Tag 153 & 154: Bariloche

Die enorme Distanze in Südamerika hend üs be de Planig zemmli Chopfzerbräche bereitet, wel mer, wördemer nor met Bus reise, eifach ned gnueg schnell i Norde chämted zom d'Reis bes Ändi Mai so chönne gstalte, wie mers gärn hätted. Us dem Grond hemmer üs för zwoi Flög entschede: Hött flüügemer of Bariloche, chli spöter de vo Santiago of San Pedro de Atacama.
Bes mer de aber das Flogzüüg hend chönne bestiige eschs no en Momänt gange. Zerscht mol hemmer am Morge am zwoi mösse ufstoh ond zom Busbahnhof laufe, wo de Bus am drüü pönktlech abgfahre esch. Obwohl om die Ziit wörklech kei Verchehr herrscht of dene Strosse, semmer 20' spöter acho, aber mer hend kei Stress gha. Nocheme wonderschöne Flog semmer öppe am Mettag im Hostel z'Bariloche acho, wo s'Zemmer natürlech noni parat gsi esch.
Mer hend also s'Gepäck det gloh, send go z'Mettag ässe, chli go omelaufe (ofem Dorfplatz esch grad no s'Ziel vom "B100" gsi, ergend es Laufevent) ond de pönktlech am zwoi weder im Hostel gsi. S'Zemmer esch aber emmer noni parat gsi ond wo mer am drüü emmer no am warte gsi send, hed sech d'Jasi, müed vo dere chorze Nacht ond schloflosem Flog, demonstrativ ofs Bänkli gleid ond hed welle schlofe. Noch füüf Minute hemmer denn ofs Zemmer döffe ond send grad go schlofe. Spöter semmer no go iichaufe ond send nochem z'Nacht (üsi letschte Packige Trekkingnahrig) no ine Bar wos guets Bier ond feini Cocktails gäh hed. Ofem Wäg zrogg zom Hostel hemmer emmer no paar armi Seelene atroffe, wo, met Startnommere eidüütig markiert, of de letschte Meter vom Lauf i Rechtig Ziel grennt send, wo wohrschiinlech kei Mönsch meh gsi esch... Aber Chapeau förs Dörebiisse!

De nöchschti Tag esch weder rächt entspannt gsi. Üse Usflog zomene nöche Panoramahögel hed mol demet agfange, en Kiosk z'gfende, wo mer üsi SUBE-Charte före ÖV hend chönne uflade. Wel so Sache in Argentinie loschtigerwiis öberall chli es Onderfange send onds dezue no Sonntig gsi esch, semmer erscht öppe e Stond spöter ofem Bus gsi, wo üs zo de Talstation vom Campanario-Sässellift brocht hed. Mer send gmüetlech ufe gloffe, hend d'Ussecht dobe chli gnosse ond send de weder zrogg i d'Stadt. Das hed sech wiene rechtige Sonntigsusflog agfühlt, wo mer so au dehei wörded mache.
De Dani esch begeischteret ab de hiesige Biervielfalt ond führt üs ine anderi Bar als geschter. Det heds zwor gueti Bier ofem Menu, leider aber au sones müehsams Bstellsystem, dass mer fascht ohni öppis z'näh weder gange wäred. Am Ändi hemmer de gliich no öppis becho ond d'Wält esch weder in Ornig gsi.Read more