUKS gschaffet ond so hend är ond d'Jasi sech gägesiitig loschtigi ond gar ned loschtigi Anekdote us ehrem jewiilige Bruefsalltag verzellt, während de Dani ond de Abel metenand öber alles mögleche gredt hend.

*de Itrett i Park choschtet 45'000 argentinischi Pesos pro Tag, was chli weniger als 40 CHF send. Mer hend drü Iitrett kauft, gönd aber 4 Täg im Los Glaciares NP go wandere. Wil mer de Priis onverschämt höch fended, zahlemer för de eint Tag ned. Mer Itrettsanarchorebälle.Read more