Tag 151 & 152: El Chaltén

Am zwoite Tag in El Chaltén hemmer welle e Wanderig zum Loma del Pliegue Tumbado mache. Wel mer s'Erläbnis vom Sonneufgang jo scho gha hend, hemmer chli länger gschlofe ond send de öppe of die nüüni a Usgangsponkt vo de Wanderig. Met Podcasts oder em eigete Chüüche i de Ohre semmer zögig ufegloffe, zwöschetdöre hemmer amene möglechscht windstille Ort no Mettagspause met Ärdnossbutter ond Banane-Sandwich gmacht.
Am Trailafang hed e Tafele of s'Vorhandesii vo fossile Öberräschte ufmerksam gmacht, wo d'Jasi denn aber tatsächlech en Stei metemene Ammonit gfonde hed, hed sie de rächt Freud gha.
Am Ussechtsponkt acho hemmer en guete Bleck of Teili vo de geschtrige Wanderig gha ond au of die "zwoiti Reihe" a Törm, wo henderem Fitz Roy ond Co. stönd. För einisch semmer üs einig gsi, dass üs de Ussechtsponkt noni länget ond mer no ganz ufe ofe Gipfel wend. Also hemmer üs no 20' lang en relativ steile Astieg ufekämpft, was sech aber definitiv glohnt hed. D'Ussecht esch nomol besser gsi als donde ond v.a. esch die au om 360° gange. Ofem Abewäg esch au no (vermuetlech - s'esch uf jede Fall en sehr grosse Vogel gsi) en Condor öber üs ine gfloge. Leider semmer z'langsam gsi ond hend ne nor no us de Färni chönne föttele. Die Sechtig zellt aber gliich ond jetz fählt üs nor no de Huemul zomene Patagonie-Wildtier-Lotto! Spöter hemmer i de Nöchi vom Wanderwäg no en massive Stier gseh weide, ond obwohl typisch för Patagonie, esch es keis Wildtier ond chond ned of üsi Lottocharte.
Noch de Wanderig hemmer üs im Biergarte no es Bier gönnt, wobii d'Inhaberin als River Plate-Fan ned so glöcklech öber s'Huracán-Liibli vom Dani gsi esch (als "feo" hed sie de Club bezeichnet). Natürlech meteme Augezwinkere ond dezue hed sie üs osserordentlech vel Popcorn spendiert. Am Obig hemmer weder sälber gchochet ond üsi wiiteri Reis versuecht z'plane, send aber ned sehr erfolgriich gsi.
Öber 24h nochdem mer d'Chleider zom Wäsche abgäh hend, sends emmer noni zrogg gsi ond mer hend üs langsam afoh dröber ärgere.

Wel d'Wöscherei d'Chleider emmer noni gleferet gha hed, hed d'Jasi am drette Wandertag es bruuchts T-Shirt mösse alegge. Zom Glöck schmöckt Merino ned so schnell ond de Dani hed au ohni Chlämmerli a de Nase chönne hender de Jasi laufe. S'Ziel vo de höttige Wanderig esch d'Laguna Torre gsi, en Gletschersee am Fuess vo de drüü Törm us de "zwoite Reihe", de Cerro Torre, Torre Egger ond Cerro Standhardt. Obwohls met 20 km hii ond zrogg weder e längeri Wanderig gsi esch, hed sie ned vel Höhemeter beinhaltet ond noch de zwoi letschte Täg (oder besser gseid, noch de siebe letschte Täg) hend sech üsi Chnüü ond Färse dröber gfreut.
Wie scho am Vortag semmer chli spöter los ond hend am Trailiigang anere onmotivierte jonge Frau üsi Iitrettsbillet zeigt. Au do esch eifach nor chorz gluegt worde. Wohrschiinlech chönntemer jetz no förnes halbs Johr do go wandere ond's wörd niemer merke, leider reisemer aber am nöchschte Tag ab.
Ofem erschte Kilometer eschs echli duruf gange, nochhär semmer ine Buschwald cho, wo scho i herbschtleche Farbe glüüchtet hed , im Hendergrond die schneebedeckte Bärge 😍 Au de Gletschersee met sine vele Iismöcke denne hed schön usgseh ond die japanisch Wandergroppe, wo mer ofem Ufewäg öberholt gha hend, esch ganz usem Hüüsli gsi, wos de See zom erschte mol erblickt hend.
Zrogg im Hostel esch denn ändlech au die suuber Wösch weder retour gsi, nocheme früehche Z'nacht hemmer ändlech au mol weder en erfolgriichi Planigssession gha ond hend jetz en rächt gnaui Vorstellig defo, wie die nöchschte zwoi Woche wärded usgseh. Als Belohnig hemmer üs Waffle met Dulce de Leche ond Banane gönnt, dezue no Bier bzw. heissi Schoggi.
Üsi letschti Nacht im Hostel esch dör Zemmernochbere gstört worde, wo offebar met ehrem desinteressierte Hond telefoniert hend, wel d'Frau secher 10x "Rey" gruefe hed, of das aber schiinbar ned reagiert worde esch. Üs hed das sehr a d'Gloria us "Modern Family" erenneret, i dere Szene, wo sie em Jay rüeft ond de Nochber meint, es seig en Papagei. Wers ned könnt - of Youtube die entsprächende Stechwort iigäh, de gfendt mers. Mer hend uf jede Fall en schöne Lachafall gha im Zemmer (zäme met üsem neue Zemmergspändli).もっと詳しく