Tag 6: Quito

Wie immer bini scho am halbi 7ni wach gsi. Müehsam hemmer de Morge umebracht bis mer denn wieder ih üses Lieblingskaffi am Plaza Grande en Cappuccino gnoh hend. Mer hett gmerkt das Samschtig isch. D‘Strasse sind viel voller gsi. Nacher hemmer eus uf de Weg gmacht zumene Busbahnhof. Mir hend welle zum Mitad del Mundo. Aber au de Busbahnhof isch voller Locals gsi und viel hend eus druf hiigwiise, dass mer guet uf eus ufpasse sötted. Nach 1 mal umstiege und 1h30min Busfahre simmer ahcho. Ufem Weg simmer vorallem geg de Schluss ah ganz spezielle Wohnquartier verbii gfahre. Alles die gliiche Hüser, ihghaged ih eim Gebiet mit ganz Moderner Infrastruktur. Het überhaupt nid zu de Umgebig passt. De Park chostet normalerwiis 5$ aber will das Wuchenend „Oktoberfest“ isch, hemmer chöne gratis gah. Das sogenannte Oktoberfest isch sone art Streetfoodfestival gsi und vieli Länder vo Süd-/Mittelamerika hend en eigene Stand gha und auna en Volkstanz vorgfüehrt. S‘Monument selber isch nid mega spektakulär gsi. Au s‘Muesum drin isch nid so spannend gsi. Ufem Heiweg simmer chli früehner usgstiige, will mer na die ultra krasse Ihchaufszentre hend welle ahluege. Die Disparitäte ih dem Land sind uuh mega krass. Det hemmer ihde Mall eh uuh feins Pistaziecookie und en Kaffi gnoh. Nacher simmer langsam ih das Viertel, wo mir üses Airbnb gha hend: Centro Historico. Det hemmer eus es schöns Restaurant gsuecht. Nachem Znacht simmer heigloffe und hend ahgfange packe. D‘Vorfreud für Galapagos-Insle sind gross!!Lue lisää