Tag 167 - 168: Provinz Jujuy

Hött Morge send d'Melissa ond d'Rachel met em Bus in Tilcara acho (die Arme hend scho am füfi ofe Bus müesse) ond mer hend die beide imene Kafi troffe. Bemene koffeinhaltige z'Morge hemmer de Plan före Tag besproche, hend denn s'Auto belade ond send losgfahre in Rechtig Uquía, wo mer de Quebrada de las Señoritas hend welle mache. Onderwägs semmer ine Kontrolle cho, wo de Dani zom erschte mol i sim Läbe en Alkoholtescht hed mösse mache. Wohrschiinlech hed die agfangnig Wiifläsche vom Vorobig im Getränkehalter de Polizischt chli misstrauisch wärde loh... aber wodöre hättemer sie söscht sölle tue? 🤷‍♀️
In Uquía hed e Chiesstross usem Ort en Hang ufe gfüehrt, wo mer zomene Parkplatz cho esch. Det hemmer üs agmolde, zahlt ond of üsi Guidin gwartet. Die Tres Señoritas befendet sech of Privatgländ ond au, wel Mönsche halt mängisch ned so Sorg hend zo ehrere Omwält, daf mer det nor met Guide ine. Was üs d'Isa aber z'verzelle gha hed esch sowieso interessant gsi ond mer hend einiges glehrt öber die lokali Pflanzewält ond wie sie gnötzt werd. S'Highlight send aber scho die Felsformatione gsi, wo us Sand/Lehm bestönd ond dör jede Rägegoss veränderet wärded. Die drüü Señoritas, wie drüü bestemmti Felse do benannt worde send, seiged früehner no vel düütlecher als "Frauesilhouette" erkennbar gsi, jetz sends eifach no drüü Zagge.
Noch dere Wanderig semmer of Humahuaca wiiter, wo mer es Hostel gha hend. D'Omgäbig vom Hostel, Chiesstross met so guet wie allne Hüüser no im Rohbau, hed üs a de Rechtigkeit vo de Adrässi loh zwiifle, aber nei - mer send rechtig gsi (obwohl üses Hostel met de Armierigsiise, wo bem Dach usegluegt hend, au noni fertig usgseh hed). Nochem Check-in semmer grad weder is Auto zom of Hornocal z'fahre, wo spektakuläri 14-farbigi Bärge of üs gwartet hend. Nätt wie mer send, hemmer anere Iiheimische grad no en Metfahrglägeheit bote (allerdengs ned ganz freiwellig: Bevor mer üs öberhaupt en Antwort hend chönne öberlegge, esch die Dame metsamt Täschene be de Rachel ond Melissa of de Röckbank ghocket). De Ussechtsponkt esch of 4350 m.ü.M., was mer bem Laufe scho chli gmerkt hed. Det hemmer es Päärli us Rosario atroffe, wos i dere Konstellation gar ned döft gäh: Är River Plate Fan, sie Boca Juniors. Bemene teilte Mate hemmer die wonderschöne Bärge bestuunt, bevor mer weder zrogg zom Auto send.
Z'Nacht hemmer im Las Glorias gha, es Restaurant metere interessante sakrale Iirechtig. S'Ässe esch össerscht priswärt ond fein gsi.

Am nöchschte Tag semmer, nochdem mer no chorz in Humahuaca am Märt send go förs z'Nacht iichaufe, wiiter i Norde gfahre, wo mer d'Inca Cuevas hend welle go aluege. D'Wanderig det äne esch mehrheitlech im/näbeme uströchnete Flossbett gsi, was sech chli zoge hed. Am Ziel acho hed en Guide metere ganze Hondeschar gwartet ond üs e Füehrig dör die leider dör Vandalismus veronstalteti Höhli gäh. Im Aschloss hemmer die nöcher Omgäbig vo de Höhli of eigeti Fuscht chönne erkonde ond hend gstuunet abere "Oase" im Schatte vom Felse, Fänschter, Lagune ond Chinchilla-ähnleche Tier. Öbernachtet hemmer, of Arote vom geschtrige Gastgäber, in Maimara. Wie scho in Hornocul esch au de Hang vis-à-vis vo üsem Hüsli rägebogefarbig gsi, leider hemmer bem gmeinsame Choche d'Ziit chli vergässe ond so leider d'Sonneomdergangsstemmig verpasst.
En nächtleche Hundechor ond en Esel als Solokönschtler hend üs i Schlof gsonge.Read more